1Ki 9:10-28 | TyvTUV | STEP | Соломон ол ийи тудугну – Дээрги-Чаяакчының өргээзи биле хаанның ордузун – чээрби чыл иштинде тудуп дооскан соонда ,

‏ 1 Kings 9:10-28

Соломоннуң өске ажыл-херектери

(2 Чыл. 8:1-18)

10 Соломон ол ийи тудугну – Дээрги-Чаяакчының өргээзи биле хаанның ордузун – чээрби чыл иштинде тудуп дооскан соонда ^a, 11 Тирниң хааны Хирамга Галилея деп девискээрде турар чээрби хоорай берген, чүге дээрге Хирам Соломонга пөш, шиви ыяшты болгаш алдынны ооң күзээнин ёзугаар берип турган. 12 А Хирам Соломоннуң берген хоорайларын көөр дээш Тирден чедип кээрге, олар аңаа таарышпайн барган. 13 Ол: «Меңээ бо чүү адам хоорайлар бергениң ол, дуңмам?» – деп айтырган чүве-дир. Ынчангаш оларның турар черин Кавул ^{▼▼ Кавул – еврей дылда «Херекчок чүве-дир» дээн уткалыг сөс-биле дөмей дыңналыр ат (Иис. 19:27 көр).} деп адап каан. Ол черниң ады амдыгаа чедир ындыг бооп арткан. 14 Хирам оон хаанга 120 талант ^{▼▼ 120 талант – 3600 ажыг килограммга деңнежир.} алдын чорудуп берген.

15 Соломон албадалдыг ажылчын күш ажыглап тургаш ^d, Дээрги-Чаяакчының өргээзин, бодунуң ордузун ^e, Милло шивээни ^f, Иерусалимниң ханазын база Асор, Мегиддон болгаш Гезер хоорайларны тудуп каан. 16 (Египеттиң хааны фараон Гезерже халдааш, эжелеп алган чүве-дир. Фараон хоорайны өрттедипкеш, ооң хананей чурттакчыларын ^g кыра шаап каапкан болгаш ону бодунуң уруунга, Соломоннуң кадайынга ^h, өнчү кылдыр берипкен, 17 а Соломон Гезерни катап тудуп каан.) Оон ыңай Алдыы Бет-Орон ⁱ, 18 Ваалат болгаш ээн кургаг ховуга Тадмор хоорайларны быжыглап тудуп каан. 19 А ол ышкаш аъш-чем курлавыры шыгжаар бүгү хоорайларны база бодунуң дайынчы тергелерин болгаш аъттарын тургузар хоорайларны тудуп каан ^j. Соломон Иерусалимге, Ливанга болгаш чагырып турганы бүгү черлерге тудар дээн бүгү чүвезин тудуп каан.

20 Соломон амор, хет, ферез, хиввей болгаш иевус чоннарның артынчызын (олар шупту израиль уктуг эвес турган) – 21 оларның чуртка артып калган, израильчилерниң бүрүнү-биле узуткап шыдавааны үре-салгалын – кулдар ышкаш ажылдадып ажыглап турган, амдыгаа чедир ындыг бооп арткан. 22 А израильчилерни Соломон кул кылдыр ажыглаваан ^k. Олар ооң шериглери, дүжүметтери, нояннары, шериг баштыңнары, ооң дайынчы тергелериниң башкарыкчылары, аъттыг шерииниң удуртукчулары бооп турган. 23 Соломоннуң ажылдарының башкарыкчылары – ында ажылчын күштү хайгаарап турар 550 кижи база турган.

24 Фараоннуң уруу Давидтиң Хоорайындан Соломоннуң аңаа тудуп берген ордузунче көже берген ^l. Соломон ооң соонда Милло шивээзин быжыглап тудуп каан ^m.

25 Соломон чылда үш катап Дээрги-Чаяакчыга тудуп бергени өргүл салыр бедигээшке бүрүн өрттедир болгаш эп-найырал өргүлдери эккеп салып, Дээрги-Чаяакчының мурнунга чаагай чыттыг чүүлдер кыпсып турган. Бурганның өргээзин ол ынчалдыр тудуп дооскан.

26 Соломон оон ыңай эдом черде Эйлат хоорайның чанында Эцион-Гавер өртээлге ⁿ, Кызыл далайның эриинге корабльдар тудуп турган. 27 А Хирам хаан бодунуң эжиндирип билир далайжыларын Соломоннуң улузу-биле кады корабльдарга албан эрттирзин дээш чорудупкан ^o. 28 Олар Офирже эжиндирип чорупкаш ^p, ол черден 420 талант ^{▼▼ 420 талант – 12 600 ажыг килограммга деңнежир.} алдын эккелгеш, Соломон хаанга чедире бергеннер.