Rev 12 | TyvTUV | STEP | Оон дээрге өндүр улуг кайгамчык демдек – хүн кеткен херээжен көстүп келди. Ооң буттарының адаанда ай бар, а бажында он ийи сылдыс-биле каастаан оваадай кедип алган чорду .

‏ Revelation of John 12

Херээжен биле улу

1 Оон дээрге өндүр улуг кайгамчык демдек – хүн кеткен херээжен көстүп келди. Ооң буттарының адаанда ай бар, а бажында он ийи сылдыс-биле каастаан оваадай кедип алган чорду ^a. 2 Ол херээжен сааттыг болду. Ооң божуур ай-хүнү үнген, эъди аарыырга, алгырып турду. 3 Дээрге ооң соонда өске кайгамчык демдек – чеди баштыг, он мыйыстыг ^b аажок улуг кызыл улу көстүп келди. Ооң баштарында чеди оваадай кедирген болду. 4 Ооң кудуруу дээрден сылдыстарның үштүң бир кезиин дүжүр ширбээш, черже шывадапты ^c. Херээжен божуптары билек, ооң Чаш төлүн сыырыптар дээш, улу ооң баарынга турду. 5 Херээжен бүгү чоннарны демир мерге-биле башкарар ^d Оол божуп алды. Ынчалза-даа Бурган ооң Оглун алгаш, Бодунуң чанында дүжүлгезинче аппарды. 6 А херээжен ээн ховуже, Бурганның аңаа белеткеп кааны черже дезипти, орта ол дээш, 1260 хүн дургузунда ^e сагыш салып кээр ужурлуг турган.

7 Дээрге ооң соонда дайын эгеледи: Михаил ^f база дээрниң аңаа чагырткан төлээлери улуга удур, а улу бодунуң төлээлери-биле оларга удур демисежип үндү. 8 Ынчалза-даа улу күш четпейн барып, бодунуң төлээлери-биле кады дээрге турар черин чидирипти. 9 Бүгү делегейни дуурайлаан, эрлик база удурланыкчы ^g деп адаткан ол аажок улуг улу, шаандагы чылан ^h бодунуң төлээлери-биле кады черже дүжүр октаттырыпты ⁱ.

10 Мен ынчан дээрден ыыткыр үннү дыңнап кагдым: «Ам камгалал келди. Ам бистиң Бурганывыс Бодунуң хаан күжүн көргүстү! Ам Ооң шилээн Христозу Бодунуң эргезин көргүстү! Бурганывыстың мурнунга туруп алгаш, ха-дуңмавысты хүндүс-даа, дүне-даа буруудадып келген буруудадыкчы ^j дээрден дүжүр октаткан-дыр. 11 Бистиң ха-дуңмавыс ону Хураганның ханының ачызында алыс шынны херечилээни-биле тиилээн-дир ^k. Олар өлүрүнден-даа чалданмаан, амы-тынын харамнанмаан-дыр ^l. 12 Ынчангаш өөрүп-байырлаңар, дээрлер база дээрлерниң чурттакчылары! ^m А чер биле далай, ат болур силер, чүге дээрге эрлик силерже бадып келген-дир! Ол хөлчок килеңнээн, чүге дээрге ооң үези көңгүс эвээш артканын билир-дир».

13 Черже дүжүр октадыпканын билип кааш, улу Оолду божаан херээженни истеп-сүрүп эгелээн. 14 Ынчалза-даа херээженге ээн ховуга турар чер белеткеп каан, ынаар ужупсун дээш, аңаа улуг эзирниң ийи чалгынын берген болду ⁿ. Орта ону үш чартык чыл дургузунда ^o ажаап-карактап, улудан дестирип кээр турган. 15 Улу ооң соонда, херээженни чууй шаап аппарзын дээш, аксындан сугну хемгилештир үндүр бүлгүрүптү. 16 Ынчалза-даа чер херээженге дузалашты: ол бодунуң аксын ажыткаш, улунуң аксындан аккан сугну ажырыпты. 17 Улу херээженге медээжок килеңнээш, ооң артып калган ажы-төлү-биле – Бурганның айтыышкыннарын сагаан, Иисусту шынныы-биле херечилээн улус-биле чаалажыр дээш чорупту ^p.