Zec 14 | TyvTUV | STEP | Дээрги-Чаяакчының хөделип үнер хүнү кел чыдыр . Иерусалим, дайзыннар сээң байлааңны сээң иштиңге үлежир-дир.

‏ Zechariah 14

Сөөлгү дайын-чаа болгаш Бурганның чедип кээри

1 Дээрги-Чаяакчының хөделип үнер хүнү кел чыдыр ^a. Иерусалим, дайзыннар сээң байлааңны сээң иштиңге үлежир-дир. 2 Бүгү чоннарны Иерусалимге удур дайын чорудары-биле чыыптар мен ^b: хоорай эжелеттирер, бажыңнар үптеттирер, а херээженнер күштеттирер ^c. Хоорайның чурттакчыларының чартык кезиин тудуп аппаар, а арткан кезиин хоорайга арттырып каар ^d.

3 Дээрги-Чаяакчы ынчан ол чоннарга удур үнүп келгеш, дайын-чаа үезинде тулушкан дег, олар-биле тулчур. 4 Ол хүн Ооң буттары Иерусалимниң чөөн талазында Елеон дагның ^e кырынга туруп аар ^f; ол даг чөөн чүктен барыын чүкче ийи чарлы берип, дагда аажок улуг шынааны ажыдыптар. Дагның бир чартыы соңгу чүкче, өске чартыы – мурнуу чүкче чыла бээр. 5 Силер Дээрги-Чаяакчының даг шынаазы-биле дезип маңнажыр силер, чүге дээрге дагның ийи чартыының аразында шынаа Эцелге чедир чаттылар. Иудеяның хааны Озияның чагырган үезинде чер шимчээшкининден чоннуң дезип турганы дег ^g, дезип маңнажыр силер. Ынчан мээң Бурганым Дээрги-Чаяакчы чедип кээр, Ооң бүгү ыдыктыг төлээлери кады кээр ^h.

6 Ол хүн чырык чок боор, чырымалдар көзүлбес апаар ^{▼▼ Бо домактың утказы эки билдинмес. Болгу дег өске утказы мындыг: «Чырык болгаш күштүг соок чок боор».}. 7 Ол хүн болза туруп көрбээн үе болур, ону чүгле Дээрги-Чаяакчы билип шыдаар ^j: хүн-даа үнмес, дүн-даа дүшпес, а кежээ дүжерге, чырып кээр ^k.

8 Ол хүн Иерусалимден амыдырал хайырлаар суг агып бадар ^l: ооң бир чартыы чөөн чүкте далайже, өске чартыы – барыын чүкте далайже киир агар ^m; чайын-даа, кыжын-даа ындыг боор.

9 Дээрги-Чаяакчы бүгү чер-делегейни хааннап чагырар ⁿ. Ол хүн Дээрги-Чаяакчы дың чаңгыс болур ^o, улус чүгле Ооң адынга мөгеер.

10 Бүгү бо чер соңгу чүкте Гивадан эгелээш, Иерусалимниң мурнуу чүгүнде турар Риммонга чедир ^p оргулааш дег апаар. А Иерусалим хоорай бодунуң турар черинге бедидир көдүрлүр. Ооң кызыгаары Вениаминниң хаалгазындан ^q Бирги хаалгага чедир, Азыгда хаалгага чедир ^r база Хананел суургазындан ^s хаанның виноград сыскырар оңгарларынга чедир болур. 11 Улус аңаа чурттай бээр, хоорайны оон ыңай кажан-даа бүрүнү-биле узуткавас. Иерусалим айыыл чок турар.

12 Иерусалимге удур чаалашкан бүгү чоннарже Дээрги-Чаяакчы мындыг аарыг-хайны ыдар: оларның мага-боду, боттары бут кырынга турда-ла, ирип каар, карактары – карак оңгарларынга-ла, а дылдары – аастарынга-ла ирип каар. 13 Ол хүн Дээрги-Чаяакчы оларже улуг мөгүдээшкин ыдар. Олар шупту холдарындан удур-дедир сегиржип аар, бот-боттарынче холун көдүрүп, халдап эгелээр ^t. 14 Иудея безин Иерусалимге удур ^{▼▼ Азы: «Иерусалимниң чанынга».} чаалажы бээр. Оон чоок-кавыдагы бүгү чоннарның байлаа: алдын-мөңгүн, идик-хеп эңдерик хөй чыгдына бээр. 15 Ол-ла аарыг-хайдан аъттар, элчигеннер, мулдар, тевелер болгаш оларның турлагларында бар бүгү өске мал-маган кырлып каар.

16 Иерусалим-биле чаалажып турган бүгү чоннардан дириг арткан улус Хаанга, Аг-шериглиг Дээрги-Чаяакчыга мөгеер дээш база Чадырлар байырлалын ^v демдеглээр дээш чылдың-на кээп турар апаар ^w. 17 Бир эвес чер-делегейниң чоннарының кайы-бирээзи Аг-шериглиг хаан Дээрги-Чаяакчыга мөгеери-биле Иерусалимче барбас болза, ол чон чаъс чок артар ^x. 18 Бир эвес египет чон бээр чедип келбес болза ^{▼▼ Азы: «Бир эвес египет чон барбас болза, ол база чаъс чок артар».}, Чадырлар байырлалын демдеглеп келбес чоннарже Дээрги-Чаяакчының ыткан аарыг-хайы египетчилерже база халдаар. 19 Египет чон болгаш Чадырлар байырлалын демдеглеп келбес бүгү өске чоннар боттарының бачыттары дээш шак ындыг кеземче алыр.

20 Ол хүн аъттарның дериинге безин «Дээрги-Чаяакчыга ыдыктаткан» деп бижип каан боор ^z. Дээрги-Чаяакчының өргээзинде чем хайындырар паштар өргүл салыр бедигээштиң мурнунда савалар дег ыдыктыг болур. 21 Иерусалимде база Иудеяда бүгү паш-сава Аг-шериглиг Дээрги-Чаяакчыга ыдыктаткан болур. Өргүл салыры-биле келген бүгү улус ол паш-саваны ап алгаш, өргээн малдың эъдин быжырар. Ол хүн Аг-шериглиг Дээрги-Чаяакчының өргээзинге садыгжылар ^{▼▼ Азы: «Хананей кижилер».} турбас ^ab.