Ruth 4
Садып алыышкын эргези Воозта
1А Вооз хоорайже кирер хаалга чанынга чеде бергеш, аңаа олуруп алган a. Ол өйде ооң дугайында чугаалап турган төрели бо эртип бар чыткан. Вооз ооң адын адап: «Бээр келем, тала, олурам!» – деп кый дээн. Демги кижи чедип келгеш, олуруп алган. 2Ынчан Вооз хоорайның улуг назылыгларындан он эр кижини кый деп алгаш: «Олуруп көрүңер» – деп оларга чугаалаан. Кырганнар олуруп алган. 3А Вооз төрелинге чугаалап-тыр: «Бистиң акывыс Элимелехтиң черин моав черден ээп чанып келген Ноемин садар деп барган-дыр. 4Ол дугайын хоорайның бо орар улуг назылыгларының мурнунга база мында олурар херечилерниң мурнунга сеңээ дыңнадып тур мен. Бир эвес садып алырын күзезиңзе, садып ал, а бир эвес садып албас болзуңза, ойталааның дугайында чугаала, мен ону билип алыйн. Сенден аңгы кым-даа бир дугаарында садып албас ужурлуг, а дараазында ээлчегде мен бар-дыр мен b». «Садып алыр мен» – деп, ол кижи харыылаан. 5Ынчан Вооз: «Бир эвес сен Ноеминден черни садып алыр апарзыңза, калган төрелиңниң үре-салгалы үзүлбезин дээш, ооң моав кадайы Руфту база кадай кылып алыр апаар сен c» – дээн. 6А демгизи: «Бодумнуң ажы-төлүмге өнчү чедишпейн баар ирги бе деп сезингеш, Руфту алырындан ойталап тур мен. Мээң бо эргемни сен-не харын ажыглап көр, чүге дээрге мен ону ажыглап шыдавас-тыр мен» – деп чугаалаан. 7(Ол үе-шагда израиль чонга садыглажыышкын болгаш орнажыышкынга хамаарышкан айтырыгны быжыглаарда, ооң киржикчилериниң бирээзи идиин ужулгаш d, өскезинге тутсур ужурлуг турган. Дугуржулга күштүг деп Израильге шак ынчаар бадыткаттынар чүве-дир.) 8Ынчангаш Воозка садып алыышкын эргезин дүжүп берип тура, ол кижи идиин уштуп сунган. 9А Вооз аңаа олурган улуг назылыгларга болгаш бүгү чонга чугаалаан: «Көрдүңер бе, силер ам Элимелехтиң бүгү хуу өнчүзүн болгаш Хилеон биле Махлоннуң бүгү хуу өнчүзүн Ноеминден ап турарымның херечилери силер. 10Ол ышкаш, Махлоннуң ат-сывын дөргүл-төрелиниң, ха-дуңмазының аразынга уламчылаары-биле, ооң үре-салгалын болгаш ат-сывын бо черге арттырары-биле e, ооң ээлел черин болгаш өнчү-хөреңгизин өске кижилер холунга киирбези-биле, моав херээжен Руфту кадай кылдыр ап тур мен. Силер ам ооң херечилери силер». 11«Ийе, бис ам – херечилер бис. Израиль чоннуң чаяакчылары – Рахил болгаш Лия оларга ышкаш f, бажыңың эргинин артап кирер кадайыңга Дээрги-Чаяакчы ачы-буянын хайырлазын, а сен Эфратка g бай-шыырак чуртта, Вифлеемге ат-сураглыг бол – деп, аңаа турган чон болгаш улуг назылыглар харыылаан. – 12Аныяк кадайыңның сеңээ божуп бээри, Дээрги-Чаяакчының хайырлаары үре-салгал, Иуда биле Фамарның оглу Фарестиң салгалы дег, өөр-өнер болзун h».Дээрги-Чаяакчының Ноеминге хайырлаан авыралы
13Ынчангаш Вооз Руфту бодунга кадай кылдыр ап алгаш, ооң-биле чоок холбажы берген. Дээрги-Чаяакчы Руфту иштелип-саатталы берген кылып каарга i, ол оол уруг божуп алган. 14Ноеминге херээженнер мынча деп турган: «Дээрги-Чаяакчыга алдар! Ол сени ам камгалакчы салгал чок арттырбаан-дыр, Израильге бо чаш төл алдаржызын. 15Ол сээң амыдыралыңга өөрүшкү-маңнайны эгидип, кыраан назыныңда сеңээ өмек-дөмек болур. А ону божуп берген сеңээ ынак кенниң Руф чеди оолдан-даа артык эки болгай j». 16А Ноемин ам хойнунга олуртур оолдуг болуп, ону ажаап-тежээп эгелээн болгаш бичии оолдуң кижизидикчизи апарган. 17Кожалары аңаа байыр чедирип, «Ноемин ам оолдуг болду» деп чугаалажып, бичии чашты Овид ▼▼ Овид – чалча дээн уткалыг. Мында, ол сөөлүнде барып кырган-авазы Ноеминниң дузалакчызы болур дээн утканы илередип турар.
деп адап кааннар. Ол оол Иессейниң адазы болгаш Давидтиң кырган-ачазы болган. Давид хаанның ук-ызыгууру
(1 Чыл. 2:4-15; Мф. 1:3-6)
18Фарестиң l үре-салгалының даңзызы бо-дур: Фарестен Хецрон төрүттүнген. 19Хецрондан Рам, Рамдан Аминадав төрүттүнген. 20Аминадавтан Наассон m, Наассондан Салмон төрүттүнген. 21Салмондан Вооз, Воозтан Овид төрүттүнген. 22Овидтен Иессей, Иессейден Давид төрүттүнген.
Copyright information for
TyvTUV