Rev 21 | TyvTUV | STEP | Мен оон чаа дээрни болгаш чаа черни көрүп кагдым . Биеэги дээр болгаш биеэги чер чиде берген , далай база оон ыңай чок болду.

‏ Revelation of John 21

Чаа дээр болгаш чаа чер

1 Мен оон чаа дээрни болгаш чаа черни көрүп кагдым ^a. Биеэги дээр болгаш биеэги чер чиде берген ^b, далай база оон ыңай чок болду. 2 Мен ыдыктыг хоорайны, чаа Иерусалимни, база көрүп кагдым ^c. Ол дээрде Бургандан дүжүп орду база душтуу оолга бээри-биле белеткээн душтук кыс дег шиметтинген болду ^d. 3 Дээрде дүжүлгеден ыыткыр үн мынча дээнин дыңнадым: «Бурганның турар чери ам улус аразында доктаап турупкан-дыр. Бурган ам кижилер-биле кады чурттай бээр, Ол ам оларның Бурганы, а олар Ооң чону болур ^e. 4 Бурган кижилерниң караанда чаш бүрүзүн чодуп бээр ^f. Моон соңгаар өлүм-даа, ыы-сыы-даа, ажыг-шүжүг-даа, аарышкы-даа турбас, чүге дээрге бүгү эрги делегей чиде берген» ^g.

5 Дүжүлгеде саадаан Бурган ынчан меңээ: «Көр! Хамык чүвени чаартып тур мен!» – диди ^h. Ол ооң соонда: «Ону бижи, ол болза шынныг болгаш бүзүрелдиг сөстер-дир» – деп немеп кагды. 6 Ол ооң соонда меңээ мынча диди: «Боттанган-дыр! Мен Альфа болгаш Омега, эгези болгаш төнчүзү-дүр мен ⁱ. Кагып-суксаан кижиге амыдырал хайырлаар суг бажындан халаска ижиртир мен ^j. 7 Тиилээн кижи ^k бо бүгүнү Менден салгап аар ^l. Мен – ооң Бурганы, а ол – Мээң оглум болур ^m. 8 А кортуктар, шынчы эвестер, бужартааннар, өлүрүкчүлер, самыырааннар, караң көрнүрлер, дүрзү-бурганга мөгеерлер болгаш хамык мегечилер ⁿ боттарының хуу-салымын күгүр кыпкан оттуг хөлден тып аарлар ^o. Ийиги өлүм ол-дур ^p».

Чаа Иерусалим

9 Сөөлгү чеди халап-биле долдурган чеди савалыг дээрниң чеди төлээзиниң бирээзи ^q меңээ чедип келгеш: «Дуу ынаар бараалы, мен сеңээ Хураганга кадай боор душтукту көргүзейн» – деп чугаалады. 10 Сүлде мени башкара берген болгаш, дээрниң төлээзи мени кадыр бедик дагның бажынче аппарды ^r. Ол меңээ дээрде Бургандан дүжүп орар ыдыктыг хоорай Иерусалимни көргүстү. 11 Хоорай Бурганның өндүр чырыы-биле бүргеттинген турган ^s. Ол өттүр көстүр арыг яшма деп эртине даш ышкаш чырып турду. 12 Ону долгандыр он ийи хаалгалыг улуг бедик хана бар, а хаалгалар чанында дээрниң он ийи төлээзи турар. Хаалгаларда Израильдиң он ийи аймааның аттарын бижээн. 13 Чүк бүрүзүнде үш-үш: чөөн чүкте – үш, соңгу чүкте – үш, мурнуу чүкте – үш, барыын чүкте – үш хаалга бар ^t. 14 Хоорайның ханаларын он ийи даш тавак кырында туткан база Хураганның он ийи элчининиң аттарын даш санай бижээн ^u.

15 Мээң-биле чугаалажып турган дээрниң төлээзи хоорайны, ооң хаалгаларын болгаш ханазын хемчээринге херек алдын мергелиг болду ^v. 16 Хоорайны дөрбелчинней туткан, а ооң дооразы узунунга кезе дең ^w. Дээрниң төлээзи мергези-биле ону хемчээрге, ооң узуну 12 000 стадий болду ^{▼▼ 12 000 стадий – амгы үениң хемчээли-биле 2200 хире километр.}. А дооразы болгаш бедии узунунга кезе дең. 17 Дээрниң төлээзи оон хананы хемчээрге, ооң ажыглааны кижи хемчээлин ёзугаар, хана 144 кыры дурту кылын болду. 18 Хананы яшма деп эртине даштан, а хоорайның бодун арыы кылагар шил ышкаш алдындан туткан. 19 Хоорай ханазының турар даш тавактарын янзы-бүрү үнелиг эртине даштар-биле каастаан ^y: биргизин – яшма-биле, ийигизин – сапфир-биле, үшкүзүн – халцедон-биле, дөрткүзүн – изумруд-биле, 20 бешкизин – оникс-биле, алдыгызын – сердолик-биле, чедигизин – хризолит-биле, сескизин – берилл-биле, тоскузун – топаз-биле, онгузун – хризопраз-биле, он биргизин – гиацинт-биле, он ийигизин – аметист-биле. 21 Он ийи хаалга он ийи борбак ак шуру болур: бир хаалганы-ла бир борбак ак шурудан кылган. Хоорайның кудумчуларын арыы кылагар шил ышкаш алдын-биле дөжей салган.

22 Хоорайда Бурганның өргээзин көрбедим, чүге дээрге ында Бурганның өргээзи – Бүрүн Күчүлүг Дээрги-Бурган-Чаяакчы биле Хураган олар боттары болур ^z. 23 Хоорайга хүннүң-даа, айның-даа херээ чок, ону Бурганның өндүр чайынналчаа чырыдып турар, а Хураган – ооң чырыткызы-дыр ^aa. 24 Бүгү делегейниң чоннары Ооң чырыының адаанга чурттаар база черниң хааннары боттарының бай-байлаан ол хоорайже эккээр ^ab. 25 Хоорай хаалгаларын хүндүс кажан-даа хагбас, чүге дээрге дүн орта черле дүшпес ^ac. 26 Чоннарның бай-байлаа болгаш эртинелерин ынаар эккээр. 27 Хоорайже чүдек-бужар чүү-даа кирбес, ыянчыг чүүлдер үүлгедикчилери азы мегечилер кирбес ^ad, чүгле Хураганда бар амыдыралдың номунда аттарын бижээн улус кирер ^ae.