Zec 11 | TyvTUV | STEP | Ливан, хаалгаңны ажыт, от сээң пөштериңни чипсин!

‏ Zechariah 11

Улуг күштерниң буурааны

1 Ливан, хаалгаңны ажыт, от сээң пөштериңни чипсин! ^a 2 Чойган, ыглап-сыкта, чүге дээрге пөш кээп ушкан-дыр,
улуг-чаагай ыяштар узуткаттынган-дыр.
Васан черниң дубтары ^b, ыглап-сыктаңар,
чүге дээрге эрттинмес эзимни кыргып каапкан-дыр.
3 Кадарчыларның ыы-сыызы ^c дыңналып тур:
оларның байлак-чаагай одар-белчиири узуткаттынган-дыр.
Аныяк арзылаңнарның ^d ырланган алгызы дыңналып тур:
Иордан шынаазында оларның шыргайлары узуткаттынган-дыр.

Ийи кадарчы

4 Мээң Бурганым Дээрги-Чаяакчы мынча дээн: «Дөгерер дээн кодан хойдан кадарып көр. 5 Оларны садып алган улус буруузунмайн кыра шаап кааптар, а садыпкан улус: „Дээрги-Чаяакчыга алдар, мен байый бердим! ^e“– дээр; кадарчылар хойларын кээргевес ^f. 6 Мен база бо черниң чурттакчыларын моон соңгаар кээргевес мен ^g – деп, Дээрги-Чаяакчы медеглээн. – Көр, Мен кижи бүрүзүн өске кижиниң база ооң хаанының холунга хүлээдир мен; олар черни хоозурадыр, а Мен оларның холундан кымны-даа адырбас мен».

7 Мен дөгерер дээн хойларны хой садыглаар улуска кадарып берип турдум ^{▼▼ Азы: «Мен дөгерер дээн – эң түреңги хойларны кадарып берип турдум».}. Ийи даянгыыш тудуп алгаш, бирээзин Буян деп, өскезин Эвилел деп адап алгаш, олар-биле хойларны кадарып эгеледим. 8 Бир ай дургузунда өске үш кадарчыны узуткап каан мен. Ол садыгжылар ^{▼▼ Азы: «Ол үш кадарчы»; «Кодан хой».} меңээ хөңнү чок апарган, мен база олардан хөңнүм кала берген. 9 Ынчан мен: «Моон соңгаар силерге кадарчы болбас мен. Өлүр дээн хойлар өлү берзин, чок болур дээн хойлар чок болзун ^j. Артып калганнары бот-боттарын чипсин» – дээн мен.

10 Мен бодумнуң Буян деп даянгыыжымны тудуп алгаш, сыйып каапкаш, бүгү аймактар-биле чарган чагыг-керээмни күш чок болдурдум. 11 Чагыг-керээ ол хүн күш чок апарган. Мени хайгаарап көрүп турган хой садыгжылары ^{▼▼ Азы: «Эң түреңги хойлар».} Дээрги-Чаяакчының ажыдып чугаалаан сөзү ындыг дээрзин билип алган. 12 Мен оларга: «Күзээр болзуңарза, меңээ төлеңер, а күзевес болзуңарза, төлевеңер» – дээн мен. Олар меңээ үжен шекел мөңгүн деңзилеп берди ^l.

13 Дээрги-Чаяакчы меңээ: «Ол акша-мөңгүннү дой сава кылыкчызынга октап бер! ^{▼▼ Өске бурунгу сөзүглелде «Бурганның өргээзиниң шыгжамырынче октавыт!» деп бижээн.}» – диди. Оларның мени үнелээн бедик өртээ ыя ол ышкажыл! Мен үжен шекел мөңгүннү алгаш, ону Бурганның өргээзинде дой сава кылыкчызынга октап берген мен ⁿ. 14 Оон мен Эвилел деп ийиги даянгыыжымны сыйып, Иудея биле Израильдиң аразында акы-дуңмалышкы харылзааны үзүп кааптым.

15 Дээрги-Чаяакчы меңээ катап база мынча дээн: «Мелегей кадарчыга тааржыр херекселди ап ал. 16 Чүге дээрге Мен бо чуртка бир чаа кадарчы бээр мен, ол кадарчы өлүр деп барган хойларже сагыш салбас, читкен хойларны дилевес, кемдээн хойларны эмневес, кадыктарын чемгербес, харын-даа семис хойларның эъдин чиир, оларның дуюгларын үзе тыртып кааптар ^o.

17 Кодан хоюн каапкаш баар чөгенчиг кадарчы ат болур! ^p Хылыш ооң холунче шашсын, оң талакы караан дешсин ^q! Ооң холу шуут кадып калзын, оң талакы караа шуут согурара берзин!»