Psa 88 | TyvTUV | STEP | Маскил-ыр. Зерах уктуг Эфанныы .

1 Маскил-ыр. Зерах уктуг Эфанныы ^a.
2 Дээрги-Чаяакчы, Сээң энерелиңни
мөңге шагда алгап ырлаар мен ^b,
Сээң шынчы чорууңну
салгалдан салгал дамчып чугаа-сөзүм медээлээр.
3 Бадыткаар мен:
энерелиң мөңгези-биле тургустунган,
шынчы чорууң дээрлерде доктааттынган.

4 «Шилип алганым хаан-биле керээ чардым,
Мээң чалчам Давидке:
5 „Үре-салгалыңны кезээ мөңгеде
үстүп төнмес кылып каар мен,
сээң дүжүлгеңни салгалдан салгал дамчып тургузар мен ^c“–
деп даңгырагладым» – дээн сен ^d. Сэла

6 Дээрги-Чаяакчы,
Сээң кайгамчык ажыл-херектериңни дээрлер алдаржытсын ^e,
Сээң шынчы чорууңну
ыдыктыг төлээлериңниң чыыжынга ^f алгап-мактазын.
7 Дээрлерде Дээрги-Чаяакчы-биле эннежир кым барыл? ^g
Бурганның оолдарының аразында ^h
Дээрги-Чаяакчы-биле дөмейлежир кым барыл?
8 Бурганның ыдыктыг төлээлериниң өндүр улуг чыыжынга
Ол аажок хүндүледир,
Бурганны хүрээлээн бүгү амытаннар Оон коргар.
9 Аг-шериглиг Дээрги-Бурган-Чаяакчы!
Сен дег күчүлүг өске кым барыл? ⁱ
Сээң шынчы чорууң Сени бүргей апкан-дыр!

10 Далайның калчаалыг килеңин чагырар сен:
ооң чалгыглары көдүрлүрге, оожургадыр сен ^j.
11 Сен Рахавты ^{▼▼88:11 Рахав – хананей мифологияда суг чурттуг күчүтен моос. Ол амытан Бурганның удурланыкчызын символдап көргүзүп турар. Ооң ады «улуургак чорук» дээн уткалыг.}, секти дег, чылча базып турдуң ^l;
улуг күжүң-биле дайзыннарыңны тарадыр сывырыптың.
12 Дээрлер – Сээңии, чер база – Сээңии;
өртемчейни, ону долган бүгү чүвени Сен бодараттың ^m.
13 Сен соңгу болгаш мурнуу чүктү чаяадың;
Фавор биле Эрмон даглар ⁿ
Сээң адың дээш өөрүшкүлүг ырлажып тур.
14 Сээң күчү-күжүң улуг – холуң дыңзыг,
күштүг холуң бедидир көдүрүлген.
15 Чөптүг чорук биле шын шииткел – Сээң дүжүлгең үндезини ^o;
шынчы чорук биле энерел Сени медээлеп бар чыдар.

16 Бурганны өөрүшкүлүг алдаржыдып билир чон амыр-чыргалдыг.
Дээрги-Чаяакчы, олар Сээң
чырыткылыг шырай-арныңны көрүп чоруур ^p.
17 Хүннү бадыр Сээң адың дээш өөрүүрлер-дир,
Сээң чөптүүң-биле бедидир көдүртүрлер-дир.
18 Сен – улузуңнуң алдарлыг күжү сен;
Сээң ээ көрнүүшкүнүң-биле
күчү-күжүвүс бедидир көдүрткен-дир.
19 Бистиң камгалалывыс Дээрги-Чаяакчыдан кээр ^q,
бистиң хаанывыс – Израильдиң ыдыктыг Бурганының төлээлекчизи.

