Rom 13 | TyvTUV | STEP | Кижи бүрүзү үстүнден башкарган эрге-чагыргага чагыртып чорзун , чүге дээрге Бурганның доктаатпааны кандыг-даа эрге-чагырга чок. Бүгү-ле бар эрге-чагыргаларны Бурган доктааткан.

‏ Romans 13

Христианнар эрге-чагырга ээлээн улусту дыңнаар ужурлуг

1 Кижи бүрүзү үстүнден башкарган эрге-чагыргага чагыртып чорзун ^a, чүге дээрге Бурганның доктаатпааны кандыг-даа эрге-чагырга чок. Бүгү-ле бар эрге-чагыргаларны Бурган доктааткан. 2 Ынчангаш эрге-чагыргага удурланыр кым-даа бар болза, Бурганның доктаадып каан чүүлүнге удурланган кижи-дир ол. А ынчап турар кижи Ооң шииткелин бодунче халдадып алыр. 3 Эрге-чагырга ээлээннер буянныг эвес, а бузуттуг-бак херектер үүлгедип турар улуска коргунчуг. Эрге-чагыргадан кортпас деп бодазыңза, буян тарып амыдыра, ынчан оларның макталын дыңнаар сен. 4 Эрге-чагырга ээлээн кижи база Бурганның чалчазы боор, ол сээң чаагай чорууң дээш ажылдап чоруур. А бузут үүлгедип турар болзуңза, кичээн, чүге дээрге ол сеңээ кеземче онаар эргелиг ^b. Ол – Бурганның чалчазы-дыр база бузут үүлгеткен улуска хамаарыштыр Ооң шииткелин күүседир кижи-дир ^c. 5 Ындыг болганда, чүгле кеземчеден корткаш эвес, а арыг арын-нүүр ёзугаар база эрге-чагыргага чагыртыр херек.

6 Үндүрүгнү-даа төлеп турар ужуруңар ында, чүге дээрге эрге-чагырга ээлээннер Бурганга бараан бооп, чагырга ажылынга бүгү үезин үндүрүп турарлар. 7 Ынчангаш оларның шуптузунга чогуур чүвени бериңер ^d: кымга – үндүрүгнү, кымга – албан-үндүттү, кымга – хүндүткелди, кымга – алдар-хүндүнү ^e.

Ха-дуңмашкы ынакшыл дугайында

8 Бот-боттарыңарга ынакшылдың өрезинден аңгыда, кымга-даа, чүү-даа дээш, өрелиг бооп артпаңар ^f; өске кижиге ынак кижи ыдыктыг хоойлуну сагып турар ^g. 9 Чүге дээрге шупту айтыышкыннарның ^h: «Кады чурттаан эжиңге өскерилбе», «Кижи өлүрбе», «Оорлава», «Өске кижиниң чүвезин алыксава» база өскелериниң-даа алыс утказы «Чаныңда кижиге бодуңга бодуң дег ынак бол» дээн чаңгыс айтыышкында сиңген ⁱ. 10 Ынакшыл чаныңда кижиге хора халдатпас. Ынчангаш ынакшыл – бүгү ыдыктыг хоойлуну сагааны ол боор ^j.

Сөөлгү хүн чоокшулаан

11 Ам кандыг үеде амыдырап турарывысты билир болгаш, ол бүгүнү күүседиңер. Уйгудан оттур үе-шагыңар келген ^k, чаа-ла бүзүрээн турганывыска көөрде, камгалалывыс ам биске дыка чоок апарган. 12 Дүн барык төнүп, хүн үнер деп барган ^l. Ынчаарга дүмбейниң ажыл-херектерин ап октапкаш, чырыктың чепсээ-биле чепсеглениил ^m. 13 Хүннүң чырыынга дег, төлептиг амыдырап көрээли ⁿ: эмин эрттир хөглеп-дойлап база арагалавайн, самыырап база бирикшилдиң бужар хевири-биле бирикшишпейн, алгыжып-кырышпайн база адааргашпайн амыдыраалы. 14 Ооң орнунга Дээрги Иисус Христосту «кедип алыңар» ^o база бачыттыг бүдүжүңерниң туралаашкыннарының аайынче кирбеңер ^p.