2 Samuel 2:18-23
18Аңаа Саруйяның Иоав, Авесса база Асаил деп үш оглу турган a. Асаил, хову черниң чээрени дег, кончуг кашпагай болган. 19Ол Авенирниң изин оң, солагай талазынче-даа чандыр баспайн, ызырты истеп чорупкан. 20Авенир хая көрнүп келгеш: «Сен сен бе бо, Асаил?» – деп айтырган. Асаил: «Ийе, мен-дир мен» – дээн. 21Ынчан Авенир мынча дээн: «Оң азы солагай талаже ээпкеш, оолдарның бирээзин сегирип алгаш, ооң ок-чепсээн ап ал». Ынчалза-даа Асаил Авенирден чыдып каар хөңнү чок болган. 22Авенир катап база Асаилге сагындырып чугаалаан: «Мени сүрериң соксадып көрем. Сени өлүрер хөңнүм чогул. Ооң соонда сээң акың Иоавтың арнынче канчап көөр мен?» 23Ынчалза-даа Асаил чыдып каарын күзевээн. Ынчан Авенир чыдазының соңгу ужу-биле ооң иштинче шанчыптарга, ооргазындан үнүп келген. Асаил барып ушкаш, ол-ла черинге өлүп калган. Асаилдиң кээп дүшкеш, өлүп калган черин таварып эрткен кижи бүрүзү аңаа доктаар турган.
Copyright information for
TyvTUV