Rev 15 | TyvTUV | STEP | Мен ооң соонда дээрге база бир өндүр улуг болгаш кайгамчык демдекти көрүп кагдым: чеди халап эдилээн дээрниң чеди төлээзи аңаа көзүлдү . Ол чеди халап халаптарның сөөлгүлери болду, чүге дээрге Бурганның килеңи ооң-биле төнер чүве-дир.

‏ Revelation of John 15

Сөөлгү чеди халап

1 Мен ооң соонда дээрге база бир өндүр улуг болгаш кайгамчык демдекти көрүп кагдым: чеди халап эдилээн дээрниң чеди төлээзи аңаа көзүлдү ^a. Ол чеди халап халаптарның сөөлгүлери болду, чүге дээрге Бурганның килеңи ооң-биле төнер чүве-дир.

2 Мен оон от-биле холушкан шилдең далайга дөмей бир чүве көрдүм ^b, а ол ышкаш тиилекчилерни – араатанны, ооң дүрзүзүн база ооң сан-адын тиилээн улусту көрдүм ^c. Олар Бурганның берген чадаганнарын тудуп алгаш, шилдең далай чанынга туруп алгаш, 3 Бурганның чалчазы Моисейниң ырын ^d база Хураганның ырын ырлажып турдулар:

«Бүрүн Күчүлүг Дээрги-Бурган-Чаяакчы,
Сээң ажыл-херээң өндүр улуг, кайгамчык-тыр! ^e
Сээң оруктарың чөптүг болгаш алыс шынныг-дыр, бүгү чоннарның Хааны! ^{▼▼ Өске бурунгу сөзүглелдерде «Ыдыктыг улустуң Хааны» деп бижээн.}
4 Сенден кортпас кижи бар бе, о, Дээрги-Чаяакчы? ^g
Сээң адыңны алдаржытпас кижи тыптыр бе? Чүгле Сен ыдыктыг сен!
Хамык чоннар Сеңээ кээп мөгеерлер ^h,
чүге дээрге Сээң чөптүг ажыл-херээңни шупту улус көрүп турар».

5 Мен ооң соонда дээрде Бурганның өргээзиниң – херечилелдиң майгынының – ажыттына бергенин көрүп кагдым ⁱ. 6 Оон Бурганның өргээзинден сөөлгү чеди халапты эдилээн дээрниң чеди төлээзи үнүп келди. Олар чайынналчак ак арыг лён хеп кедип алган, хөректеринде алдын кожаалар ^j куржанган болду. 7 Дөрт дириг амытанның бирээзи ^k ынчан мөңге дириг Бурганның килеңи долган чеди алдын саваны дээрниң ол төлээлеринге үлеп берди. 8 Бурганның өндүр чырыының болгаш күчү-күжүнүң ыжы Ооң өргээзин бүргей апкан ^l, дээрниң чеди төлээзиниң эккелгени чеди халап төнмээн шаанда, Бурганның өргээзинче кым-даа кирип шыдаваан.