Rev 22 | TyvTUV | STEP | Дээрниң төлээзи оон меңээ амыдырал хайырлаар суглуг хемни көргүстү. Кристалл дег шилдең арыг хем Бурганның база Хураганның дүжүлгезинден үндүр аккан турган .

‏ Revelation of John 22

Амыдырал хайырлаар суглуг хем

1 Дээрниң төлээзи оон меңээ амыдырал хайырлаар суглуг хемни көргүстү. Кристалл дег шилдең арыг хем Бурганның база Хураганның дүжүлгезинден үндүр аккан турган ^a. 2 Ол хем хоорайның улуг кудумчузунуң ортузу-биле агып бадып чытты. Хемниң ийи эриинде амыдыралдың ыяжы үнген ^b. Ол айда-ла бир катап, чылда он ийи удаа дүжүдүн бээр. Ооң бүрүлерин бүгү чоннарның кадыкшылын эгидеринге хереглээр. 3 Бурганның каргыжы четкен чүү-даа чүве ол хоорайга артпас. Аңаа Бурганның болгаш Хураганның дүжүлгези турар. Ооң чалчалары Аңаа бараан болуп тура, 4 Ооң арын-шырайын көрүп каар ^c, Бурганның адын оларның хавактарынга бижээн болур ^d. 5 Моон соңгаар орта дүн дүшпес. Оларга чырыткыларның азы хүн чырыының херээ чок, Дээрги-Бурган-Чаяакчы оларның чырыы боор ^e, олар кезээ мөңгеде хааннаар.

Иисустуң чедип кээри

6 Дээрниң төлээзи меңээ мынча диди: «Бо дээрге шынныг болгаш бүзүрелдиг сөстер-дир. Медээчилерниң угаан-медерелин башкарган Дээрги-Бурган-Чаяакчы удавас болур чүүлдү Ооң чалчаларынга көргүссүн дээш, Бодунуң төлээзин чоруткан» ^f.

7 «Дыңна, Мен удавайн чедип кээр мен! ^g Бо номда бижээн, өттүр билип медеглээн сөстерни сагыыр кижи амыр-чыргалдыг» ^h.

8 Ол бүгүнү дыңнап, көрген кижи – Иоанн мен мен. Бүгүдени дыңнап, көрүп дооскаш, ону меңээ көргүскен дээрниң төлээзиниң баарынче доңгая кээп дүжүп, аңаа мөгеер деп бардым ⁱ. 9 Ынчалза-даа ол меңээ: «Ынчанмайн көр. Мен база сен дег, сээң ха-дуңмаң медээчилер дег, бо номда бижээн сөстерни сагып чоруур хамык улус дег, шак ындыг бараан болган чалча-дыр мен. Меңээ эвес, Бурганга мөгей!» – дээн.

10 Ол меңээ чугаалаан чүвезинге немей: «Сен бо номнуң өттүр билип медеглээн сөстерин чажырып, таңмалава ^j. Ол бүгү боттаныр үе чоокшулаан-дыр ^k. 11 Каржы, бак чүүлдер кылып чоруур кижи оозун уламчылазын, чүдек-бужар улус хирге улам борашсын ^l. А чөптүг-шынныг чурттап чоруурлар ынчалдыр чурттазыннар-ла. Ыдыктыг улус ыдыктыг хевээр артсын» – дээн.

12 «Дыңна! Удавас чедип келгеш, шаңналды Бодум эккээр мен ^m. Кижи бүрүзүнге ооң кылганын барымдаалап бээр мен ⁿ. 13 Мен Альфа болгаш Омега, биргизи болгаш сөөлгүзү, эгези болгаш төнчүзү мен ^o.

14 Амыдыралдың ыяжындан чимис чиир база хоорайже хаалга дамчыштыр кирер эрге алыр дээш, идик-хевин аштап-чуп алган улус ^{▼▼ Өске бурунгу сөзүглелдерде «Идик-хевин аштап-чуп алган улус» эвес, а «Ооң айтыышкыннарын сагып турар улус» деп бижээн.} амыр-чыргалдыг ^q. 15 А хоорай даштынга бужартап будалганнар, караң көрнүрлер, самыырааннар, өлүрүкчүлер, дүрзү-бурганга чүдүүрлер болгаш мегеге ынакшып, ооң аайы-биле кылып турар улус ^r артып каарлар.

16 Мен, Иисус, бо бүгүнү христиан ниитилелдерге херечилезин дээш, дээрден төлээмни чоруттум. Мен дээрге Давидтиң Дазылы база үре-салгалы мен ^s, эртенги чырык шолбан мен ^t.

17 Сүлде-даа, душтук кыс-даа ^u: „Чедип кел!“– деп чугаалап тур. Ону дыңнап турар кижи база: „Чедип кел!“– дизин. Суксаан кижи база чедип келзин. Күзээн-не кижи бо халас белекти – амыдырал хайырлаар сугну дозуп алзын» ^v.

18 Иоанн мен бо номнуң өттүр билип медеглээн сөстерин дыңнап турар кижи бүрүзүнге сагындырып тур мен: бо сөстерге бир-ле чүве немээр кижи тыптып келзе ^w, Бурган олче бо номда бижээн хамык хай-халапты салыптар. 19 А бо номнуң өттүр билип медеглээн сөстеринден бир чүве кааптар кижи тыптып келзе, Бурган ооң амыдыралдың ыяжындан чемненир үлүүн-даа ^{▼▼ Чамдык эң сөөлзүредир грек болгаш латин сөзүглелдерде «Амыдыралдың ыяжындан чемненир» эвес, а «Амыдыралдың номунга кирер» деп бижээн.}, бо номда бижээн ыдыктыг хоорайга чурттаар үлүүн-даа казып кааптар.

20 Кым бо бүгүнү херечилээнил, Ол: «Ийе, Мен удавас чедип кээр мен» – деп тур.

Аминь! Дээрги Иисус, чедип келем! ^y

21 Дээрги Иисустуң авыралы силер бүгүдеге доктаазын ^{▼▼ Өске бурунгу сөзүглелдерде бо шүлүк «Аминь» деп сөс-биле төнген.}.