Rut 1 | TyvTUV | STEP | Израильди баштыңчылар чагырып турган өйде бо бүгү болган . Иудея черге аш-чут эгелей бээрге, Вифлеем хоорайдан бир кижи кадайы болгаш ийи оглу-биле моав черге чурттаар дээш чорупкан.

‏ Ruth 1

Хары черге өскүссүрел

1 Израильди баштыңчылар чагырып турган өйде бо бүгү болган ^a.

Иудея черге аш-чут эгелей бээрге, Вифлеем хоорайдан бир кижи кадайы болгаш ийи оглу-биле моав черге чурттаар дээш чорупкан. 2 Ол кижини Элимелех, кадайын – Ноемин, оолдарын – Махлон болгаш Хилеон деп адаар турган, олар Иудеяның Вифлеемден келген эфраттар ^{▼▼ Эфраттар – Вифлеемге чурттап чораан бир төрел бөлүктүң ады (Э. д. 35:19; 1 Хаан. 17:12; 1 Чыл. 2:50-51 көр).} чүве-дир. Олар моав черге чедип келгеш, аңаа турумчуп алганнар. 3 Ноеминниң ашаа Элимелех ону ийи оглу-биле арттырып кааш, чок апарган. 4 Ооң соонда Ноеминниң оолдары бирээзин Орфа, а өскезин Руф деп адаар ийи моав уругну кадай кылдыр ап алгаш, аңаа он чыл хире чурттааннар. 5 Махлон болгаш Хилеон база чок апаарга, Ноемин ашаа-даа, оолдары-даа чок арткан. 6 Ол төрээн чуртунче чоруур деп шиитпирлеп алган, чүге дээрге Моавка чурттап тура, Дээрги-Чаяакчы Бодунуң чонун кээргеп, оларга ам-на дүжүт хайырлаанын дыңнап каан чүве-дир. А кенээттери база ону эдерип чорупканнар.

Руфтуң кунчуунга бердингени

7 Ынчангаш Ноемин кенээттери-биле кады чурттап турган черинден орукче дөгерингеш, Иудеяже дедир чорупкан.

8 Ноемин кенээттеринге: «Ада-иеңер бажыңынче чанып чоруптуңар. Меңээ болгаш калган оолдарымга энерел көргүскен болгай силер. Дээрги-Чаяакчы силерге база шак ындыг энерелдиг болзун. 9 Чер-чуртуңарга чаа ашактарга барып аар кылдыр, Ол силерже ээ көрүнзүн» – деп чугаалааш, оларны ошкап каан.

А кенээттери: 10 «Чок, бис силер-биле кады силерниң чонуңарже чоруур бис» – деп ыы-сыылыг чугаалап туруп бергеннер.

11 А Ноемин мынча дээн: «Чанып чоруптуңар, кыстарым. Мээң-биле чораан ажыы бар бе? Силерге ашак болу бээр кылдыр оолдар божуур харыым ам бар бе? ^{▼▼ Еврей чоннуң дүрүм-хоойлузун ёзугаар акызы чок апарган болза, ооң дуңмазы чаавазын кадай кылдыр ап алыр ужурлуг турган (Ы. х. к. 25:5 көр).} 12 Чанып чоруптуңар, кыстарым, барыңар че. Ийи дугаар ашакка баар хире эвес кыраан-дыр мен. Бир эвес меңээ божуп аар идегел турган-даа болза база бо дүне-ле ашаам-биле хонгаш, оолдар божуп алган-даа болзумза, 13 олар өзүп келгижеге чедир канчап манаар силер? Ашак чокка ындыг үр хинчектенип шыдаар силер бе? Чок, кыстарым, мээң салым-чолум силерниинден артык берге-дир. Дээрги-Чаяакчының холу меңээ удур-дур! ^d».

14 Олар катап-ла ыглап-сыктап эгелээннер. Орфа кунчуун ошкап кааш, чана берген, а Руф оон салдынмайн турупкан. 15 «Орфа кенним бодунуң чонунче болгаш бурганнарынче чорупту ^e. Сен база чанып чорувут» – деп, Ноемин чугаалаан.

16 А Руф мынча деп харыылаан: «Мени ойлатпайн көрүңер, дедир ээп чанар кылдыр негевейн көрүңер. Кайнаар-даа баар болзуңарза, мен силерни эдерер мен, а каяа одагланып хонар-дыр силер, мен база аңаа одагланып хонар мен. Силерниң чонуңар – мээң чонум, силерниң Бурганыңар – мээң Бурганым. 17 Силер каяа мөчүүр-дүр силер, мен база аңаа өлүр мен, ол черге мени база орнукшудуп кагзын ^f. Өлүмден өске чүве бисти чарар болза, Дээрги-Чаяакчы мени канчаар-даа кезеткей аан ^g».

18 Ооң-биле кады чоруур кылдыр Руфтуң быжыы-биле шиитпирлеп алганын көргеш, Ноемин ону көгүдерин соксап каан. 19 Олар оруун уламчылап чорупкаш, Вифлеемге чедип келгеннер.

Ажыг-човалаңныг ээп келиишкин

Хоорайга чедип кээрлери билек, ооң чурттакчылары хөлзеп эгелээннер, а хоорайда херээженнер: «Ойт, бо Ноемин-дир бе?!» – деп айтыржып турганнар.

20 А демгизи: «Мени Ноемин деп адаваңар, а Мара ^{▼▼ Ноемин – амданныг-чаагай дээн уткалыг ат, а Мара – ажыг-човалаң дээн уткалыг ат (Хост. 15:23 көр).} деп адаңар, Күчүлүг Бурган мээң салым-чолумну ажыг-човалаңныг, аар-берге кылдыр чаяаган. 21 Мен моон чоруурда, бай-шыдалдыг, чүм-даа бар турган болгай мен, а Ол мени ядыы-түреңги кылдыр дедир эккелди. Кажан Күчүлүг Дээрги-Чаяакчы меңээ кээргел көргүспээнде, Ол меңээ хора чедирип турда, мени Ноемин деп адаан херээ чүл?» – деп харыылаан. 22 Шак ынчаар Ноемин бодунуң моав кенни Руф-биле кады Моавтан төрээн чуртунче Вифлеемге хову-шөлде арбай ажаап эгелей берген үеде ⁱ ээп чедип келген.