Zep 2 | TyvTUV | STEP

‏ Zephaniah 2

1 – 2 Арын-нүүр чок чон! ^a Тодарадып каан хүн келбээнде,
силерни хатка сүрдүрген тараа саваңы ышкаш өскээр сүрүп аппарбаанда,
Дээрги-Чаяакчының кыптыккан килеңи силерни чиртип кааптаанда,
Ооң килеңиниң хүнү силерни таварбаанда,
чыглып, бөлдүнчүңер-ле!
3 Дээрги-Чаяакчыже чүткүңер ^b, черниң бүгү томаанныг улузу,
Ооң күзел-соруун күүседип турар улус!
Чөптүг-шынныг чорукче чүткүңер, чөпшүл боорун кызыңар –
Дээрги-Чаяакчының килеңиниң хүнүнде
чаштынар аргалыг боор чадавас силер ^c».

Иудея-биле кожа чоннарны Дээрги-Чаяакчының кезедири

4 «Газа хоорайны чурттакчылары каапкаш баар,
Аскалон хоорай ээнзирээр,
Азот хоорайның чурттакчыларын чартык хүн иштинде үндүр сывырып аппаар,
Экрон хоорайны черден тура тыртар ^{▼▼ Ол хоорайлар филистим чонга хамааржып турган (Ам. 1:6-8; Зах. 9:5 көр).}.
5 Далай эрии черниң чурттакчылары, керет аймак ^e,
ат болур силер!
Ханаан чер, филистимнер чурту,
Дээрги-Чаяакчы сеңээ үндүрген шииткелин дыңнадып тур:
Мен сени узуткап каар мен, чурттакчы чон чок артар сен! ^f
6 Далай эрииниң кыдыы кадарчылар казанактары биле мал кажаалары турар одар-белчиир апаар ^g.
7 Ол девискээр Иудеяның арткан чонунга онаажыр.
Олар аңаа сүрүг малын кадарар,
Аскалоннуң бажыңнарынга кежээ удуп дыштаныр –
оларның Бурганы Дээрги-Чаяакчы оларже сагыш салып,
эки чолду эгидер ^{▼▼ Азы: «Туттурган улузун дедир чандырар».}.

8 Моав чоннуң бак сөгленгенин ⁱ, аммон чоннуң кочуургаанын ^j –
оларның Мээң чонумну дорамчылап-кочулаанын,
ооң черинге кыжанганын дыңнап кагдым.
9 Ынчангаш дириг Бодумнуң адым-биле даңгыраглап тур мен ^k – деп,
Аг-шериглиг Дээрги-Чаяакчы, Израильдиң Бурганы медеглээн. –
Моав Содом ышкаш, аммон чон – Гоморра ышкаш апаар ^l.
Оларның чери кезээ мөңгеде шагар-оът дуй үнген,
кужурланчак девискээр, ээн кургаг хову апаар.
Мээң чонумнуң дириг арткан улузу оларны олчалап аар,
Мээң улузумнуң артынчызы оларның черин өнчү кылдыр алыр.

10 Ол бүгү хуу-салым оларга улуургаа дээш ^m,
Аг-шериглиг Дээрги-Чаяакчының чонун дорамчылап кочулап,
оон өрү көрдүнүп турганы дээш онаажыр.
11 Дээрги-Чаяакчы оларга коргунчуг болур,
черниң бүгү дүрзү-бурганнарын Ол чөгенчиг кылып каар.
Ырак чурттарда бүгү чоннар,
кайызы-даа бодунуң девискээринге, Аңаа мөгеер ⁿ.

12 Силер база, эфиоптар ^o,
Мээң хылыжымга кыргыдып-хыдыдар силер.

13 Дээрги-Чаяакчы Бодунуң холун соңгу чүкче сунгаш,
Ассирияны узуткап каар.
Ниневия хоорай буступ каар ^p,
ону кургаг куруг хову ышкаш ээн чер болдурар.
14 Аңаа сүрүг мал, янзы-бүрү черлик дириг амытаннар дыштанып чыдар ^q;
үгүлер биле каарганнар хоорайның бузундуларынга дүннээр,
оларның эткен үннери бажыңнар иштинден дыңналыр,
эргинде хоозураашкын көстүр,
эжик-хаалганың пөш шагыглары картталып калган боор.
15 Ол-дур, өөрүп-байырлап, сагыш амыр чурттап турар,
чурттакчылары сеткил-чүрээнде: „Бо хоорай өндүр улуг, ол ышкаш хоорай чок!“– деп турган
Ниневия хоорай ынчап баар-дыр ^r.
Ол хоозуралга алзып, аң-мең чурттаар чер апаар!
Ооң чаны-биле эрткен кижи бүрүзү кайгап-харап,
кочулап сыгырар база олче холун чаңгыыр ^s».