Song of Solomon 4
Эргим кыстың чараш-каазы
Эр 1Кайгамчык-ла чараш-тыр сен, амыраам,кайгамчык-ла чараш-тыр сен.
Баш шывар пөзүң адаанда карактарың a көге-бугалар-ла b,
бажың дүгү – Галаад дагларындан c халчып баткан кодан өшкү-ле d.
2Сээң диштериң – чугган соонда чанып бар чыдар
кыргып каапкан хойлар-ла:
кайызы-даа ийистеп алган,
аразында чааскаан чорууру чок e.
3Эриннериң кызыл торгу кожаа ышкаш,
чугаа-сөзүң ээлдек-хоюг;
баш шывар пөзүң адаанда чаактарың –
гранат чимизиниң ийи чартыы-ла f.
4Сээң мойнуң Давидтиң бедидир туткан суургазы-ла,
муң-муң дозуг-камгалалды ында аскан –
олар шупту дайынчылар чепсектери.
5Ийи эмииң – ийи элик дег,
лилиялар аразында оъттап чоруур
чээрен аңның ийистери дег g.
6Эртенги хүн сырыннаваанда, хөлегелер көжүп чылбаанда h,
мирралыг дагже, ладанныг тейже i үне бергеш,
аңаа турайн!
7Амыраам, бүгү бодуң кайгамчык-ла чараш-тыр сен,
четпес чүве сенде чок-тур.
Ынакшылдың сесерлии
Эр 8Ливандан чедип келем, душтуум,Ливандан чедип келем!
Амана дагның бажындан, Сенир биле Эрмоннуң баштарындан j
дүжүп келем!
Арзылаңнар чыдынындан, ирбиштиг даглардан
дүжүп келем!
9Чүгле чаңгыс-ла көрүжүң-биле,
мойнуңда каасталгаңда чаңгыс-ла илчирбежигеш-биле
чүрээмни сен доңнап алдың, душтуум дуңмай k!
10Ынакшылың тааланчыын, душтуум дуңмай,
арагадан канчап-даа бол дээре-дир l.
Чагдынар үзүң чыды бүгү-ле чаагай чыттан эки-дир.
11Эриннериң – амданныг ары чигири m,
аксыңда – ары чигири биле сүт,
хевиңниң чыды Ливанның эзиминиң чаагай чыды-ла.
12Душтуум дуңмай – хааглыг сесерлик сен,
хааглыг сесерлик, дуглаглыг суг бажы сен!
13Сээң сесерлииңде эң эки үнүш:
гранат чимистери база хна биле нард n үнүштер үнген.
14Нард биле шафран, чигир кулузуну биле корица,
ладанның шупту хевирлери, мирра биле алоэ,
бүгү-ле эң чаагай чыттыг үнүштер-дир.
15Сесерликте суг бажы сен, агым суглар сен, кудук сен,
Ливандан агып баткан суглар сен o.
Кыс 16Соңгу чүктүң хады, оттуп кел,
мурнуу чүктүң хады, ужугуп кел!
Хат, мээң сесерлиимче хады-ла –
чаагай чыды тарай берзин.
Эргим эжим бодунуң сесерлиинче киргеш,
эң эки чимизин чип алзын p.
Copyright information for
TyvTUV