1 Chronicles 26:1-19
Бурганның өргээзиниң хаалгачылары
1Хаалгачыларның үлелгези бо-дур. Корахтың төрел бөлүүнден: Асафтың үре-салгалы, Корениң оглу Мешелемия. 2Мешелемияның оолдары: дун оглу Захария a, ийигизи Иедиаил, үшкүзү Зевадия, дөрткүзү Иатниил, 3бешкизи Элам, алдыгызы Иегоханан, чедигизи Элиоенай. 4Овед-Эдомнуң b оолдары: дун оглу Шемайя, ийигизи Иегозавад, үшкүзү Иоах, дөрткүзү Сахар, бешкизи Нафанаил, 5алдыгызы Аммиил, чедигизи Иссахар, сескизи Пеултай. (Дээрги-Чаяакчы Овед-Эдомга ачы-буянын хайырлап каан болгай.) c 6Шемайя деп оглунуң оолдары шупту күштүг-шыырак улус болгаш, төрел бөлүүнде удуртукчулар турган. 7Шемайяның оолдары: Офни, Рефаил, Овид, Элзавад. Оларның төрелдери Элиуй биле Семахия база шыырак улус чораан. 8Олар шупту Овед-Эдомнуң үре-салгалы болган. Оларның боттары-даа, оолдары болгаш ха-дуңмазы-даа шупту ажылга кызымак, шыырак улус болган чүве-дир. Шупту алдан ийи кижи d. 9Мешелемияның оолдары болгаш ха-дуңмазы – он сес шыырак кижи болган. 10Мерариниң төрел бөлүүнден Хосаның оолдары: Шимри – кол кижи. (Шимри дун оглу эвес-даа болза, ачазы ону кол кижи кылып каан.) 11Ийигизи Хелкия, үшкүзү Тевалия, дөрткүзү Захария. Хосаның оолдары болгаш ха-дуңмазы шупту он үш кижи турган. 12Бо хаалгачылар, боттарының ха-дуңмазы ышкаш, Дээрги-Чаяакчының өргээзинге бараан болур албан-хүлээлгелерин боттарының баштыңнарының аайы-биле алганнар. 13Кайы хаалгаларны кадарарын тодарадыр дээш, олар төрел аймак аайы-биле улуг-бичези деңге төлге даштары октааннар e. 14Чөөн талакы хаалганың төлгези Шелемияга дүшкен. Ооң оглу – угаанныг сүмелекчи Захария дээш төлге октаарга, аңаа Соңгу хаалга онаашкан. 15Мурнуу чүкте хаалганың төлгези Овед-Эдомга дүшкен, а курлавыр бажыңнарының f төлгези ооң оолдарынга таварышкан. 16Барыын талакы хаалганың база үстүү орукта Шаллехет хаалганың төлгелери Шуппим биле Хосага дүшкен. Таңныылдар душ-дужунда тургулап алган турар чүве-дир. 17Чөөн талада алды, соңгу болгаш мурнуу чүктеринде дөрт-дөрт, а курлавыр бажыңнарында ийи-ийи таңныыл левит турган. 18Барыын талада Парбар деп черге ийи, а оон үнген орукка дөрт кижи турган. 19Корах болгаш Мерариниң үре-салгалдары боор хаалгачыларның үлелгези бо-дур.
Copyright information for
TyvTUV