Zec 5 | TyvTUV | STEP | Катап база топтап көөрүмге, дүрүг-ном ужуп бар чытты .

‏ Zechariah 5

Алдыгы көстүүшкүн: ужуп чоруур дүрүг ном

1 Катап база топтап көөрүмге, дүрүг-ном ужуп бар чытты ^a. 2 Дээрниң төлээзи: «Чүнү көрүп тур сен?» – деп айтырды.

«Ужуп чоруур дүрүг-ном көрүп тур мен, ооң узуну чээрби кыры дурту, а дооразы он кыры дурту-дур» – деп харыыладым.

3 Ол меңээ мынча диди: «Бүгү чер кырынче диргелип келген каргыш ол-дур ^b; номнуң бир талазында бижип кааны дег, оорланыр бүгү улус кырдырар, а өске талазында бижип кааны дег, меге даңгырак берген бүгү улус кырдырар ^c. 4 Аг-шериглиг Дээрги-Чаяакчы: „Мен бо каргышты ыдыптар мен ^d. Оорнуң бажыңынче база Мээң адым-биле мегелеп даңгыраглап турар кижиниң бажыңынче ол кире бээр ^e. Аңаа турумчуп алгаш, оларның бажыңнарын: ыяшты-даа, дашты-даа ол узуткап кааптар“– деп медегледи».

Чедиги көстүүшкүн: доскаар иштинде херээжен кижи

5 Мээң-биле чугаалажып турган дээрниң төлээзи бурунгаар үнүп келгеш: «Ам база топтап көрем, чүү кел чыдар-дыр?» – диди.

6 Мен: «Бо чүү деп чүвел?» – деп айтырдым.

Ол: «Доскаар ышкажыл – деп харыылады. – Ол доскаар бүгү чер-чурттуң чурттакчыларының кем-буруузу-биле долдунган-дыр ^{▼▼ Өске бурунгу сөзүглелде «Бүгү чер-чурттуң чурттакчыларының ынчаар көстүп турары ол-дур» деп бижээн.}».

7 Доскаарның коргулчун халывы көдүрлү бээрге, ооң иштинде бир херээжен кижи олурар болду. 8 Дээрниң төлээзи: «Бо херээжен дээрге бачыт-тыр!» – дээш, ону доскаарже дедир суккаш, коргулчун халып-биле дуглап кагды.

9 Оон топтап көргеш, шилен куштуу ышкаш чалгыннарлыг ийи херээжен кижи ужуп бар чыдарын эскерип кагдым, оларның чалгыннарын хат хөлбеңнедип турар болду. Олар доскаарны көдүрүп алгаш, чер биле дээр аразынга ужуп чорупту. 10 Дээрниң мээң-биле чугаалажып турган төлээзинден: «Олар доскаарны кайнаар аппаары ол?» – деп айтырдым.

11 «Сеннаар черже ^{▼▼ Сеннаар – вавилон черниң эрги ады (Э. д. 10:10; 11:2 көр).}, орта аңаа өргээ тудуп бээр дээш – деп, ол меңээ харыылады. – Кажан өргээ белен апаарга, доскаарны орта тавак кырынга тургузуп каар».