Rev 13 | TyvTUV | STEP | Улу далай эриинге туруп алды . Мен ынчан далайдан үнүп орар араатанны көрүп кагдым. Ол он мыйыстыг болгаш чеди баштыг , а мыйыстарында он оваадайлыг болду. Ооң баштарында Бурганны дорамчылаан аттар бижээн.

‏ Revelation of John 13

Ийи араатан

1 Улу далай эриинге туруп алды ^{▼▼ Өске бурунгу сөзүглелдерде «Мен далай эриинге туруп алдым» (Иоанн боду дээни ол) деп бижээн.}.

Мен ынчан далайдан үнүп орар араатанны көрүп кагдым. Ол он мыйыстыг болгаш чеди баштыг ^b, а мыйыстарында он оваадайлыг болду. Ооң баштарында Бурганны дорамчылаан аттар бижээн. 2 Мээң көрүп кааным араатан ирбишке дөмей, ооң аспактары адыгныы дег, а аксы арзылаңныы дег чорду ^c. Улу ол араатанга бодунуң күчүзүн, бодунуң дүжүлгезин база бодунуң аажок улуг эргезин дүжүп берипти ^d. 3 Араатанның бир бажында өлүмнүг балыг-даа бар ышкаш көзүлдү, ынчалза-даа ол балыы экирий берген чорду. Бүгү делегейниң улузу кайгап-харап, араатанны эдерип турду. 4 Араатанга бодунуң эргезин дүжүп бергени дээш, кижи бүрүзү улуга мөгейди. Улус араатанга база мөгейип: «Бо араатан-биле кым эннежирил, ооң-биле кым месилдежип шыдаарыл?» – дижип турду.

5 Бурганны дорамчылаан, турамык сөстер эдерин ^e аңаа чөпшээрээн болду. Ол дөртен ийи ай дургузунда ^f чагырар эргени алган. 6 Араатан аксын ашкаш, Бурганны, Ооң адын, Ооң чурттаан черин база дээрниң чурттакчыларын одап, каргап эгеледи. 7 Бурганның улузу-биле чаалажыр болгаш оларны тиилээр эргени база аңаа берген ^g. Ол ышкаш янзы-бүрү дылдарлыг аймак, чон база шупту сөөк-языны чагырар эргени аңаа берген. 8 Чер кырында чурттаан хамык улус – өртемчейни чаяарының бетинде-ле өргүлге салган Хураганда бар амыдыралдың номунче ^h аттарын киир бижээннеринден өскелери, араатанга мөгейдилер.

9 Дыңнаар кулаа бар хамык улус дыңназын! ⁱ 10 Тудуп алгаш баар ужурлуг кижини тудуп алгаш баар ^j. Хылыштан калыр ужурлуг кижини хылыш шанчып каар ^{▼▼ Өске бурунгу сөзүглелдерде «Улусту тудуп алгаш бар чыдар кижи боду туттуругга баар. Хылыш-биле өлүрүп турар кижи боду хылышка шаштырып аар» деп бижээн (Мф. 26:52 көр).}. Ынчан Бурганның улузундан шыдамык чорук болгаш бүзүрел негеттинер ^l.

11 Мен оон черден үнүп орар база бир араатанны көрүп кагдым. Ол хураганныы дег ийи мыйыстыг, ынчалза-даа улу ышкаш чугаалаар болду. 12 Ол бирги араатанның өмүнээзинден ооңуу ышкаш бүрүн эргени эдилеп, бүгү бо делегейни база ында чурттаан хамык улусту өлүмнүг балыы экирий берген бирги араатанга мөгееринче албадап турду. 13 Ийиги араатан өндүр улуг кайгамчык чүүлдерни кылды ^m: улус көрүп турда, отту безин дээрден бадырып турду ⁿ. 14 Ийиги араатанга биргизиниң өмүнээзинден кайгамчык чүүлдер кылыр арганы берген турган ^o. Ынчангаш ол оозу-биле чер кырында чурттаан хамык улусту дуурайлап каапкан. Черниң чурттакчыларынга хылыш-биле өлүмнүг балыглатса-даа, өлбейн барган бирги араатанның дүрзүзүн шуткуурун ийиги араатан дужаады. 15 Ийиги араатанга биргизиниң дүрзүзүн тынгарар арганы бээрге, ол дүрзү чугаалаар база аңаа мөгейбээн хамык улусту өлүрүп шиидерин дужаар харыктыг апарды ^p. 16 Ийиги араатан бүгү улусту: улуг, бичии, бай, ядыы, хостуг, кул деп ылгал чокка, оң холунга азы хаваанга таңма бастыртып, демдектедиринче албадай берди. 17 Ындыг демдек чок кижи чүнү-даа садып аар азы садар эрге чок турган. А ол демдек дээрге араатанның ады азы ол атты көргүскен сан болур. 18 Борта мерген угаан херек. Угаанныг кым-даа болза араатанның санын санап үндүрүп шыдаар, чүге дээрге ол сан кижи амытанның адынга дүгжүр ^{▼▼ Азы: «Ол сан кижи төрелгетенни символчудуп көргүзүп турар».} 666 деп сан болур.