2 Kings 20:12-19
Вавилоннуң элчиннери
(2 Чыл. 32:31; Иса. 39:1-8)
12Ол үеде Валаданның оглу, Вавилоннуң хааны Меродах-Валадан Эзекияның аарый бергенин дыңнап кааш, олче чагаа база белектер чорудупкан. 13Эзекия элчиннерни дыңнап алгаш, оларга эртине-байлак шыгжаар бүгү черлерин көргүскен: алдын-мөңгүннү, чаагай чыттыг чүүлдер биле улуг үнелиг үстерни, ок-чепсек шыгжаар черни – бодунуң шыгжамырларында бар-ла бүгү чүвени көргүскен a. Эзекияның ордузунда-даа, бүгү күрүнезинде-даа ооң оларга көргүспээн чүвези артпаан. 14Исайя медээчи Эзекия хаанга чедип келгеш: «Ол улус сеңээ чүнү чугаалады, олар кайыын келген-дир?» – деп айтырган. «Ырак чурттан – деп, Эзекия харыылаан. – Олар Вавилондан кээп чорду». 15Медээчи: «Олар сээң ордуңда чүнү көрдү?» – деп айтырган. «Олар мээң ордумда бүгү чүвени көрдү! – деп, Эзекия харыылаан. – Мээң эртине-байлак шыгжаар черлеримде оларга көргүспээн чүвем артпады». 16Ынчан Исайя Эзекияга: «Дээрги-Чаяакчының сөзүн дыңна: 17„Сээң ордуңда бар бүгү чүвени, сээң ада-өгбеңниң бөгүнге чедир чыып алган бүгү чүвезин Вавилонче алгаш баар хүннер кээр, маңаа чүү-даа артпас b – деп, Дээрги-Чаяакчы чугаалаан-дыр. – 18Сээң төрүткен, сээң ботталдырган үре-салгалыңның чамдыызын тудуп алгаш баар c, олар Вавилоннуң хаанының ордузунга акталаткан чалчалар апаар“» – дээн. 19А Эзекия Исайяга: «Сээң меңээ дамчытканың Дээрги-Чаяакчының сөзү эки-дир» – дээн. Чүге дээрге хаан «Мээң бодумнуң назынымда амыр-тайбың, айыыл чок чорук үргүлчүлээр боор» деп бодапкан чүве-дир.
Copyright information for
TyvTUV