Psa 77 | TyvTUV | STEP | Маскил-ыр. Асафтыы. Мээң чонум, өөредиимни тооп дыңна, чугаа-сөзүмче кулааң ээктир.

1 Мээң чонум, өөредиимни тооп дыңна,
чугаа-сөзүмче кулааң ээктир.
2 Аксымны угаадыглыг чугаа-биле ажыдайн,
эрте-бурунгу тывызык чугааларны медээлээйн ^a.
3 Ол чугааларны дыңнаан база билир бис –
оларны биске өгбелеривис дамчыткан ^b.
4 Ол чугаалар бистиң ада-өгбевистиң
ажы-төлүнге чажыт чүүл эвес турган ^c –
а олар келир салгалга
Дээрги-Чаяакчының алдары биле күчү-күжүнүң дугайында,
Ооң кылганы кайгамчык чүүлдер дугайында дамчыдып чугаалаан ^d.

5 Дээрги-Чаяакчы Иаковка дүрүмнерни доктааткан,
Израильге ыдыктыг хоойлуну тургускаш,
«Ажы-төлүңерге дамчыдыңар» деп,
ада-өгбелеривиске чагып каан ^e.
6 Келир салгал – алызы барып төрүттүнер ажы-төл
ону билип алзын ^f,
боттарының ажы-төлүнге база дамчыдып чугаалап,
7 Бурганга идегезин, Ооң ажыл-херектерин утпазын,
айтыышкыннарын сагызын.
8 Олар боттарының ада-өгбелери –
хай-чагырга чок, чөрүү ^g, чүректери Бурганга бердинмээн,
сеткил-сагыжы-биле Аңаа шынчы эвес
салгалдың улузу дег болбазын ^h.

9 Эфремниң ук-салгалы дайын шөлүнден чепсектиг,
чаларын атпышаан, дезипкен.
10 Олар Бурганның берген чагыг-керээзин кадагалап албааннар,
Ооң дүрүм-хоойлузун эдерерин күзевээннер.
11 Ооң ажыл-херектерин база
оларга көргүскен кайгамчык чүүлдерин уттупканнар ⁱ.
12 Бурган Египетке, Цоан деп черге ^j,
оларның ада-өгбелериниң мурнунга
кайгамчык чүүлдерни көргүскен ^k:
13 далайны ийи чарыпкаш, улусту кежире берген,
сугну ханалаштыр тургузупкан ^l;
14 оларны хүндүс – булут-биле,
а дүннү өттүр – оттуң чырыы-биле эдертип бар чыткан ^m;
15 ээн кургаг ховуга хаяны оя каккаш,
оларны, дүп чок далайдан дег, суггарып каан ⁿ;
16 ол хаядан сугну аксырга, суг хемнер бооп агып бада берген.
17 Ынчалзажок олар Дээди Өрүкүнүң мурнунга
бачыт үүлгедирин уламчылап,
ээн кургаг ховуга Ооң сеткилин хомудадып турганнар.

18 А олар боттарының чүрээнге Бурганны шенеп ^o,
күзелин хандыр чиир аъш-чем айтырып турганнар ^p.
19 Аңаа хамаарыштыр:
«Бурган ээн кургаг ховуга аъш-чем-биле хандырып шыдаар бе?
20 Ол хаяны оя кагарга, суг аттыгып үнүп,
агым суглар бадып эгелээни шын болгай,
ынчалзажок Ол далган-тараа берип шыдаар бе,
Бодунуң чонун эът-биле чемгерип шыдаар бе?» – деп турганнар.

