Rev 20 | TyvTUV | STEP | Оон Бурганның дээрден бадып орар төлээзин көрүп кагдым. Ол холунда тамының дүлгүүрүн болгаш аар илчирбе тудуп алган болду .

1 Оон Бурганның дээрден бадып орар төлээзин көрүп кагдым. Ол холунда тамының дүлгүүрүн болгаш аар илчирбе тудуп алган болду ^a. 2 Ол төлээ улуну – эрлик база удурланыкчы болур шаандагы чыланны ^b – тудуп хоругдааш, ону илчирбе-биле муң чыл дургузунда кинчилеп кагды. 3 Дээрниң төлээзи улуну тамыже киир октааш ^c, үнер черин ^d хаггаш, таңмалап кагды. Ынчаар орта демги улу муң чыл төнмээнде, делегейниң чоннарын оон ыңай мегелээр харыы чок апарган. А ооң соонда ону үр эвес үеде хостаар ужурлуг.

4 Оон мен хөй дүжүлгелер көрдүм ^e. Ында саадааннарга шиидер эргени берген болду. Иисусту шынныы-биле херечилээн дээш база Бурганның медээзин суртаалдаан дээш, бажын кестиртип өлген улусту база көрдүм ^f. Олар араатанга-даа, ооң дүрзүзүнге-даа мөгейбээннер, ооң таңмазын хаваанга-даа, холунга-даа бастыртпааннар ^g. Оларга амы-тынны катап эгидип берген, ооң соонда олар Христос-биле кады муң чыл иштинде хааннааннар ^h. 5 Өлүглерниң бир дугаар катап дирилгени ол-дур. Арткан өлүг улуска муң чыл төнмээн шаанда, амы-тынны катап эгитпээн. 6 Баштайгы катап дирлиишкинге киржир улус амыр-чыргалдыг база Бурганның чонунга хамааржыр; ийиги өлүм оларны чагырар эрге чок ⁱ. Олар Бурганның база Христостуң бараалгакчылары болур ^j, Ооң-биле кады муң чыл дургузунда хааннаарлар.

Эрликтиң бастыртканы

7 Бир муң чыл эрткен соонда, эрликти кара-бажыңындан хостаптар. 8 Ол чер кырында тоо быдараан Гог биле Магогту ^k дуурайлап чоруп каар. Эрлик оларны чаалажыры-биле чыып аар ^l, олар далай эриинде элезин дег хөй болур. 9 Черниң чүк-чүгүнден сөктүп келгеш, олар Бурганның улузунуң турлаан база Ооң ынак хоорайын бүзээлептерлер. Ынчалза-даа дээрден от дүшкеш ^{▼▼ Өске бурунгу сөзүглелдерде «Дээрден от дүшкеш» деп сөстерге «Бургандан» деп сөстү немээн.}, оларның аг-шериин хуюкталдыр чиптер ⁿ. 10 Оларны дуурайлаан эрликти, ооң мурнунда араатан биле меге медээчини дег, кыпкан күгүр долган хөлче киир октаптар ^o. Олар аңаа дүн, хүн дивейн, кезээ мөңгеде хилинчек көөрлер.

Бурганның бо делегейниң чоннарын шииткени

11 Мен оон кончуг улуг ак дүжүлгени база ында саадаан Бурганны көрүп кагдым. Ооң түрлүг көрүжүнден дээр биле чер ис чок чиде берген ^p. 12 Мен ынчан дүжүлгениң мурнунда турар улуг, биче өлүг улусту көрүп кагдым. Ажып каан номнар база бар болду. Оон база бир номну – амыдыралдың номун – ажыдып кагды ^q. Өлүглерни оларның кылган херектерин барымдаалап ^r, номнарда оларның дугайында бижээнин ёзугаар шииткен. 13 Далай аңаа чораан өлүг улусту үндүр чалгыпкан. Өлүм болгаш Тамы боттарының өлүг улузун берипкен ^s. Оон оларның кижи бүрүзүн черге кылган херектерин барымдаалап шииткен. 14 А оон Өлүм биле Тамыны оттуг хөлче киир октапкан. Ол оттуг хөл ийиги өлүм болган. 15 Амыдыралдың номунче адын киир биживээн кижи бүрүзүн оттуг хөлче киир октапкан ^t.