Zec 12 | TyvTUV | STEP | Өттүр билген медеглел. Дээрги-Чаяакчының израиль чон дугайында сөзү бо-дур. Дээрни херип чаткан , черниң үндезиннерин салган, кижини амы-тынныг кылып каан Дээрги-Чаяакчы мынча деп медеглээн:

‏ Zechariah 12

Иерусалимниң тиилелгези

1 Өттүр билген медеглел. Дээрги-Чаяакчының израиль чон дугайында сөзү бо-дур. Дээрни херип чаткан ^a, черниң үндезиннерин салган, кижини амы-тынныг кылып каан ^b Дээрги-Чаяакчы мынча деп медеглээн: 2 «Көрүңер, Мен Иерусалимни эзиртир дашка кылып каар мен ^c, бүгү кожа чоннар эзирик улус дег кээп дүжер. Иерусалимни бүзээлеп турда, Иудеяның салым-чолу база ындыг болур. 3 Ол хүн чер-делегейниң бүгү чоннары Иерусалимге удур чыглып кээрге, Мен ону оларның шуптузунга угдунмас даш кылып каар мен. Иерусалимни көдүрер дээн бүгү чоннар кемдей бээр. 4 Ол хүн Мен дайынчы аът бүрүзүн аажок коргудуптар мен, ооң мунукчузунуң угаанын солуудадыптар мен – деп, Дээрги-Чаяакчы медеглээн. – Иудеяның чонунче кичээнгейлиг көөр мен, а өске чоннарның бүгү аъттарын согурартып каар мен ^d. 5 Ынчан Иудеяның баштыңчылары сеткил-чүрээнде „Аг-шериглиг Дээрги-Чаяакчы оларның Бурганы болгаш, Иерусалимниң чурттакчылары күштүг-дүр“деп бодаар. 6 Ол хүн Мен Иудеяның баштыңчыларын оттулар ыяш аразында оттуг суугу дег, моожалар аразында хып турар чырыткы дег кылып каар мен; олар чоок-кавызында – оң, солагай талазында чурттап турар бүгү чоннарны өрттендир чип кааптар ^e. А Иерусалим бодунуң турган черинге катап база чурттакчы чоннуг апаар.

7 Дээрги-Чаяакчы баштай Иудеяның шериглеринге тиилелге хайырлаар – оон башка Давидтиң салгалының, Иерусалимниң чурттакчыларының алдары Иудеяның улузунуң алдарындан ажа бээр. 8 Ол хүн Дээрги-Чаяакчы Иерусалимниң чурттакчыларынга дозуг-камгалал болур, оларның аразында эң кошкак кижи ол үеде Давид хаан ышкаш апаар, а Давидтиң салгалы Бурган дег, чонну баштап чоруур Дээрги-Чаяакчының төлээзи дег апаар.

9 Ол хүн Мен Иерусалимче халдап турар бүгү чоннарны кыргып-хыдыырын бодаар мен».

Өттүр шанчып алганы кижи дээш кажыыдал

10 «А Давидтиң салгалын, Иерусалимниң чурттакчыларын ээ көрнүүчел болгаш Меңээ чаннып мөргүүр улус кылып каар мен. Олар өттүр шанчып алганы кижиже ^{▼▼ Азы: «Олар өттүр шанчып алганы Менче көөр».} көөр ^g, эр чаңгыс оолдуң ажыын ажааны дег, ооң ажыын ажып ыглап-сыктаар, дун оол дээш кажыыдааны дег ^h, ол кижи дээш кажыыдаар. 11 Ол хүн Иерусалимге, Мегиддон шынаазында ⁱ Гадад-Риммон дээш ыы-сыы дег ^{▼▼ Ол дээрге Ханаанда үнүш-дүжүт бурганы Ваалдың аттарының бирээзи бооп чадавас. Чылдың-на, кажан ногаан үнүштер оңуп турда, ооң «өлүмү» дээш чүдүкчүлери кажыыдаар турган.}, канчаар-даа аажок улуг ыы-сыы болур. 12 Чурттуң чону кажыыдап ыглаар – төрел бөлүк бүрүзү аңгы кажыыдап ыглаар: Давидтиң салгалының төрел бөлүү – бир аңгы, оларның херээжен улузу – бир аңгы; Нафанның салгалының төрел бөлүү ^{▼▼ Давидтиң оглу Нафанче (2 Хаан. 5:14) айтып турар чадавас.} – бир аңгы, оларның херээжен улузу – бир аңгы; 13 Левийниң салгалының төрел бөлүү – бир аңгы, оларның херээжен улузу – бир аңгы; Шимейниң ^{▼▼ Левийниң оглунуң оглу Шимейже (Сан. 3:18) айтып турар чадавас. Өске бурунгу сөзүглелде «Шимейниң» эвес, «Симеоннуң» деп бижээн.} төрел бөлүү – бир аңгы, оларның херээжен улузу – бир аңгы. 14 Арткан бүгү төрел бөлүктер база ындыг: төрел бөлүк бүрүзүнүң эр улузу – бир аңгы, оларның херээжен улузу – бир аңгы кажыыдап ыглаар».