20 – 21 Сеңээ бердинген кижиге ажыдыышкын кылып тура,
кажан-бир шагда мынча дээн сен:
«Мээң чалчам Давидти тып алдым,
ону ыдыктыг олива үзү-биле чаап кагдым ^r;
ол мөге-шыырак кижиге дуза көргүстүм,
чон аразындан шилиттинген кижини бедидир көдүрдүм.
22 Мээң холум ону кадагалаар,
Мээң күчү-күжүм ону быжыктырар.
23 Дайзын ону ажып-тиилеп шыдавас,
кара сагыштыг кижи ону бастып шыдавас.
24 Ооң мурнунга дайзыннарын чылча шавар мен,
ону көрбес улусту узуткаар мен ^s.
25 Шынчым биле энерелим ооң-биле артып каар,
Мээң адым ачызында ооң күчү-күжү немежир.
26 Ооң холун далайга чедир,
күштүг холун хемнерге чедир сундурар мен ^t.
27 Ол Мени: „Сен – мээң Ачам сен, Бурганым сен,
мени камгалаар Хая сен ^u“– деп адаар.
28 Мен ону дун оглум кылып аар мен ^v,
чер-делегейниң хааннарындан бедидир олуртур мен ^w;
29 Бодумнуң энерелимни аңаа кезээ мөңгеде көргүзер мен,
ооң-биле чарган керээмге шынчы боор мен ^x.
30 Ооң үре-салгалы кезээ мөңгеде үстүп төнмес,
ооң дүжүлгези, дээр туруп турда ^y, тендиш дивес.
31 А ооң үре-салгалы Мээң хоойлумну үрээр болза,
дүрүмнеримни сагывас болза,
32 Мээң чагыгларымны тоовас болза,
айтыышкыннарымны күүсетпес болза,
33 Мен оларны кемниг херектери дээш – шыкпыыш-биле,
бачыттары дээш – кымчы-биле кезедир мен ^z.
34 Ынчалзажок энерелимни Давидтен дедир албас мен,
шынчы чоруумну өскертпес мен ^aa.
35 Чарган керээмни үревес мен,
аксымдан үнген сөстеримден ойталавас мен.
36 Мен Бодумнуң ыдыктыым-биле
чаңгыс катап даңгыраглаан мен ^ab –
Давидти мегелеп каар ужурум чок.
37 Давидтиң үре-салгалы кезээ мөңгеде артар,
ооң дүжүлгези, хүн дег, Мээң мурнумга чырыыр,
38 ай дег, кезээ мөңгеде турар, а шынчы херечи – дээрлерде ^ac». Сэла

39 А Сен ам Бодуңнуң шилип алган хааныңны кааптың,
оон ойталадың, олче килеңней бердиң ^ad;
40 Бодуңнуң чалчаң-биле чарган керээңни тоовайн бардың,
чалчаңның оваадайын черже дүжүр октаптың ^ae;
41 ооң чурттаан хамык ханаларын үрегдеп, шивээлерин бузуп кааптың ^af.
42 Чаны-биле эрткен-дүшкен улус
дөгерези ону үптеп-тонап тур,
кожаларынга ол кочу-шоот болду.
43 Сен ооң дарлакчыларының күчү-күжүн өстүрдүң,
ооң хамык дайзыннарын амыраттың.
44 Ооң хылыжының чидиг бажын
дайын-чаа үезинде дайзынга дыынмас кылып кагдың;
45 ооң өндүр чайынын хунаагаш, дүжүлгезин черже дүжүр октаптың;
46 ооң чалыы үезин кызыргаш, бак атка киирип кагдың ^ag. Сэла

47 Дээрги-Чаяакчы, чежеге дээр чаштынар сен? ^ah
Кезээ мөңгеде бе?
Сээң килеңиң, от дег, чежеге дээр кыптыгарыл? ^ai
48 Назыным аргажогун бодап көр.
Кижи амытанны кандыг хоозун куруг чуртталга дээш чаяаган сен? ^aj
49 Мөңгези-биле амыдырап, өлүм көрбес кижи бар бе?
Алдыы орандан амы-тынын чайладып шыдаан кижи бар бе? ^ak Сэла

50 Биеэги энерелиң кайыл, Дээрги?
Давидке шынчы чорууң-биле даңгыраглааның бода!
51 Дээрги, Сээң чалчаларыңның
бүгү күштүг чоннарга базындырып келгенин –
ишти-хөңнүм саргыдып чоруур
шак ол дарлаашкынны бодап келем;
52 Сээң дайзыннарыңның дора көрүүшкүнү кандыг ийик,
Дээрги-Чаяакчы, Сээң шилип алган хааныңны
кайы хире дорамчылаар ийик!
53 Дээрги-Чаяакчыга кезээ мөңгеде алдар!
Аминь, ындыг-ла болзунам! ^al