Zep 3 | TyvTUV | STEP | «Үймээнчи, бужар, кызагдакчы хоорай ат болур!

‏ Zephaniah 3

Иерусалимниң келир үези

1 «Үймээнчи, бужар, кызагдакчы хоорай ат болур! ^a 2 Ол Дээрги-Чаяакчыны тооп дыңнавас-тыр,
чагыг-сургаалды хүлээп албас-тыр,
бодунуң Бурганынга идегевес-тир,
Олче чоокшулавас-тыр.
3 Ооң нояннары ырланган арзылаңнар дег-дир,
баштыңчылары – кежээ чимзенген,
эртенге чедир чаңгыс-даа сөөк арттырбас бөрүлер дег-дир ^b.
4 Хоорайда Бурганның медээчилери бодал чок, кара сагыштыг,
а бараалгакчылары Дээрги-Чаяакчының өргээзин бужартадып,
ыдыктыг хоойлуну үреп турар ^c.
5 Чүгле Дээрги-Чаяакчы хоорайда чөптүг чүве кылып турар,
Ол бузуттуг чүве үүлгетпес.
Ол эртенниң-не чырыткылыг шын шииткел үндүрүп турар,
ынчалза-даа бузуттугларның ыядыр арны чок-тур ^d.

6 Мен чоннарны узуткап кагдым,
оларның шивээлерин үреп бузуп кагдым.
Оларның кудумчулары ээнзиреп калган –
кым-даа оларны таварып эртпейн турар;
оларның хоорайлары хоозурап калган,
кижи шуут чок, чурттакчылар артпаан.
7 Мен чонумга: „Менден коргуп, чагыг-сургаалым хүлээп алыңар,
ынчан чурттап турар чериңерни узуткавас,
Мээң бодап алган кеземчем силерни таварбас“– дээн мен.
А олар бузут үүлгедирин улам чүткүлдүг оралдажып турду.

8 Ынчангаш Мени манаңар! ^e – деп, Дээрги-Чаяакчы медеглээн. –
Чоннарга удур херечилээр дээш ^{▼▼ Азы: «Чоннарны үптээр дээш».} көдүрлүр хүнүмге чедир манаңар.
Мен чоннарны чыып аарын ^g, күрүнелерниң чурттакчыларын бөлерин база
оларже Бодумнуң ажынган сагыжымны,
бүгү кыптыккан килеңимни угландырарын шиитпирледим.
Мээң хорадаан сагыжымның одунга
бүгү чер өрттенип каар ^h.

9 Мен ынчан чоннар шупту Дээрги-Чаяакчының адын кыйгырзын дээш
база Меңээ чаңгыс эптиг бараан болзун дээш,
оларның аксы-дылын арыглап каар мен ⁱ.
10 Эфиопияда хемнер ындында Меңээ мөгеер улус –
Мээң тоо быдараан чонум чедип келгеш,
Меңээ өргүл белектерин эккээр.

11 Иерусалим, ол хүн сен чурттакчыларыңның
Меңээ удур үүлгедип турган бачыттары дээш
бак атка кирбес сен ^j,
чүге дээрге Мен турамык болгаш улуургак бүгү улусту сенден үндүре бээр мен,
ооң соонда Мээң ыдыктыг даамга өрү көрдүнмес сен.
12 Сеңээ чурттаар кылдыр томаараан, түреңги чонну арттырып каар мен,
Дээрги-Чаяакчының ады оларга хоргадал боор ^k.
13 Израиль чоннуң артынчызы бузут үүлгетпес, мегелевес,
оларның аксы-сөзүнде кара сагыш чок боор ^l.
Олар, хойлар ышкаш, одарлаан соонда, дыштанып чыдып аар,
оларны кым-даа дүвүредип хоюспас ^m».

Өөрүшкүнүң ыры

14 «Сион-кыс, ырлап байырла, Израиль, өөрүп-байырла!
Иерусалим-кыс, сеткилиң ханызындан өөрүп-хөгле! ⁿ
15 Дээрги-Чаяакчы сээң шииткелиңни күш чок болдурган-дыр,
дайзыныңны аткаарлаткан-дыр.
Израильдиң Хааны Дээрги-Чаяакчы сээң-биле-дир,
моон соңгаар айыыл-халаптан кортпас-тыр сен ^o.
16 Ол хүн кээрге, Иерусалимге улус:
„Кортпа, Сион! Сээң холдарың суларавазын!“– деп чугаалаар. –
17 „Дээрги-Чаяакчы Бурганың сээң-биле-дир,
Ол – күштүг Дайынчы, сени камгалап шыдаар.
Ол сен дээш өөрүүр ^p, Бодунуң ынакшылы-биле сени оожургадыр ^{▼▼ Өске бурунгу сөзүглелде «Сени чаартыр» деп бижээн.},
сен дээш өөрүп-байырлап, ырлаар“.

18 Биеэде демдеглеп турган байырлалдары дээш муңгагдап турар силерни чыыптар мен,
силерге үүрге-чүък дег болган бак адыңарны силерден адырып кааптар мен ^{▼▼ Бо домактың утказы эки билдинмес. Болгу дег өске утказы мындыг: «Ол байырлалдар силерге үүрге-чүък дег болуп, адыңарны баксырадып турар».}.
19 Мен ол үеде сээң бүгү дарлакчыларыңны кезедир мен.
Кошкак, аскак улусту камгалаар мен, үндүр сывыртаткан чонну чыыр мен.
Бак сөгледип турганы бүгү черлерге
олар алдар-хүндүлүг боор кылдыр кылып каар мен ^s.

20 Ол үеде Мен силерни чыып алгаш, дедир чандырар мен ^t.
Силер көрүп туруңарда, силерге эки чолду эгиткеш ^{▼▼ Азы: «Туттурган улузун дедир чандыргаш».},
чер-делегейниң бүгү чоннарының аразынга
алдар-хүндүлүг чон кылып каар мен».

Дээрги-Чаяакчының чугаалаан чүвези ол-дур.