Psa 90 | TyvTUV | STEP | Дээди Өрүкү Бурганның чаглааның адаанда чурттап турар болзуңза , Күчүлүг Бурганның хөлегезинде дыштанып турар болзуңза,

1 Дээди Өрүкү Бурганның чаглааның адаанда чурттап турар болзуңза ^a,
Күчүлүг Бурганның хөлегезинде дыштанып турар болзуңза,
2 Дээрги-Чаяакчыга: «Бурганым,
Сен мээң хоргадалым сен, быжыг шивээм сен ^b,
мен Сеңээ идегээр мен» – деп чугаалаар сен.
3 Ол сени аңчының дузаандан чайладып ^c,
өлүмнүг аарыгдан камгалаар,
4 Бодунуң чалгыннары-биле шуглап аар,
Ооң чүглериниң адаанга чаштына бээр сен ^d;
Ооң шынчы чоруу ^e сеңээ камгалалдың куяк хеви дег болур.

5 Дүне – коргунчуг айыылдардан ^f,
хүндүс – ужуп чоруур согундан кортпас сен ^g.
6 Дүмбей караңгыда кедеңгирлээн халдавырлыг аарыгдан,
дал дүъште алгаш баар хамчык аарыгдан кортпас сен.
7 Муң кижи сээң чаныңга, түмен кижи оң талаңга
кырлып каар-даа болза, сенче ол бүгү аарыг-човалаң халдавас.
8 Чүгле ийи карааң-биле көөр сен –
бузуттугларның кеземче алганын көөр сен ^h.
9 «Дээрги-Чаяакчы – мээң хоргадалым» ⁱ – деп чугаалаан болгай сен,
Дээди Өрүкүнү бодуңга шивээ кылдыр шилип алган болгай сен ^j.
10 Бак чүве сеңээ хора чедирбес,
айыыл-халап сээң аал-ораныңче чоокшулавас ^k.
11 Ол сени шупту оруктарыңга камгалаар кылдыр
Бодунуң төлээлеринге чагып каар,
12 олар сени, будуң дашка тептикпезин дээш ^l,
холдары-биле көдүрүп аарлар ^m.
13 Араатан биле чыланны базар сен,
арзылаң биле хоран дылдыг чыланны таптаар сен ⁿ.

14 Бурган мынча дээн: «Ол кижи меңээ ынак-тыр,
ынчангаш ону кадагалаар мен ^o;
ол Мээң адымны хүндүлеп билип алган боорга,
ону айыылдан адырар мен ^p.
15 Мени кый дээрге, аңаа харыылаар мен ^q;
ол айыыл-халапка алзып аарга, ооң чанынга турар мен,
ону камгалап, алдаржыдар мен.
16 Узун назынны аңаа пөктүр хайырлап ^r,
камгалалымны көргүзер мен».