a2 Хаан. 6:12
bХост. 25:22; 26:33-34; 2 Чыл. 3:10-13
cХост. 25:13-15
dХост. 16:33-34; Сан. 17:10
eХост. 25:21; 40:20; Ы. х. к. 10:5
f1 Чыл. 24:1-9
g1 Чыл. 6:33, 39; 25:1
h1 Чыл. 15:16; Ыд. ыр. 150:3-5
i1 Чыл. 16:42
j1 Чыл. 16:34; Эзра 3:11; Ыд. ыр. 105:1
kХост. 40:34-35

‏ 2 Chronicles 5:2-14

Ыдыктыг аптараны Бурганның өргээзинче көжүргени

(3 Хаан. 8:1-13)

2Соломон оон Израильдиң баштыңнарын, израиль аймактар, төрел бөлүктерниң бүгү нояннарын Иерусалимче – Дээрги-Чаяакчының чагыг-керээзиниң аптаразын Давидтиң Хоорайындан a, Сион дагдан өскээр көжүрер дээш – кыйгырып алган. 3Бүгү израильчилер хаанның кыйгырганын ёзугаар байырлал үезинде, чеди айда чыглып келген.

4Израильдиң бүгү баштыңнары чедип кээрге, левиттер ыдыктыг аптараны көдүргеш, 5ооң-биле кады Ужуражылга майгынын база аңаа турган бүгү ыдыктыг эт-херекселди алгаш чорупканнар. Бурганның бараалгакчылары болгаш левиттер ол бүгүнү көдүрүп аппар чыткан. 6Соломон хаан болгаш ооң кыйгырыы-биле чыылган бүгү израиль ниитилел ыдыктыг аптараның мурнунда турган; олар өргүл кылдыр эңдерик шээр болгаш бода малды эккеп салып турган – ол малды санаары-даа, эргий көөрү-даа болдунмас, хөлүн эрттир хөй болган.

7Бурганның бараалгакчылары Дээрги-Чаяакчының чагыг-керээзиниң аптаразын Ооң өргээзиниң иштинде турар черинге, эң ыдыктыг өрээлге эккелгеш, херувимнер чалгыннарының адаанга тургузуп каан. 8Херувимнерниң чалгыннары ыдыктыг аптараның турар чериниң кырынга херлип b, ооң бодун база ону көжүрерде ажыглаар көдүрткүүш-мергелерни c шыва апкан турган. 9Аптараның көдүрткүүш-мергелери дыка узун болгаш, оларның уштары эң ыдыктыг өрээлдиң мурнундан көстү бээр, ынчалза-даа өргээниң даштындан көөрге, көзүлбес турган. Олар ында амдыгаа чедир бар. 10Ыдыктыг аптарада ийи калбак даштан өске чүү-даа чок болган d. Оларны ынаар Моисей Хорив дагның чанынга, кажан израильчилер Египеттен үнүп келгенде, Дээрги-Чаяакчы ол дагга чон-биле чагыг-керээ чарып алган соонда, суп каан чүве-дир e.

11Бурганның бараалгакчылары өргээниң ыдыктыг черинден үнүп келген. Аңаа турган бараалгакчылар, кандыг-даа салбырга хамааржып турган болза f, шупту арыгланып-ыдыктаны берген чүве-дир. 12Бүгү левит ыраажылар – Асаф, Еман, Идифун болгаш оларның оолдары g, ха-дуңмазы чуга лён хептер кедип алгаш, өргүл салыр бедигээштиң чөөн талазынга туруп алган, кимвалдар, чадаганнар, чанзыларга ойнап турганнар h. Бурганның 120 бараалгакчызы трубалар тудуп алган, олар-биле кады ойнап турган. 13Труба эдискен-даа, ырлашкан-даа улус аяннашкак кылдыр ойнап, Дээрги-Чаяакчыны алгап-мактап, Аңаа өөрүп четтирип тура, чаңгыс үннүг дег болган. Трубалар этсип, кимвалдар болгаш өске-даа хөгжүм херекселдеринге ыыткыр ойнавышаан i, олар Дээрги-Чаяакчыны: «Ол ачылыг-дыр, Ооң энерели кезээ шагда үстүп төнмес-тир» – деп алгап-мактап турганнар j.

Оон Дээрги-Чаяакчының өргээзин булут бүргей апкан. 14Ынчангаш Бурганның бараалгакчылары булуттуң хараазы-биле бараан болур харык чок апарган, чүге дээрге Дээрги-Чаяакчының өндүр чырыы Ооң өргээзин бүргей апкан k.
Copyright information for TyvTUV