Zep 1 | TyvTUV | STEP | Иудеяны Амоннуң оглу Иосия хаан чагырып турда , Дээрги-Чаяакчының Софонияга ажыдып чугаалаан сөзү бо-дур. Софония Хусийниң оглу, Хусий – Годолияның оглу, Годолия – Аморияның оглу, а Амория

‏ Zephaniah 1

1 Иудеяны Амоннуң оглу Иосия хаан чагырып турда ^a, Дээрги-Чаяакчының Софонияга ажыдып чугаалаан сөзү бо-дур. Софония Хусийниң оглу, Хусий – Годолияның оглу, Годолия – Аморияның оглу, а Амория – Эзекияның оглу турган чүве-дир.

Дээрги-Чаяакчының шииткелиниң хүнү

2 «Мен чер кырында бүгү чүвени чок кылып каар мен – деп, Дээрги-Чаяакчы медеглээн. –
3 Кижилерни, мал-маганны узуткаар мен;
дээрниң куштарын, далайның балыктарын узуткаар мен ^b.
Бузуттуг улусту дуурайлаткан чүвелери-биле кады чок кылып,
чер кырында бар улусту амылыг арттырбас мен – деп, Дээрги-Чаяакчы медеглээн. –

4 Мен Иудеяже база Иерусалимниң бүгү чурттакчыларынче холум анныр мен,
ол черде Ваал бурганның истерин шуут балап кааптар мен ^c,
ооң бараалгакчыларын, аңаа бараан болуп турар улусту амылыг арттырбас мен.
5 Бажыңнар кырындан сылдыстарның аг-шериинге мөгеер улусту ^d,
Мээң адым-биле деңге Милхом бурганның ^{▼▼ «Милхом бурган» деп сөстерниң болгу дег өске утказы мындыг: «Боттарының хааны».} ады-биле даңгыраглап ^f,
мөгейиг кылыр улусту чок кылып каар мен ^g.
6 Менден ойталааш, Менче чүткүвес, Менден дуза дилевес улусту
чок кылып каар мен.

7 Улус-чон, Дээрги-Бурган-Чаяакчының мурнунга ыыдың чиде бер ^h,
чүге дээрге Дээрги-Чаяакчының шииткел хүнү чоокшулаан-дыр ⁱ.
Дөгерер өргүлүн Ол белеткеп, ону чиир улусту чалап, ыдыктап алган ^j.

8 Дээрги-Чаяакчының өргүл хүнүнде нояннарны, тажыларны ^k болгаш
даштыкылар хеви кедер бүгү улусту кезедип кээр мен.
9 Мен ол хүн эргин арта халып турар улусту ^{▼▼ Эргин арта халып турар улус – өске бурганнарга мөгеер улусту ойзу адааны ол бооп чадавас (1 Хаан. 5:5 көр).},
боттарының дээргилериниң ордузун күчүлел болгаш меге-биле долдуруп турар
бүгү улусту кезедир мен.

10 Ол хүн кээрге, Балык хаалгазындан ^m, Иерусалимниң чаа кезээнден ⁿ
уё-човуур, ыы-сыы дыңналыр,
Иерусалимниң тейлеринге коргунчуг дааш-шимээн үнер – деп,
Дээрги-Чаяакчы медеглээн. –
11 Согааш кудумчузунуң чурттакчылары, ыглажыңар,
чүге дээрге силерниң бүгү садыгжыларыңар,
мөңгүн-биле саарылга кылып турар улузуңар узуткаттырар.
12 Ол үеде Мен Иерусалимни чырыткы тудуп алгаш,
эргип кезип, турнуккан арага дег ^o амыр-шөлээн улусту,
„Дээрги-Чаяакчы бистиң-биле эки-даа, багай-даа чүве кылбас“деп бодаар улусту
кезедир мен ^p.
13 Оларның байлаа өске улустуң олчазы апаар,
бажыңнары хоозурап каар.
Олар тудуп алган бажыңнарынга чурттавас,
тарып алган виноградының арагазын ишпес ^q.

14 Дээрги-Чаяакчының өндүр улуг хүнү чоокшулап келген –
далаштыг кел чыдар.
Ол хүн качыгдалдың дааш-шимээни,
дайынчыларның алгы-кышкызы дыңналыр!
15 Ол хүн – килең хүнү, качыгдал биле хилинчектиң хүнү,
өлүм-чидим биле кызагдалдың хүнү,
кара булуттар биле дүмбей караңгының хүнү болур ^r;
16 дайынчы труба эдер,
быжыглалдыг хоорайлар биле бедик суургаларга удур тулчуушкунче кыйгы хүнү болур.

17 Мен кижи амытанны аажок кызагдаптарымга,
олар согурлар дег улчуп чоруптар ^s,
чүге дээрге Дээрги-Чаяакчыга удур бачыт үүлгеткен-дир.
Оларның ханы черже агар,
мөчү-сөөктери өдек дег тарай октаттынар ^t.
18 Дээрги-Чаяакчының килең хүнүнде
оларны алдыны-даа, мөңгүнү-даа камгалап шыдавас ^u.
Ооң хорадаан сагыжының одунга бүгү чер өрттенип каар ^v,
чырык черниң бүгү чурттакчылары хенертен бүрүнү-биле узуткаттырар.