Rom 14 | TyvTUV | STEP | Бүзүрели кошкак кижини хүлээп алыңар , ооң үзел-бодалдарының дугайында маргылдаа үндүрбеңер.

‏ Romans 14

Бот-боттарыңарны буруу шаппаңар

1 Бүзүрели кошкак кижини хүлээп алыңар ^a, ооң үзел-бодалдарының дугайында маргылдаа үндүрбеңер. 2 Бир кижи кандыг-даа чемни чип боор деп санаар, а оон өске, бүзүрели кошкак кижи чүгле ногаа аймаа чиир ^b. 3 Кандыг-даа чемни чип турар кижи чем бүрүзүн чивес кижини куду көрбезин ^c. Чем бүрүзүн чивес кижи база кандыг-даа чемни чип турар кижини буруу шаппазын. Чүге дээрге Бурган иелдириңерни хүлээп алган-дыр. 4 Өскениң чалчазын буруу шавар кандыг ындыг эргелиг сен? ^d Ол бут кырында турар бе азы кээп ушкан бе дээрзин ооң Ээзи боду шиитпирлезин. Ол дөмей-ле бут кырынга туруп кээр, чүге дээрге Дээрги-Чаяакчы ону тургузуптар эргелиг.

5 Кандыг-бир хүннү өске хүнден чугула деп санаар кижи туруп боор ^e. Өске кижиге ол хүннерде ылгал чок. Кижи бүрүзү бодунуң угаап билген аайы-биле кылгай аан. 6 Кандыг-бир хүннү онзалай көөр кижи ону Дээрги-Чаяакчыга алдар-хүндү болдуруп, ынчап турар, а шупту чемни чиир кижи ону Дээрги-Чаяакчыга алдар-хүндү болдуруп, чиир, чүге дээрге аъш-чем дээш, Бурганга өөрүп четтирер болгай ^f. Чем бүрүзүн чивес кижи Дээрги-Чаяакчыга алдар-хүндү болдуруп, чивезин, чүге дээрге ол база Бурганга өөрүп четтирер-дир ^g.

7 Бистиң кайывыс-даа чүгле боду дээш амыдыравас база чүгле боду дээш өлбес болгай ^h. 8 Амыдыраар болзувусса, Дээрги-Чаяакчы дээш амыдыраар бис ⁱ, өлүр болзувусса, база-ла Дээрги-Чаяакчы дээш өлүр бис. Амыдыраар-даа, өлүр-даа болзувусса, Дээрги-Чаяакчының улузу боор бис ^j. 9 Христос база ол сорулга-биле өлгеш, ооң соонда катап дирилген болгай. Ол өлүг-даа, дириг-даа улустуң Дээргизи болуксаан ^k.

10 А сен чүге бүзүрээн акыңны буруу шаап турар сен? ^l Азы сен? Чүге бүзүрээн дуңмаңны куду көрүп турар сен? Бис шупту Бурганның шииткелиниң мурнунга турар болгай бис ^m. 11 Бижилгеде мынча дээн болгай:

«Дириг Бодумнуң адым-биле даңгыраглап тур мен – деп,
Дээрги-Чаяакчы медеглээн ⁿ. –
Дискек бүрүзү Мээң мурнумга сөгүрүп олурар,
дыл бүрүзү Мени Бурган деп хүлээп көөр» ^o.

12 Ынчангаш бистиң аравыстан кижи бүрүзү Бурганның мурнунга боду дээш боду харыы тудар ^p.

Бот-боттарыңарны бачыт үүлгедиринче чыгаваңар

13 Ынчаарга бот-боттарывысты буруу шаварын соксадыылы ^q. Харын бүзүрээн ха-дуңмавысты тептигип кээп ужарынче азы күткүдүгге алзып аарынче чыгаар чүнү-даа кылбазын кичээнзивиссе эки. 14 Мен билир база Дээрги Иисуска башкартканым ачызында, ыяк бүзүрээр мен: алыс боду арыг эвес чүү-даа чүве чок ^r. Харын кижиниң арыг эвес деп санаар чүвези аңаа арыг эвес апаар. 15 Ынчалза-даа кандыг-бир чем чигеш, бүзүрээн ха-дуңмаңның сеткилин хомудадып турар болзуңза, ынакшылдың аайы-биле амыдыравайн турар-дыр сен. Ындыг болганда, Христостуң ол дээш өлгени ха-дуңмаңны чемиң ужун өлүмче чыгава ^s.

16 Бодуңарны эки деп бодаар чүвеңер бак атка кирбес кылдыр ап чоруңар. 17 Чүге дээрге Бурганның Чагыргазы – чиир чемге, ижер суксунга хамааржыр чүүлде эвес ^t, а Ыдыктыг Сүлдениң хайырлаары актыг-шынныг амыдырал, амыр-тайбың болгаш өөрүшкүде ^u. 18 Христоска ол бүгү-биле бараан болган кижи Бурганның сеткилинге кирер болгаш улустуң хүндүткелин чаалап алыр.

19 Ынчангаш биске амыр-тайбыңны база удур-дедир деткимчени эккээр чүүлдерже чүткүүр ужурлуг бис ^v. 20 Бурганның ажыл-херээн чем дээш бойлатпаңар. Кандыг-даа чем арыг ^w, ынчалза-даа чип турар чемиң бүзүрээн ха-дуңмаңны бачытче киирер болза, багай-дыр ^x. 21 Ха-дуңмаңны ооң-биле бачытче чыгап турар болзуңза, эът чивээни база эзиртир суксун ишпээни дээре ^{▼▼ Чамдык бүзүрээн улустуң эът чивес база арага ишпес чылдагааны – ол чем биле суксунну ооң мурнуу чарыында меге бурганнарга өргээн турган чадавас деп, оларның сезии боор (Дан. 1:8 көр).}.

22 Ол дугайында бүзүрээр чүвеңни чүгле иштиңде бодап чор, ону чүгле Бурган билир болзун. Үзел-бодалдарының аайы-биле бодун буруу шаппас кижи амыр-чыргалдыг боор. 23 А чип боор ирги мен бе деп чигзинзе-даа, чип турар кижи буруу шаптырар, чүге дээрге бүзүрелиниң аайы-биле кылбаан-дыр. А бүзүрелдиң аайы-биле кылбайн турар бүгү чүүл – бачыт боор ^{▼▼ Бо шүлүктүң соонда өске бурунгу сөзүглелдер 16-гы эгениң 25-27 шүлүктерин киирип турар.}.