Rev 14 | TyvTUV | STEP | Мен оон көөрүмге, Сион дагда Хураган турду . Хураганның болгаш Ооң Адазының адын хавактарында бижип демдектээн 144 000 кижи Хураган-биле кады турар болду.

‏ Revelation of John 14

Хураган болгаш камгалал

1 Мен оон көөрүмге, Сион дагда Хураган турду ^a. Хураганның болгаш Ооң Адазының адын хавактарында бижип демдектээн 144 000 кижи ^b Хураган-биле кады турар болду. 2 Шапкын агым сугнуң коолааны ^c, диңмирээшкинниң диңмирээни азы хөгжүмчүлерниң чадаганнарга ойнаан аялгазы дег, дээрден дыңналган үннү дыңнап кагдым ^d. 3 Дүжүлгениң баарынга, дөрт дириг амытан болгаш ирейлерниң мурнунга улус чаа ырны ырлажы берди ^e. Ол ырны чүгле черниң улузундан адыргаш, хостап каан 144 000 кижи өөренип ап шыдаар турган. 4 Олар дээрге херээжен кижиге дээп көрбээн ^f, боттарын арыг хевээр кадагалап арттырып алган улус-тур. Олар дээрге, Хураган кайнаар-даа баар болза, Ону эдерер улус-тур. Оларны бүгү кижи төрелгетенниң иштинден адыргаш, хостап каан; Бурганга база Хураганга өргүп салган баштайгы дүжүт дег улус ол-дур ^g. 5 Оларның аксы меге сөстү кажан-даа этпээн, оларда кемниг, бужар чүү-даа чок ^h.

Дээрниң үш төлээзи

6 Мен оон Бурганның шаары дээрде ужуп чоруур база бир төлээзин көрүп кагдым. Ол төлээ чер кырында чурттаан бүгү улуска: янзы-бүрү дылдарлыг сөөк-язы, аймак-чон бүгүдезинге медеглээр дээни мөңге Буянныг Медээлиг болду. 7 Ол ыыткыр мынча диди: «Бургандан коргуп, Ону алдаржыдып мактаңар, чүге дээрге Ооң шииткелиниң үе-шагы келген-дир. Дээрниң, черниң, далайның болгаш суг баштарының Чаяакчызынга мөгейиңер!»

8 Дээрниң ол төлээзиниң соондан ийигизи эдерип: «Ол буурады! Өндүр улуг Вавилон буурады! Хамык чоннарны ооң арагазын – ооң самыыралының ажыг арагазын ижеринче албадапкан турган хоорай буурады! ⁱ» – деп бар чытты.

9 Дээрниң баштайгы ийи төлээзиниң соондан үшкүзү эдерип, ыыткыр мынча деп чорду: «Араатанга азы ооң дүрзүзүнге кажан-бир шагда мөгеер база хаваанга азы холунга ооң таңмазын бастыртып алыр кижи ^j 10 Бурганның килеңиниң дашказынче куткан Ооң хорадаан сагыжының чалаң арагазын ижер ^k. Ындыг кижини дээрниң ыдыктыг төлээлериниң база Хураганның мурнунга отка кыпкан күгүрге хилинчектээр ^l. 11 Оларны хинчектээн оттуң ыжы кезээ мөңгеде өрү көдүрлүр ^m, ынчангаш араатанга азы ооң дүрзүзүнге мөгейген база ооң ады-биле демдектеткен улуска хүндүс-даа, дүне-даа амыр-дыш турбас».

12 Ийе, Бурганның улузундан – Бурганның айтыышкыннарын сагыыр болгаш Иисуска бүзүрээр бүгү улустан шыдамык чорук негеттинер ⁿ.

13 Мен ынчан дээрден мынча дээн үннү дыңнап кагдым: «Мону бижип каг: амдан эгелээш, Дээрги-Чаяакчыга бараан болуп тура, өлген улус – амыр-чыргалдыг ^o. Сүлде мынча деп турар: „Олар ам боттарының аар-берге ажыл-херектеринден дыштанып ап болур, а ажыл-херектери оларны эдерер-дир“».

Черниң ханныг дүжүдү

14 Мен оон көөрүмге, мурнумда ак булут тур. Ында кижи амытан оглу ышкаш Кижи ^p саадап олур, Ооң бажында алдын оваадай, а холунда чидиг хол кадыыры бар болду. 15 Ооң соонда Бурганның өргээзинден дээрниң өске төлээзи үнүп келгеш, булутта саадаан Кижиже: «Хол кадыырын туткаш, кес-ле, чүге дээрге черде дүжүт быжып, ажаалда үези келген-дир» – деп алгырды ^q. 16 Оон булутта саадаан Кижи хол кадыырын черже карбаш кылгаш, черниң дүжүдүн ажаап каапты ^r.

17 Оон Бурганның дээрде өргээзинден өске бир төлээзи үнүп келди. Ол база холунда чидиг хол кадыырлыг болду. 18 Ооң соонда өргүл салыр бедигээштен отту чагырар эргелиг база бир төлээ үнүп келди. Ол чидиг хол кадыырлыг төлээге: «Хол кадыырың туткаш, черниң виноград шөлүнде салбактарны кес-ле, чүге дээрге виноград быжа берген-дир» – деп ыыткыр алгырды. 19 – 20 Дээрниң төлээзи хол кадыырын черже карбаш кылгаш, виноградты ажаагаш, ону хоорай даштында чулук сы базар оңгарже октапты. Виноградты, Бурганның өндүр улуг килеңин көргүзүп, сы базып кааптарга ^s, оортан хемгилештир агып баткан хан аът бажы-биле деңнештир тереңнеп, 1600 стадий ^{▼▼ 1600 стадий – амгы үениң хемчээли-биле 300 километр хире узуну.} черже ага берди.