1 Chronicles 17:16-27
Давидтиң Бурганга өөрүп четтиргени
(2 Хаан. 7:18-29)
16Ынчан Давид хаан Дээрги-Чаяакчының мурнунга барып чугаалаан: «О, Дээрги-Бурган-Чаяакчы! Кым мен мен? Мээң ук-салгалым кымыл? Мени ынчаар көдүрер хире чүнү кылдым? 17Ол бүгү безин Сеңээ эвээш болган-дыр, о, Бурган! Мени алдаржыдарындан эрткеш, Сен Бодуңнуң чалчаңның үре-салгалының келир үезин безин чугаалап бердиң. Сен мени кол кижи дег көрдүң, Дээрги-Бурган-Чаяакчы. 18Бодуңнуң чалчаңны алдаржытканың дээш Давид Сеңээ оон ыңай чүнү немей чугаалап шыдаар деп? Бодуңнуң чалчаңны билир-ле болгай сен! 19О, Дээрги-Чаяакчы! Бодуңнуң чалчаңны бодааш, Бодуңнуң күзелиң-биле Сен өндүр улуг херекти кылып, ол бүгү чаагай аазаашкыннарны ажыдып бердиң. 20Дээрги-Чаяакчы! Сеңээ деңнежир Бурган чок-тур, Сеңээ деңнежипки дег кым-даа чок-тур, Сенден өске Бурган-даа чок-тур, бис боттарывыстың кулаавыс-биле дыңнадывыс a. 21Кым Сээң израиль чонуңга деңнежирил? Чер кырында бо чон дег өске чон чок b, чүге дээрге бисти Бодунуң чону кылып аар дээш, Бурган кээп, бисти кулданыышкындан адырып алган. Сээң кайгамчык, коргунчуг херектериң ужун Сээң адың билдингир апарган. Сен египетчилерден камгалаан чонуңнуң мурнундан өске чоннарны-даа үндүр ойладыпкан эвес ийик сен бе? 22Сен израиль чонуңну кезээ мөңгеде Бодуңнуу кылдыр ап алдың, а Бодуң, Дээрги-Чаяакчы, ооң Бурганы болдуң. 23А ам, Дээрги-Чаяакчы, Бодуңнуң чалчаңның болгаш ооң ук-салгалының дугайында берген сөзүңнү кезээ мөңгеде шынзыдып көрем, Бодуңнуң аазаашкыныңны күүседип көрем. 24Сээң адың кезээ мөңгеде артып, алдаржып чорзун, кижилер: „Аг-шериглиг Дээрги-Чаяакчы – Израильдиң Бурганы! Израильде Бурган ол-дур!“деп чугаалажып чорзун! Сээң чалчаң Давидтиң ук-салгалы Сээң мурнуңга быжыг болзун! 25Мээң Бурганым, Сен Бодуңнуң чалчаң меңээ ук-салгалымны доктаадып бээриңни ажыдып берген болгай сен, ынчангаш Бодуңнуң чалчаң Сээң мурнунга мөргүүрүн шиитпирледи. 26О, Дээрги-Чаяакчы! Сен – Бурган сен! Сен Бодуңнуң чалчаңга бо чаагай кежикти аазадың. 27Бодуңнуң чалчаңның ук-салгалы мөңгеде Сээң хайгааралыңга чорзун дээш, аңаа ачы-буяның хайырлап эгеледиң. Дээрги-Чаяакчы, ачы-буянны Сен хайырлаар болзуңза, ол ачы-буян кезээ мөңгеде артып каар!»
Copyright information for
TyvTUV