Zec 6 | TyvTUV | STEP | Мен катап база топтап көргеш, ийи хүлер даг аразындан үнүп орар дөрт дайынчы терге эскерип кагдым .

‏ Zechariah 6

Сески көстүүшкүн: аъттар биле дайынчы тергелер

1 Мен катап база топтап көргеш, ийи хүлер даг аразындан ^a үнүп орар дөрт дайынчы терге эскерип кагдым ^b. 2 Бирги тергени шилги аъттар сөөртүп чорду, ийигизин – дас кара аъттар, 3 үшкүзүн – ак аъттар, дөрткүзүн – ала-шокар, күштүг аъттар ^c. 4 Мен ынчан мээң-биле чугаалажып турган дээрниң төлээзинден: «Бо чүү деп чүвел, дээргим?» – деп айтырдым.

5 Дээрниң төлээзи меңээ: «Олар дээрге бүгү чер-делегейниң Чагырыкчызының ^d турар черинден үнүп келген дөрт хат-тыр ^{▼▼ Азы: «Дөрт сүлде-дир».}. 6 Дас кара аъттар соңгу чүкте чуртче ^{▼▼ Палестинаже Персия биле Вавилон соңгу чүктен халдап кээп турган. Ынчангаш эрте-бурунгу еврейлер оларны «соңгу чүктүң чурттары» деп адап турган.} бар чыдары ол-дур, ак аъттар – оларның соо-биле ^{▼▼ Азы: «Барыын чүкче».}, ала-шокар аъттар – мурнуу чүкче» – деп харыылады.

7 Күштүг аъттар үнүп келгеш, чер-делегейни эргий халыксап, чүткүп турду. Дээрниң төлээзи: «Барып, чер-делегейни эргип кезиңер!» – дээрге, олар халдып чорупту.

8 Ол ынчан дыңзыдыр: «Көр даан, соңгу чүкте чуртче халдып чорупкан аъттар ол черге Дээрги-Чаяакчының Сүлдезин оожургадып кагды» – диди.

Дээди бараалгакчыга оваадайны кедиргени

9 Дээрги-Чаяакчы меңээ Бодунуң сөзүн ажыткан: 10 «Вавилонга туттуруушкундан ээп келген Хелдай, Товия болгаш Иедайя оларның белектерин ап ал. Ол-ла хүн Софонияның оглу Иосияның бажыңынче чорувут. 11 Алдын-мөңгүнден ап алгаш, оваадайдан кылгаш, Иоседектиң оглу, Бурганның дээди бараалгакчызы Иисустуң ^h бажынга кедире салып каг. 12 Аңаа Аг-шериглиг Дээрги-Чаяакчының чугаалаан чүвезин дамчыт: көр даан, Өзүм деп аттыг кижи бо-дур ⁱ. Ооң өзүмү турар черинден өзүп үнгеш, Дээрги-Чаяакчының өргээзин тургузуп каар ^j. 13 Дээрги-Чаяакчының өргээзин ол тургузуп каар. Ол алдар-хүндүге бүргеттирер, Бодунуң дүжүлгезинге саадапкаш, чагырар. Ооң дүжүлгезиниң чанынга Бурганның бараалгакчызы турар ^{▼▼ Азы: «Дүжүлгезинге ол Бурганның бараалгакчызы база болур».}, олар аразында эп-найыралдыг болур. 14 А ол оваадай Хелдай ^{▼▼ Өске бурунгу сөзүглелде «Хелдай» эвес, «Хелем» деп бижээн.}, Товия, Иедайя болгаш Софонияның оглу Хен дугайында тураскаал демдек бооп, Дээрги-Чаяакчының өргээзинге артып калзын».

15 Ыракта чурттап турар улус чедип келгеш, Дээрги-Чаяакчының өргээзин тударынга киржир ^m, ынчан мени силерже Аг-шериглиг Дээрги-Чаяакчының чорутканын билип аар силер ⁿ. Силерниң Бурганыңар Дээрги-Чаяакчының чугаалаан чүвезин чүткүлдүү-биле тооп дыңнаар болзуңарза, ол бүгү болдуна бээр.