Rev 11 | TyvTUV | STEP | Оон меңээ даянгыышка дөмей хемчээр мерге бергеш , мынча деп чугаалады: «Барып, Бурганның өргээзин база өргүл салыр бедигээшти хемчээ, ында тейлеп турар улусту сана.

‏ Revelation of John 11

Ийи херечи

1 Оон меңээ даянгыышка дөмей хемчээр мерге бергеш ^a, мынча деп чугаалады: «Барып, Бурганның өргээзин база өргүл салыр бедигээшти хемчээ, ында тейлеп турар улусту сана. 2 Ынчалза-даа даштыкы шөлдү хемчээве ^b, чүге дээрге ону өске чоннар улузунга берипкен-дир ^c. Олар ыдыктыг хоорайны дөртен ийи ай дургузунда чаза базып кээр ^d. 3 Оон Мен Бодумнуң ийи херечимге күштү бээримге, олар качыгдал хевин кеткеш, 1260 хүн дургузунда Бурганның медээзин суртаалдап кээрлер».

4 Ол херечилер дээрге ийи олива ыяжы болгаш черниң Дээрги-Чаяакчызының мурнунда турар ийи чырыткы ол-дур ^e. 5 Оларга хора халдадыр дээн кандыг-бир кижи турар болза, херечилерниң аксындан от аттыккаш, дайзыннарын өрттендир чиптер ^f. Ынчангаш кым оларга хора халдадыксааныл, ынчалдыр өлүртүп каар. 6 Олар Бурганның медээзин суртаалдап чоруур үеде чаъс чагбазын дээш, дээрни хаар эргени оларга берген ^g. Херечилерде ол ышкаш сугларны хан кылдыр хуулдуруптар ^h база черни кандыг-даа айыыл-халап-биле, кажан күзей-дир, кезедир эрге бар.

7 Ийи херечи боттарының медээзин төндүр суртаалдаптары билек, тамыдан ⁱ бир араатан оларже халдаар. Араатан оларны тиилээш, базып каар ^j. 8 Херечилерниң өлүг мага-боттары оларның Дээргизиниң хере шаптыртканы улуг хоорайның кудумчуларынга чыдар. Ол хоорайның ойзу демдектээн ады – Содом азы Египет ^k. 9 Янзы-бүрү дылдарлыг чоннарның, аймактарның, сөөк-языларның улузу оларның өлүг мага-боттарынче үш чартык хүн кайгап кээр болгаш оларны хөөржүдерин чөпшээревес ^l. 10 Оларның өлүрткени дээш, черниң чурттакчылары өөрүп-хөглээр база дойлаар, аразында белек солчур, чүге дээрге ол ийи медээчи кижи төрелгетенге хөй хилинчекти эккелген.

11 Ынчалза-даа үш чартык хүн эрткенде, Бурганның чорутканы амы-тын медээчилерже сиңниге берген, оон олар бут кырынга туруп келген ^m. Оларны көрген хамык улус аажок корткан. 12 Ийи медээчи оон дээрден дыңзыг үннүң оларга: «Бээр үнүп келиңер!» – дээнин дыңнап каан ⁿ. Олар дайзыннары көрүп турда, оларның мурнунга булут кырынга дээрже көдүрлүп үне бергеннер ^o.

13 Таптыг-ла ол өйде чер аажок күштүг шимчээш ^p, хоорайның оннуң бир кезии буступ калган. 7000 кижи өлген, арткан улус коргуп-сүртеп, дээрде саадаан Бурганны алдаржыдып турган.

14 Ийиги халап ынчалдыр эрткен ^q, ынчалза-даа үшкү халап кел чыткан.

Чедиги труба

15 Дээрниң чедиги төлээзи трубазын этсиптерге ^r, дээрден: «Бо делегейни чагырар эрге ам Дээргивистиң, Ооң шилээн Христозунуң эргезинде апарган, Ол ам кезээ мөңгеде хааннаар-дыр! ^s» – дээн ыыткыр үннер дыңналды.

16 Бурганның мурнунга боттарының дүжүлгелеринде олурган чээрби дөрт ирей ^t доңгая кээп дүшкеш, Бурганга мөгейдилер. 17 Олар мынча деп турду:

«Ам бар, черле турган ^u Бүрүн Күчүлүг Дээрги-Бурган-Чаяакчы,
Сээң өндүр улуг Чагыргаңны Бодуңнуң холуңче ап,
чагырып эгелээниң дээш, Сеңээ өөрүп четтирдивис.
18 Бүгү аймак-чоннар килеңнеп турду ^v,
а ам Сээң килеңиңниң шагы келген-дир.
Өлүглерни шиидер болгаш Сээң чалчаларыңны,
медээчилериңни база Сеңээ шынчы улусту,
Сээң адыңны хүндүткеп көөр улуг, биче бүгү улусту
шаңнаар үе келген-дир ^w.
Черни узуткап турарларны чок кылыр үе келген-дир!»

19 Ынчан дээрде Бурганның өргээзи ажыттынып, көстү берди ^x. Чагыг-керээниң аптаразы ында турарын көрдүм. Ооң соонда кызаңнааштар кызаңнап, диңмирээшкин диңмиреп, чер шимчей берди база улуг долу дүжүптү ^y.