Tit 3 | TyvTUV | STEP | «Чагырыкчылар болгаш эрге-чагырга ээлээннерниң аайындан эртпейн , оларга чагыртыр база кандыг-даа буянныг херекти кылырынга кезээде белен болур ужурлуг силер» деп, бодуңнуң улузуңга сагындыр.

‏ Titus 3

Христианнарның бодун алдынары

1 «Чагырыкчылар болгаш эрге-чагырга ээлээннерниң аайындан эртпейн ^a, оларга чагыртыр база кандыг-даа буянныг херекти кылырынга кезээде белен болур ужурлуг силер» деп, бодуңнуң улузуңга сагындыр. 2 Оларны кымны-даа бак сөглевезинге, эп-найыралдыг ^b, ээлдек-эвилең, өске улус мурнунга биче сеткилдиг боорунга өөрет.

3 Чүге дээрге бис база кажан-бир шагда сарыыл чок, хай-чагырга билбес, шын оруктан азып-тенээн, янзы-бүрү күзээшкиннерниң болгаш таалалдарның кулу бооп чораан бис ^c. Бистиң чуртталгавысты өш биле адааргал бүргей ап, улуска көрдүрбейн-даа, бот-боттарывысты көөр хөңнүвүс чок-даа чордувус. 4 Ынчалза-даа Камгалакчывыс боор Бурганның улуска буянныы база ынакшылы ажыттынып келгенде, 5 боттарывыстың кылган эки ажыл-херээвис дээш эвес, а Бодунуң өршээлдии-биле Ол бисти камгалады ^d. Ыдыктыг Сүлде бисти арыглап чуггаш ^e, чаа амыдыралче катап төрүттүнер арганы биске хайырлады ^f. 6 Бистиң Камгалакчывыс Иисус Христосту дамчыштыр Бурган бисти Ыдыктыг Сүлде-биле сиңниктир бүргээн ^g. 7 Ынчангаш Бурганның авыралының ачызында ^h Ооң мурнунга агартырып алгаш, идегээнивис мөңге амыдыралды салгаар улус апардывыс ⁱ. 8 Бо дээрге ылап шынныг сөстер-дир ^j. Бурганга бүзүрей берген улус буянныг херектер кылырынга боттарын бүрүнү-биле бараалгатсын дээш ^k, ол бүгүнүң дугайында сагыш алындыр чугаалап чорууруңну күзеп тур мен. Ындыг боору – улуска эки болгаш ажыктыг.

9 Ынчалза-даа мугулай барымдаалардан, ук-ызыгуур дугайында чугаалардан, Моисейниң хоойлузунуң дугайында маргылдаалардан, аас былаажырындан чайлап чор, чүге дээрге оларның ажыы-даа, херээ-даа чок ^l. 10 Христиан ниитилелге аңгылажыг үндүрер кижини бир, ийи удаа сагындыргаш, олчаан ооң-биле харылзашпа ^m. 11 Ындыг кижиниң шуут-ла үрелгенин база ооң бачыттары бодунуң-на буруулуун көргүзүп турарын билип ал.

Түңнел сүмелер болгаш байыр чедириишкиннери

12 Сенче Артемни азы Тихикти ⁿ чорудуптарым билек, Никопольче меңээ чедип кээр дээш, бар шааң-биле кызыт, чүге дээрге мен аңаа кыштаарын шиитпирлеп алдым. 13 Ном-хоойлу тайылбырлакчызы Зинас база Аполлостуң ^o аян-чоруунуң үезинде оларга херек бүгү чүве бар болзун дээш, болдунар-ла хемчеглерни ап, дузалап көр. 14 Бистиң улузувус оларның амыдыралы үре-түңнел чок болбазын дээш ^p база улустуң эргежок чугула хереглелдерин хандырар дээш, буянныг херектер кылырынга чаңчыккан турар ужурлуг.

15 Мээң-биле кады турар хамык улус сеңээ байыр чедирип тур. Биске ынак бүзүрээннерге байырывыс чедир. Бурганның авыралы силер бүгүдеге доктаазын! ^{▼▼ Өске бурунгу сөзүглелдерде бо шүлүк «аминь» деп сөс-биле төнген.}