‏ Zechariah 1

Дээрги-Чаяакчыже эглиринче кыйгырыг

1Дарий хаанның чагыргазының ийиги чылының сес айда ^a Дээрги-Чаяакчы Аддонуң оглунуң оглу ^b, Берехияның оглу Захарияга ^c Бодунуң сөзүн ажыткан: 2«Дээрги-Чаяакчы силерниң ада-өгбеңерге дыка килеңнээн турган-дыр. 3Ынчангаш бо чонга Аг-шериглиг Дээрги-Чаяакчының чугаалаан чүвезин дамчыт: Менче эглип келиңер, ынчан Мен база силерже эглип кээр мен ^d. 4Ада-өгбеңер дег болбаңар ^e. Оларны Бурганның биеэде турган медээчилери кыйгырып, Аг-шериглиг Дээрги-Чаяакчының: „Бузуттуг оруктарыңардан база багай үүлгедиглериңерден ойталаңар“– деп чугаалаан чүвезин дамчыдарга, олар Мени тооп дыңнаваан, Менче кичээнгей салбаан болгай ^f – деп, Дээрги-Чаяакчы медеглээн. – 5Ам ол ада-өгбеңер кайыл? Мээң медээчилерим-даа болза мөңге чурттаар деп бе? 6А Мээң чалча-медээчилеримге айыткаан сөстерим ада-өгбеңер-биле боттанмаан чүве бе? ^g Олар ынчан бачыттарын миннип: „Аг-шериглиг Дээрги-Чаяакчы биске хамаарыштыр, Боду канчаар доктаадып кааныл, ынчаар кылды – бистиң оруктарывыс болгаш үүлгедиглеривис ёзугаар кылды ^h“– дээн болгай».

Бирги көстүүшкүн: аъттар

7Шеват дээр он бир айның чээрби дөртте, Дарийниң чагыргазының ийиги чылында Дээрги-Чаяакчы Аддонуң оглунуң оглу, Берехияның оглу Захария медээчиге Бодунуң сөзүн ажыткан. 8Дүне када көстүүшкүн көрдүм: шилги аът мунган кижи көстүп келди ⁱ. Ол кижи ыйгыл черде мирт ыяштар аразында турду, а ооң артында шилги, доруг болгаш ак чүзүннүг аъттар көзүлдү ^j.

9Мен: «Дээргим, бо чүү деп чүвел?» – деп айтырдым.

Мээң-биле чугаалажып турган дээрниң төлээзи: «Мен сеңээ ол чүү деп чүвел дээрзин айтып берейн» – диди.

10Мирт ыяштар аразында турар кижи: «Оларны Дээрги-Чаяакчы черни эргий кезип эртсин дээш чоруткан-дыр» – деп харыылады.

11Аъттыг улус мирт ыяштар аразында турган Дээрги-Чаяакчының төлээзинге: «Бис черни эргий кезээш келдивис, бүгү чер кыры оожум, амыр-тайбың-дыр» – диди.

12Дээрги-Чаяакчының төлээзи ынчан: «Аг-шериглиг Дээрги-Чаяакчы, Сен Иерусалимге база Иудеяның хоорайларынга кээргел көргүзеринден кажанга чедир ойталаар сен? ^k Оларга ам чеден чыл килеңнеп тур сен ^l» – дээн.

13Дээрги-Чаяакчы мээң-биле чугаалажып турган Бодунуң төлээзинге ачы-буянныг, сагыш-сеткил оожургадыр сөстер-биле харыылады. 14Ынчан мээң-биле чугаалажып турган дээрниң төлээзи меңээ мынча дээн: «Аг-шериглиг Дээрги-Чаяакчының чугаалаан чүвезин улуска медеглеп дамчыт: Мен Иерусалим дээш, Сион дээш кедергей хүннеп тур мен ^m, 15а амыр-шөлээн чурттап турар чоннарже кедергей хорадап тур мен. Израильчилерге килеңнээним шоолуг эвес турда, ол чоннар хора халдадырын күштелдирген-дир ⁿ.

16Ынчангаш Дээрги-Чаяакчының чугаалаан чүвези бо-дур: Мен Иерусалимче кээргээр сеткилдиг эглип келдим, аңаа Мээң өргээмни катап тудар ^o. Иерусалимни катап база хемчээп ^p, тудар.

17Оон ыңай Аг-шериглиг Дээрги-Чаяакчының чугаалаан чүвезин улуска медеглеп, дамчыт: Мээң хоорайларымны катап база бай-байлак чык дола бээр, Дээрги-Чаяакчы Сионну катап база аргалаар ^q, Иерусалим катап база Мээң шилиттинген хоорайым боор ^r».

Ийиги көстүүшкүн: мыйыстар болгаш ус-дарганнар

18Мен оон топтап көргеш, дөрт мыйысты эскерип кагдым. 19Мээң-биле чугаалажып турган дээрниң төлээзинден: «Бо чүү боор?» – деп айтырдым.

Ол: «Бо дээрге Иудея, Израиль болгаш Иерусалимниң чонун тарадыр үзүпкен күштер-дир» – деп харыылады ^s.

20Ооң соонда Дээрги-Чаяакчы меңээ дөрт ус-дарган кижини көргүстү. 21Мен: «Олар маңаа чүнү кылыр деп турары ол?» – деп айтырдым.

Ол: «Дуу мыйыстар дээрге Иудеяның чонун кым-даа бажын көдүрүп шыдавас кылдыр тарадыр октапкан чоннар-дыр. Олар иудей черге удур мыйызын көдүрген боорга, ус-дарганнар оларны барып коргудуп, мыйыстарын дүжүр шаап кааптар» – деп харыылады.