21 – 22 Дээрги-Чаяакчы ону дыңнааш, аажок килеңнээн:
Бурганга бүзүревейн, Оон кээр камгалалга идегевейн барганы дээш,
Иаковка удур от кыпкан, Израильге удур килең кыптыккан ^q.
23 Ол өрү көшкен булуттарга дужаап,
дээрниң эжиин ажыдыпкаш ^r,
24 улуска аъш-чем кылдыр маннаны чагдырыпкан –
оларга дээрден баткан тарааны берген ^s.
25 Дээрниң төлээлериниң аъш-чемин кижи амытан чип турган,
Дээрги-Чаяакчы кижилерге хүнезинни
сагыш хандыр бадырып берген.
26 Ол чөөн чүктен хатты дээрге хадыдыпкаш,
мурнуу чүктен хатты Бодунуң күжү-биле доюлдурупкан.
27 Оон оларже доозун дег хөй эътти,
далай элезини дег хөй чалгынныг куштарны чагдырыпкан ^t.
28 Куштарны чоннуң турлааның ортузунче,
чадырлар чанынче бадырып берген.
29 Улус куш эъдин пөккүже чип алган ^u –
Дээрги-Чаяакчы оларның күзээн чүвезин хайырлаан.
30 Ынчалзажок олар күзээн эът-чемин дайнавышаан турда,
31 Бурганның килеңи оларже көдүрүлгеш, эң семис-шыырак улузун өлүрүп,
Израильдиң аныяк эрлерин чок кылып каан ^v.

32 Ол хиреде-ле олар бачыт үүлгедирин уламчылап,
Ооң кайгамчык чүүлдеринге бүзүревейн турганнар ^w.
33 Дээрги-Чаяакчы оларның назынын хей-бус дег чок кылып ^x,
чуртталгазын айыыл-халап-биле үзүп каан.
34 Бурган израиль чонну узуткап эгелээрге,
олар Оон дилег кылып, дедир эглип кээп, Олче чүткүп,
35 Бурган оларга чаштыр хая дээрзин ^y,
Дээди Өрүкү оларның Камгалакчызы дээрзин
сактып кээп турганнар.
36 Олар Аңаа аксы-сөзү-биле авыяастап,
Ооң мурнунга аксы-дылы-биле мегелеп турганнар ^z,
37 оларның чүректери Бурганның мурнунга шынныг эвес бооп,
Ооң-биле чарган чагыг-керээзинге шынчы эвес болганнар ^aa.
38 А Ол ээ-хайыралыг болгаш,
улустуң бачыттарын өршээп ^ab, узуткавайн турган,
Бодунуң килеңин хөй катап чайладып,
күштүг килеңин бүрүнү-биле хайныктырбайн келген.
39 «Олар – анаа-ла эът-мага-бот-тур ^ac, үндүр үрүптерге,
ээп келбес тыныш-тыр» деп, Ол бодап турган.

40 Олар Ону чеже катап ээн кургаг ховуга тооп дыңнаваан дээр,
кижи чок черге Ооң сеткилин чеже катап хомудаткан дээр? ^ad
41 Оон база-ла Израильдиң ыдыктыг Бурганын шенеп, хорададып,
42 Ооң күштүг холун, дарлалдан оларны хостап каан хүнүн уттупканнар.
43 Дээрги-Чаяакчының Египетке, Цоан деп черге,
оларга көргүскен кайгамчык демдектерин уттупканнар ^ae.
44 Ол үеде Ол, египетчилер суг ижип шыдавас кылдыр,
оларның хемнерин ханче хуулдурупкан ^af.
45 Оларны чиир кылдыр – ызырар сээктерни,
узуткаар кылдыр – бөзүр-пагаларны оларже салыпкан ^ag.
46 Оларның үнүш-дүжүдүн – шергилерге,
күш-ажылының үре-түңнелин – мөөң шартылаага
дойлаттырып каапкан ^ah.
47 Дээрги-Чаяакчы оларның виноград шөлдерин – долу-биле,
чимистиг ыяштарын – борбак доштар-биле соп каапкан ^ai.
48 Мал-маганынче долу чагдырыпкан,
сүрүг малынче чаңныктар бадырыпкан ^aj.
49 Египетчилерже Бодунуң килеңиниң чалбыыжын,
кылыктанып хорадаан сагыжын, айыыл-халапты,
дээрниң хора чедирер төлээлерин ыдыпкан ^ak.
50 Бодунуң килеңинге орук ажыдып,
оларның амы-тынын өлүмден кадагалаваан,
мал-маганын ^{▼▼77:50 Азы: «Оларның чуртталгаларын».} хамчык аарыгга хүлээдип берген.
51 Египетке төрүттүнген дун төл бүрүзүн,
Хаамның ^{▼▼77:51 Хаам – Египеттиң чурттакчылары Нойнуң оглу Хаамның үре-салгалы кылдыр санадып турган (Э. д. 10:6-10; Ыд. ыр. 104:23; 105:22 көр).} чадырларында баштай төрүттүнген оолдарны узуткап каан ^an.

