2 Kings 15:8-15
Захария – Израильдиң хааны
8Иудеяның хааны Азарияның чагыргазының үжен сески чылында Иеровоамның оглу Захария Израильдиң хааны апаргаш, чуртту найысылалы Самарияга алды ай чагырган. 9Ада-өгбези ышкаш, ол Дээрги-Чаяакчының мурнунга бузут үүлгедип турган. Ол Наваттың оглу Иеровоамның – Израильди бачытче киирген хаанның бачыттарындан ойталаваан a. 10Иавистиң оглу Шаллум Захарияга удур сүлчээ кылган. Ол ону чон мурнунга өлүрүп кааш, ооң орнунга хаан апарган. 11Захарияның өске ажыл-херектери Израильдиң хааннарының чылдар бижилгезинде тодараттынып бижиттинген. 12Дээрги-Чаяакчының Иехуга: «Сээң үре-салгалың Израильдиң дүжүлгезинге дөрткү салгалга чедир саадаар» – дээн сөзү ынчаар боттанган b.Шаллум – Израильдиң хааны
13Иавистиң оглу Шаллум Иудеяның хааны Озияның чагыргазының үжен тоску чылында хаан апаргаш, чуртту Самарияга бир ай чагырган. 14Оон Гадийниң оглу Менаим Тирца хоорайдан c Самарияга чедип келген. Иавистиң оглу Шаллумну ол Самарияга өлүрүп кааш, ооң орнунга хаан апарган. 15Шаллумнуң өске ажыл-херектери, ооң кылган сүлчээзи Израильдиң хааннарының чылдар бижилгезинде тодараттынып бижиттинген.
Copyright information for
TyvTUV