Rev 16 | TyvTUV | STEP | Мен оон Бурганның өргээзинден үнген ыыткыр үннү дыңнап кагдым. Үн дээрниң чеди төлээзинге : «Баргаш, Бурганның килеңи долган чеди саваны черже тө чажыптыңар!»

‏ Revelation of John 16

Бурганның килеңиниң чеди савазы

1 Мен оон Бурганның өргээзинден үнген ыыткыр үннү дыңнап кагдым. Үн дээрниң чеди төлээзинге ^a: «Баргаш, Бурганның килеңи долган чеди саваны черже тө чажыптыңар!» – диди ^b.

2 Бирги төлээ чоруткаш, савазының иштинде бар чүвени черже тө чажыпты. Араатанның таңмазы-биле демдектеткен, ооң дүрзүзүнге мөгейген улус ^c коргунчуг болгаш аарышкылыг оюлган балыгларлыг апарды ^d.

3 Ийиги төлээ савазының иштинде бар чүвени далайже тө чажыпты. Суг өлүг кижи ханы дег хан бооп хуула бээрге, далайда амылыг амытан артпады ^e.

4 Үшкү төлээ савазының иштинде бар чүвени хемнер болгаш суг баштарынче тө чажыптарга, олар хан бооп хуула бердилер ^f. 5 Дыңнаарымга, суг дээш харыылаар дээрниң төлээзи мынча деп чугаалады: «Ам бар, черле турган ^g Ыдыктыг Бурган, Сээң үндүрген шииткелиң чөптүг-дүр ^h. 6 Чүге дээрге кижилер Сээң улузуңнуң база медээчилериңниң ханын төккен-дир ⁱ. Ынчангаш Сен оларга ханны ижиртиптиң ^j. Олар чогуур кеземчени алды». 7 Мен оон өргүл салыр бедигээштен ^k: «Бүрүн Күчүлүг Дээрги-Бурган-Чаяакчы, Сээң шииткелдериң чөптүг болгаш алыс шынныг-дыр!» – дээн үннү дыңнап кагдым.

8 Дөрткү төлээ савазының иштинде бар чүвени хүнче тө чажыпты. Улусту от-биле оя чиртир эргени хүнге берген болду. 9 Оларны шыдажыр аргажок от өрттендир чип турду, а олар халаптарны чагырар эргелиг Бурганның адын одап, каргап турдулар. Олар боттарының бачыттарын миннип, Бурганче ээлбедилер база Ооң адын алдаржытпайн бардылар ^l.

10 Бешки төлээ савазының иштинде бар чүвени араатанның дүжүлгезинче ^m тө чажыптарга, ооң чагыргазы дүмбейже дүлнү берди ⁿ, а улус аарышкыдан дылдарын ызырып турду. 11 Олар аарышкызы болгаш балыг-бышкыны дээш, дээрде Бурганны одап, каргап турдулар, ынчалза-даа боттарының бачыттыг оруктарын кагбадылар.

12 Алдыгы төлээ савазының иштинде бар чүвени улуг Евфрат хемче ^o тө чажыпты. Чөөн чүктен кээр хааннарга орук ажыдып, хемниң суу кадып калды ^p. 13 Мен ынчан бөзүр пагаларга дөмей үш бук көрүп кагдым. Олар улунуң, араатанның болгаш меге медээчиниң ^q аксындан үнүп келдилер. 14 Ол буктар кайгамчык чүүлдерни кылыптар болдулар ^r. Олар чер-делегейниң хамык хааннарын эргий кезип, чаалажыры-биле чыып алыр дээш чоруптулар. Ол дээрге Бүрүн Күчүлүг Бурганның өндүр улуг шииткел хүнүнде боор дайын-чаага белеткел-дир.

15 «Дыңнаңар, Мен, оор дег, хенертен кээр мен ^s. Улус мурнунга бужартап, шалдаң үне халып келбес дээш ^t, хевин белеткеп алган, одуг чыдар кижи амыр-чыргалдыг».

16 Буктар хамык хааннарны еврей дылда Армагеддон ^{▼▼ Армагеддон – Мегиддон хоорай дужунда чер (4 Хаан. 9:27; 23:29 көр).} дээр черже чыып эккелдилер.

17 Оон дээрниң чедиги төлээзи савазының иштинде бар чүвени агаарже тө чажыпты. Бурганның өргээзинде ^{▼▼ Өске бурунгу сөзүглелдерде «өргээзинде» деп сөске «дээрде турар» деп сөстерни немээн.} дүжүлгеден ыыткыр үн дыңналып: «Боттанган-дыр!» – диди. 18 Ынчан чаңныктар кызаңнап, дааш дагжап, диңмирээшкин диңмирээш, коргунчуг чер шимчээшкини болду ^w. Кижини чаяаган үеден бээр чер ындыг күштүг шимчеп көрбээн! ^x Халаптыг-ла чер шимчээшкини! 19 Өндүр улуг хоорай үш кезекке чарлы берген база бүгү чурттарның хоорайлары буступ дүшкен. Бурган улуг Вавилон хоорайны бодап келгеш, Бодунуң савазындан килеңиниң арагазын аңаа ижиртипти ^y. 20 Хамык ортулуктар чиде берди, даглар артпады ^z. 21 Дээрден улусче бирээзи-ле бир талант деңзилиг долу ^{▼▼ Рим күрүне үезинде бир талант дөртен хире килограмм деңзилиг турган.} дүжерге ^ab, улус долу халавы дээш, Бурганны каргап турду, чүге дээрге ол халап шуут коргунчуг болган.