Rom 10 | TyvTUV | STEP | Ха-дуңма, иудейлер камгалалды алзын деп сеткилим ханызындан күзеп, ол дээш Бурганга мөргүп чор мен.

‏ Romans 10

1 Ха-дуңма, иудейлер камгалалды алзын деп сеткилим ханызындан күзеп, ол дээш Бурганга мөргүп чор мен. 2 Олар Бурганның күзел-соруун күүседир дээш, аажок кызып чоруур ^a, ынчалза-даа ханы билиг чок улус чүве деп, оларга херечи боор мен. 3 Ынчангаш олар, улусту агартыры-биле Бурган кандыг орук шилип алганын билбезиниң хараазында, боттарының оруун изеп аарынче чүткүткеш, Бурганның саналдаан агартыышкынынга ^b чагыртпайн барганнар. 4 Чүге дээрге Христос – ыдыктыг хоойлунуң эчис сорулгазы боор ^c, Аңаа бүзүрээн кижи бүрүзү Бурганның мурнунга актыг боор ^d.

Камгалалды кижи бүрүзү ап боор

5 Ыдыктыг хоойлу дамчыштыр кээр агартыышкын дугайында Моисей мынча деп бижээн: «Ыдыктыг хоойлунуң дүрүмнерин сагыыр кижи оларның ачызында амылыг артар» ^e. 6 А бүзүрелден кээр агартыышкын дугайында Бижилге мынча деп турар: «„Дээрже кым өрү көдүрлүрүл?“– деп бодуңдан айтыртынма» ^f (мында Христосту черже бадырып кээри-биле дээн утка бар). 7 «„Дүп чок тамыже ^g кым дүжүп бадарыл?“– деп база айтыртынма» (мында Христосту өлүглер аразындан өрү үндүрүп кээри-биле дээн утка бар). 8 А Бижилге мынча деп турар: «Медээ сеңээ чоок – аксы-дылың биле чүрээңде» ^h (бистиң суртаалдап турарывыс бүзүрел дугайында медээ ол-дур). 9 Ол медээ бо-дур: Иисус – Дээргивис дээрзин аксың-биле хүлээп көрүп ⁱ, чугаалаар болзуңза база Бурган Ону өлүглер аразындан катап диргискен деп чүрээңге бүзүрээр болзуңза, камгалалды алыр сен ^j. 10 Чүге дээрге чүрээ-биле бүзүрээр кижи – агартыышкынны алыр, бүзүрээнин ажыы-биле чугаалаар кижи – камгалалды алыр. 11 Бижилге чугаалап турар: «Аңаа бүзүрээн кижи бүрүзү бак атка кирбес» ^k.

12 Иудей биле өске чоннар кижизиниң аразында ылгал чок. Ону кыйгырган улустуң шуптузунга экииргек чаңгыс-ла Дээрги-Чаяакчы бүгү улустуң Дээргизи боор ^l. 13 Чүге дээрге Дээрги-Чаяакчының адын кыйгырган кижи бүрүзү камгалал алыр ^m.

Бүзүрел чогу дээш, израиль чон бүрүн харыысалгалыг

14 Ынчаарга Дээрги-Чаяакчыга бүзүревээн улус Ону канчап кыйгырарыл? Ооң дугайында дыңнаваан болза, Аңаа канчап бүзүрээрил? Суртаалдап турар кижи чок болза, канчап дыңнап каарыл? ⁿ 15 Суртаалдаары-биле айбылатпаан болза, канчап суртаалдаарыл? Бижилгеде мынчаар бижээн: «Буянныг Медээни тарадып турар улустуң базымнарының даажы кайгамчык-тыр!» ^o

16 Ынчалза-даа Буянныг Медээни улус шупту хүлээп албаан. Исайя мынча деп турар: «Дээрги-Чаяакчы, бистен дыңнаан медээзинге кым бүзүрээнил?» ^p 17 Ынчангаш бүзүрел Буянныг Медээни дыңнап турар улуска чедип кээр-дир ^q. А Буянныг Медээ Христос дугайында суртаал дамчыштыр чедип кээр. 18 А мен айтырып тур мен: кай, олар дыңнаваан бе? Дыңнаан болбайн канчаар! Чүге дээрге Бижилгеде мынча дээн болгай:

«Бүгү чер-делегейге оларның ^{▼▼ Бо сөстерни оон алган ыдыктыг ырда «олар» – дээрниң сылдыстары болуп турар. Павел мында оларның Бурган дугайында херечилелин элчиннерниң суртаалдап турары Христос дугайында херечилел-биле деңнеп турар.} үн-чугаазы дыңналып эрткен,
оларның сөстери өртемчейниң кыдыгларынга чеде берген» ^s.

19 База катап айтырып тур мен: таанда израиль чон ону билбээн бе? Баштай Бурган Моисейни дамчыштыр Израильге харыылаан-дыр:

«Чон дээр арга чок улус-биле силерниң хүннээчел сагыжыңар оттурар мен;
угаан-бодал чок чон-биле силерни анчыгзындырар мен» ^t.

20 Оон Исайяның дидим сөстерин дамчыштыр Бурган чугаалаан:

«Менче чүткүвээн улус Мени тып алган;
Мени айтырбаан улуска ажыттынган мен».

21 А Израиль дугайында Ол мынча дээн:

«Мен хүннү бадыр чагырга билбес болгаш дыңнавас чонче холум сунуп турдум» ^u.