1 Samuel 24
Давидтиң Саулду амы-тынныг арттырганы
(1 Хаан. 26:1-25)
1Давид оон чоруткаш, Эн-Гедиде a быжыглалдыг черлерге турумчуп алган. 2А Саул филистимнерге удур дайындан чедип кээрге, аңаа: «Давид Эн-Гединиң ээн кургаг ховузунда турар-дыр» – деп дыңнатканнар. 3Саул бүгү Израильден 3000 шилиттинген эрни эдертип алгаш, Давидти болгаш ооң улузун дилеп, Чуңмалыг туругже чорупкан. 4Ол чорааш, орук кыдыында хой кажааларынга таваржы берген. Ында куй бар боорга, Саул чиигеп аар дээш ынаар кире берген. А ол куйнуң ханы иштинге Давид болгаш ооң улузу олурган чүве-дир. 5Давидке ооң улузу мынча деп турганнар: «Дээрги-Чаяакчының сеңээ: „Бо-дур, сээң дайзыныңны сээң холуңга берип тур мен“– деп чугаалап турганы хүн бо-дур. Ооң-биле чүнү канчаарыңны бодуң билир сен». Давид туруп келгеш, Саулдуң тонунуң эдээнден билдиртпейн кезип алган. 6Ынчалза-даа ооң соонда Саулдуң тонунуң эдээн кезип алганы Давидтиң арын-нүүрүнге эпчок апарган b. 7Ол бодунуң улузунга: «Мээң дээргимче ынчаар хол көдүрерин Дээрги-Чаяакчы меңээ чөпшээрээр бе ынчаш. Ол болза Дээрги-Чаяакчының шилип алганы кижизи ышкажыл» – дээн c. 8Ол сөстери-биле Давид бодунуң улузун чемелеп, Саулче халдаарын хоруп каан d. Саул куйдан орукче үнүп кээрге, 9Давид база үнүп келгеш, ооң соондан: «Мээң дээрги хааным!» – деп кыйгырган. Саул хая көрнүп кээрге, Давид аңаа черге чедир мөгейген. 10Давид Саулга мынча деп чугаалаан: «Чүге силер улустуң: „Давид Саулга удур багай чүве кылыр деп турар“деп чугаазынга бүзүреп, оларны дыңнап турар силер? 11Бөгүн куй иштинге Дээрги-Чаяакчы силерни мээң холумга киирип турганын бодуңар карааңар-биле көрдүңер ышкажыл. Силерни өлүрүп каарын меңээ сүмелеп турдулар. А мен силерни кээргээш: „Мээң дээргимче хол көдүрбес мен, чүге дээрге ол Дээрги-Чаяакчының шилип алган кижизи-дир“– дидим. 12Мээң адам! Мээң холумда силерниң тонуңардан кезип алганым быжындыны көрүңер. Мен ону кезип алгаш, силерни өлүрбедим. Силерге удур менде кандыг-даа каржы-бак бодал чок дээрзин көрүп, билип алыңар. Мен силерге удур бачыт кылбадым e. А силер мээң амы-тынымга чедер дээш мени сүрүп турар-дыр силер. 13Силер биле мээң аравыска Дээрги-Чаяакчы шииткекчи болур ыйнаан f. Мээң өжээнимни силерден Дээрги-Чаяакчы негеп аар ыйнаан, а мен силерже хол көдүрбес мен. 14Бурунгу үлегер чугаада „Бак үүлгедиглер бак улустан үнер“дээн болгай. А мен силерже хол көдүрбес мен. 15Израильдиң хааны кымга удур үнүп келген чүвел? Кымны истеп-сүрүп турар кижи силер? Өлүг ытты азы чаңгыс бытты эвес бе? 16Дээрги-Чаяакчы шииткекчи болгай аан! Силер биле мээң аравыска Дээрги-Чаяакчы херечилээр ыйнаан. Ол мээң херээмни сайгарып көргеш, силерниң холуңардан мени адырып каар». 17Давид чугаазын төндүрүптерге, Саул: «Сээң үнүң бе бо, оглум Давид?» – дээш, ыглапкан. 18Оон ол Давидке: «Сен меңээ бодаарга, чөптүг-шынныг-дыр сен, чүге дээрге сен меңээ экини күзеп турар-дыр сен, а мен сеңээ хамаарыштыр багай чүве бодап турган-дыр мен. 19Бөгүн сен меңээ кээргээчел сеткилиң көргүскеш, ону бадыткадың. Дээрги-Чаяакчы мени сээң холуңга хүлээдип турда, сен мени өлүрбедиң. 20Бодунуң дайзынын тудуп алгаш, кым менди-чаагай салып чорудуптар боор? Бөгүн меңээ эки чүүл кылганың дээш, Дээрги-Чаяакчы сени ачы-буян-биле шаңнаар g. 21Ам билир мен: сен ыяап-ла хаан болур сен h, Израильди сен чагырар сен. 22Ынчангаш мээң соомда мээң үре-салгалымны төндүрбезиңни база мээң адымны төрел бөлүүмге артпас кылдыр узуткавазыңны меңээ Дээрги-Чаяакчының ады-биле даңгырагла».
Copyright information for
TyvTUV