Rev 19 | TyvTUV | STEP | Меңээ ооң соонда дээрде турар мөөң чоннуң үннери ышкаш ыыт-шимээн дыңналды. Олар мынча деп ырлажып турду: «Бурганны алгап-мактаңар! Камгалал, алдар болгаш күчү-күш бистиң Бурганывыста!

‏ Revelation of John 19

Дээрде чоннуң Бурганны алгап-мактааны

1 Меңээ ооң соонда дээрде турар мөөң чоннуң үннери ышкаш ыыт-шимээн дыңналды. Олар мынча деп ырлажып турду:

«Бурганны алгап-мактаңар!
Камгалал, алдар болгаш күчү-күш бистиң Бурганывыста! ^a
2 Ооң шииткели шынныг болгаш чөптүг.
Бодунуң самыыралы-биле черни будаан
самыыраан херээженни Ол шиитти.
Бодунуң чалчаларының ханы дээш,
Бурган оон өжээн негеп, кезетти!» ^b

3 Олар база катап ырлажып үндү:

«Аллилуйя!
Өндүр улуг хоорайның ыжы кезээ мөңгеде
ооң кырынче көдүрлүр-даа ^c!»

4 Чээрби дөрт ирей болгаш дөрт дириг амытан ынчан доңгая кээп дүшкеш, дүжүлгеде саадаан Бурганга мөгейдилер ^d. Олар: «Аминь! Аллилуйя!» – деп кыйгырып турдулар.

Хураганның куда дою

5 Оон дүжүлгеден: «Бурганның хамык чалчалары, Ону алдаржыдыңар! Бургандан коргар улуг-биче улус дөгере Ону алдаржыдыңар!» – дээн үн дыңналды ^e. 6 Оон эңдерик улустуң үннеринге, шапкын агым сугнуң коолаанынга ^f база диңмирээшкинниң диңмирээринге дөмей ыыт-шимээнни дыңнап кагдым ^g. Олар мынча деп кыйгырып турду:

«Аллилуйя!
Бистиң Бүрүн Күчүлүг Дээрги-Чаяакчы-Бурганывыс
хааннай берген-дир! ^h
7 Өөрүп-хөглээли, Бурганны алдаржыдаалы!
Хураганның өгленир үези келген-дир.
Ооң душтуу ^{▼▼ Ооң душтуу – чаа Иерусалим хоорай азы христиан ниитилелди ойзу адааны ол.} бодун белеткеп алган-дыр ^j.
8 Аңаа арыг ак чайынналчак хепти кедирген-дир». (А ол хеп – Бурганның улузунуң чөптүг-шынныг ажыл-херээ-дир.) ^k

9 Дээрниң төлээзи оон меңээ мынча диди: «Бижи: куда доюнче чалалга алган улус амыр-чыргалдыг». Ол оон аңаа немей: «Бо дээрге Бурганның шынныг сөстери-дир» – диди.

10 Мен ооң буттарынче доңгая кээп дүжүп, мөгеер деп чыттым ^l, ынчалза-даа ол меңээ мынча диди: «Ынчанма, мен база-ла, сен дег, Иисусту шынныы-биле херечилээн акы-дуңмаларың дег, Бурганга бараан бооп чор мен. Бурганга мөгей!» (Иисусту шынныы-биле херечилээри – Бурганның медээчилерин сорук киирер чүве ол-дур.)

Ак аъттың Мунукчузу

11 Мен ажыттына берген дээрни ^m база ак аътты, ооң мунукчузун көрүп кагдым. Мунукчуну Бүзүрелдиг болгаш Шынныг деп адап каан, чүге дээрге Ол чөптүү-биле шиидип база дайылдажып турар. 12 Ооң караа – оттуң чалбыраажы-ла ⁿ, а бажында хөй оваадайлар кеткен. Ооң Бодундан өске кым-даа билбес атты Ында бижээн болду ^o. 13 Ол ханче суп, кызыткан шыва тон кеткен, а Ооң адын «Бурганның Сөзү» дээр ^p. 14 Дээрниң ак аъттар мунган база арыг ак чуга хептерлиг аг-шерии Ону эдерип бар чытты. 15 Ооң аксындан чидиг хылыш уштунуп орду ^q. Ол ооң-биле бүгү чоннарны кыргып-хыдыыр. Ол демир мерге-биле оларны башкарар ^r болгаш Бүрүн Күчүлүг Бурганның калчаалыг килеңин күүседип, улустуң оңгарга виноградтан арага үндүр сы базары дег, оларны чылча базар ^s. 16 Ооң дөңмээнде болгаш ак хевинде: «Хааннарның Хааны база дээргилерниң Дээргизи ^t» деп ат бижиттинген болду.

17 Мен оон шуут-ла хүн кырында турар дээрниң бир төлээзин көрүп кагдым. Ол шаары дээрде ушкан хамык куштарже ыыткыр алгырды: «Бээрлеңер! Бурганның өндүр улуг доюнче чыглыңар! ^u 18 Хааннарның, шериг баштыңчыларының, бо делегейниң күштүг улузунуң мага-бодун, аъттарның болгаш мунукчуларның мага-бодун, кулдар биле хостугларның, улуглар биле бичелерниң – шупту улустуң мага-бодун хөндеп чиңер!» ^v

19 Мен оон араатанны база черниң хааннарын аг-шерии-биле катай-хаара көрүп кагдым. Олар аъттыг Мунукчу-биле база Ооң аг-шерии-биле чаалажыр дээш, чыглып турдулар ^w. 20 Ынчалза-даа араатанны болгаш ооң өмүнээзинден кайгамчык чүүлдер кылып турган, араатанның таңмазы-биле демдектеттирген база ооң дүрзүзүнге мөгейген улусту дуурайлап келген меге медээчини ^x тудуп хоругдап кагды. Араатан биле меге медээчи күгүр кыпкан оттуг хөлче диригге киир октаттырыпканнар ^y. 21 Оларның аг-шерии аъттыг Мунукчунуң аксындан уштунуп органзыг көстүр хылышка ^z кыргыдып-хыдыдып алган. Хамык куштар оларның мага-боттарын хөндеп, мага хандыр дойлааннар.