52 Оон Дээрги-Чаяакчы Бодунуң чонун
хойгулаштыр сүрүп алгаш,
ээн кургаг ховуга, сүрүг мал дег, хай деп бар чыткан ^ao.
53 Ол чонунга айыыл халдатпайн эдертип бар чыткан,
Ооң улузу коргуп-сүртевээн, а дайзыннарны далай хөме апкан ^ap.
54 Бурган Бодунуң чонун ыдыктыг девискээринче,
Бодунуң холунуң ээлеп алганы
ыдыктыг дагже эдертип эккелген ^aq.
55 Улузу чедип кээрге-ле, өске чоннарны үндүр сывырып,
оларның ээлээн черин Бодунуң улузунга
хувааглыг өнчү кылдыр үлеп бергеш, Израильдиң аймактарын
ол чоннарның чадырларынга чурттадып каан ^ar.

56 Ынчалза-даа израильчилер Дээди Өрүкү Бурганны шенеп,
хомудадырын уламчылап, Ооң хоойлуларын сагывайн турганнар ^as.
57 Боттарының ада-өгбелери дег,
Бургандан ойталап, Аңаа өскерлип,
ыргак-дагыр согуннарга дөмейлежи бергеннер ^at.
58 Бурганның хүннээшкинин дүрзү-бурганнары-биле оттуруп,
оларга мөгеер бедигээштери-биле Ону хорададып турганнар ^au.
59 Бурган ону дыңнап кааш, килеңнеп,
Израильге дыка хөңнү чок болу берген.
60 Ол Силомга турган майгынын ^av –
кижилер аразынга чурттап турган өргээзин каапкаш барган;
61 Бодунуң күчү-күжүн туттуруушкунга берипкен,
Бодунуң алдарын дайзынның холунга хүлээдипкен ^{▼▼77:61 Филистимнерниң эжелеп алганы ыдыктыг аптара дугайында чугаалап турар чадавас (1 Хаан. 4:22 көр).}.
62 Бодунуң чонун хылыш-биле узуткаар кылдыр берипкен ^ax,
Бодунуң өнчүзү болур улузунче килеңней берген.
63 Ооң чонунуң аныяк эрлерин от чипкен –
аныяк кыстарны мактап, куда ырлары куттулбастаан.
64 Бурганның бараалгакчыларын хылыш хыдып турган ^ay,
а дулгуяк кадайлары оларның ажыын ажып ыглашпаан ^az.

65 Ооң соонда Дээрги, уйгузу чаштай берген дег, оттуп келген ^ba,
арагага эзирээш, сергей берген мөге кижи дег ^bb, туруп келген.
66 Ол Бодунуң чонунуң дайзыннарын
артындан кээп узуткап каан,
оларның адын кезээ мөңгеде бакка суп каан.

67 Ол Иосифтиң үре-салгалын хүлээп көрбээн,
Эфремниң аймаан шилип албаан,
68 а Иуданың аймаан ^bc база ынак даа Сионну шилип алган ^bd.
69 Бодунуң ыдыктыг өргээзин
Сионга, бедик дээрлерге дег, тудуп үндүргеш,
чер дег быжыг кылдыр кезээ мөңгеде тургузуп каан.
70 Ол Давидти Бодунга чалча кылдыр шилип алгаш,
ону хой кажаазындан эккелген ^be;
71 Давидти мал аразындан Бодунуң чону – Иаковту,
Бодунуң өнчүзү – Израильди кадарар кылдыр ап алган ^bf.
72 Давид чонну арыг чүрээнден кадарып ^bg,
мерген холдары-биле баштап чораан.