Rom 16 | TyvTUV | STEP | Бүзүрээн кыс дуңмавыс, Кенхрея хоорайжыгашта христиан ниитилелдиң дузалакчызы Фива дээш дагдынып, ону силерге таныштырдым.

‏ Romans 16

Павелдиң байыр чедириишкиннери

1 Бүзүрээн кыс дуңмавыс, Кенхрея хоорайжыгашта ^a христиан ниитилелдиң дузалакчызы Фива дээш дагдынып, ону силерге таныштырдым. 2 Дээрги-Чаяакчыга башкарткаш, Бурганның улузунга чогууру дег, ону уткуп хүлээп алыңар ^b, ол силерге баргаш, чүнү хереглээр болдур, аңаа бүгү талалыг дуза кадыңар. Фива боду хөй улуска, оларның аразында меңээ, дуза кадып келген кижи.

3 Христос Иисуска башкарткаш, Аңаа бараан бооп келген өөрүм – Прискилла биле ооң ашаа Акилага байырым чедириңер ^c. 4 Олар мен дээш амы-тынын артынга каарынга белен турдулар. Оларга чүгле мен эвес, а өске чоннар улузунуң аразында христиан ниитилелдер база өөрүп четтирип турар. 5 Оларның бажыңында чыглып турар христианнарга база байырым чедириңер ^d.

Асиядан ^{▼▼ Өске бурунгу сөзүглелдерде «Асиядан» эвес, а «Ахайядан» деп бижээн.} Христоска эң баштай бүзүрээн ханы ынак эжим Эпенетке байыр. 6 Бис дээш, ол хире карак кызыл ажылдап келген Марияга байыр. 7 Мээң-биле кады хоругдал адаанга турган чаңгыс аймак төрелдерим Андроник биле Юнияга ^{▼▼ Өске бурунгу сөзүглелде «Юния» эвес, а «Юний» азы «Юлия» деп бижээн.} байыр. Олар элчиннер аразында ат-сураглыг апарган база Христоска мени мурнай бүзүрээн улус чүве. 8 Дээрги-Чаяакчының ачызында ханы ынак эжим Амплийге байыр. 9 Христоска башкарткаш, Аңаа бистиң-биле кады бараан бооп турар Урбанга болгаш ханы ынак эжим Стахийге байыр. 10 Христоска шынчызы шылгаттынган Апеллеске байыр. Аристовулдуң өг-бүлезинде улуска байыр. 11 Мээң чаңгыс аймак төрелим Иродионга байыр. Наркисстиң өг-бүлезинде Дээрги-Чаяакчыга бүзүрээн улуска байыр. 12 Дээрги-Чаяакчы дээш ажылдап келген Трифена биле Трифосага байыр. Дээрги-Чаяакчы дээш база хөй ажылдап келген ханы ынак дуңмам Персидага байыр. 13 Дээрги-Чаяакчының онзалап шилип алганы Руфуска ^g болгаш мээң база авам апарган ооң авазынга байыр. 14 Асинкритке, Флегонтуга, Эрмге, Патровка, Эрмийге база оларның-биле кады турар бүгү ха-дуңмага байыр. 15 Филологка, Юлияга, Нирей биле ооң кыс дуңмазынга, Олимпанга база олар-биле катай Бурганның бүгү улузунга байырым чедириңер. 16 Бот-боттарыңарга ыдыктыг ошкаашкын-биле байыр чедириңер ^h. Христоска бүзүрээннерниң бүгү ниитилелдери база силерге байыр чедирип турлар.

Сөөлгү кичээндириг

17 Ха-дуңма, силерден аажок дилеп тур мен: хүлээп алган өөредииңерге удур бооп: аңгылажыг үндүрүп, бүзүрелдиң оруунга моондак салып турар улустан кичээниңер ⁱ. Ындыг улус-биле харылзашпаңар ^j. 18 Чүге дээрге олар Дээргивис Христоска эвес, а боттарының күзээшкиннеринге бараан бооп турарлар. Олар авыяас-чашпаа болгаш каас-коя сөстери-биле бүзүрээчел кенен улусту дуурайлап кааптарлар ^k. 19 Силерниң Буянныг Медээге дыңнангыр чорууңар бүгү улуска билдине берген ^l, ынчангаш силер дээш, аажок өөрүп тур мен. Ындыг-даа болза, буянга хамаарыштыр мерген угаанныг, а бузутка хамаарыштыр чүве билбес бооруңарны күзеп тур мен. 20 Амыр-тайбыңның үнер дөзү боор Бурган ^m удавас эрликти буттарыңар адаанга бастырып кааптар ⁿ. Дээргивис Иисустуң авыралы силер-биле кады болзун.

Байыр чедириишкиннериниң уланчызы

21 Мээң кады ажылдап турар эжим Тимофей ^o болгаш чаңгыс аймак төрелдерим Луций, Иасон болгаш Сосипатр олар силерге байыр чедирип турлар.

22 (Павелдиң бижээчизи Тертий мен база, Дээрги-Чаяакчыга башкарткаш, силерге байыр чедирдим.)

23 – 24 Мени болгаш бүгү христиан ниитилелди бажыңында хүлээп ап турар хүндүлээчел ээ Гаий ^p база силерге байыр чедирип тур. Хоорайның акша-хөреңги кадагалакчызы Эраст биле бүзүрээн дуңмавыс Кварт олар база силерге байыр чедирди ^{▼▼ Өске бурунгу сөзүглелдерде бо сөстерге «Дээрги Иисус Христостуң авыралы силер бүгүде-биле кады болзун. Аминь» деп сөстерни немээн. Чамдык бурунгу сөзүглелдерде 25-27 шүлүктерниң туружу өске болуп, 14-кү эгениң төнчүзүнче кирген.}.

25 Мээң медеглээним Буянныг Медээни база Иисус Христос дугайында суртаалымны дамчыштыр силерни бүзүрелге быжыктырып шыдаар Бурганга алдар. Христостуң ол Буянныг Медээзи дээрге хамык үелерниң мурнундан бээр чажырып келген чажыт-тыр ^r, 26 а ам ону Бурганның медээчилериниң Бижилгелерин дамчыштыр, мөңге дириг Бурганның айтыышкыны-биле биске илереткен. Бүгү чоннар бүзүрезин база Бурганга чагыртсын дээш, ук чажыт оларга билдингир апарган ^s. 27 Дың чаңгыс мерген угаанныг Бурганга Иисус Христосту дамчыштыр кезээ мөңгеде алдар доктаазын! Аминь ^t.