2Sa 1:1-16 | TyvTUV | STEP | Саулдуң өлгениниң соонда , амалик чонну чылча шаап кааш , Давид Циклагче ээп чедип келген. Аңаа ол ийи хонган.

‏ 2 Samuel 1:1-16

Саулдуң өлгениниң дугайында Давидтиң билип кааны

1 Саулдуң өлгениниң соонда ^a, амалик чонну чылча шаап кааш ^b, Давид Циклагче ээп чедип келген. Аңаа ол ийи хонган. 2 Үшкү хонукта Саулдуң турлаандан качыгдал демдээ кылдыр хевин ора соп, бажында довурак-доозун чажып алган бир кижи Давидке чедип келгеш, аңаа черге чедир мөгейген.

3 Давид оон: «Кайыын келдиң?» – деп айтырган.

«Израильдиң турлаандан тынныг үндүм» – деп, ол харыылаан.

4 Давид: «Чүү болган чүвел? Меңээ чугаалап бер» – дээн.

Ол кижи тургаш: «Шериглер дайын шөлүнден дезип эгелээн. Дыка хөй улус өлүртүп кагды. Саул биле ооң оглу Ионафан база өлүп калды» – дээн.

5 «Саул биле ооң оглу Ионафан өлген деп канчап билип алдың?» – деп, Давид медээ эккелген оолдан айтырган.

6 Оол мынча деп харыылаан: «Гелвуя даанга таваржы бээримге, аңаа Саул бодунуң чыдазынга чөленип алган турду. А дайзынның дайынчы тергелери база аъттыг шериглери олче чоокшулап кел-ле чытты ^c. 7 Саул хая көрнүп келгеш, мени көрүп кааш, кыйгырыпты. 8 Мен аңаа чеде бергеш: „Дыңнап тур мен“– дидим. Ол: „Кым сен?“– деп айтырарга, мен: „Амалик кижи-дир мен“– деп харыыладым. 9 Ынчан Саул менден: „Бээр чедип келгеш, мени өлүрүп каавыдам! ^d Мен хинчектенип-бачыдап тур мен, а амы-тыным ам-даа үзүлбейн тур“– деп диледи. 10 Балыглаткаш, ол чурттап шыдавас деп чүвени билип кааш, мен аңаа чеде бергеш, ону өлүрүп кагдым. Мен ооң бажынга кедип чорааны оваадайын база холунга суп чорааны билектээжин ап алгаш, дээргим силерге эккелдим».

11 Ынчан Давид болгаш ооң кады чораан улузу качыгдап, хептерин ора соккулап алганнар ^e. 12 Олар дайынга өлүртүп каан Саул база ооң оглу Ионафан дээш, Дээрги-Чаяакчының аг-шерии дээш, израиль чон дээш кежээге чедир ыглап-сыктап, чүнү-даа чивейн, кажыыдап турганнар.

13 Давид медээ эккелген оолдан: «Кайыын келген сен?» – деп айтырган. «Мен бо черже көшкен амалик кижиниң оглу-дур мен» – деп, оол харыылаан.

14 Давид оолга: «Дээрги-Чаяакчының шилип алган хаанынче хол көдүреринден канчап кортпааның ол?» – дээн ^f.

15 Оон бодунуң бир кижизин кыйгырыпкаш: «Баргаш, ол чүвени өлүрүп каавыт» – дээрге, оозу амалик кижини шанчып өлүрүп каан.

16 Давид амалик кижиге: «Бодуңнуң бажыңче бодуң-на хан кудуп алдың. „Дээрги-Чаяакчының шилип алган хаанын өлүрүп кагдым“дээн сөстериң-биле сен бодуң-на бодуңга удур херечилеп алдың» – дээн.