eЫд. ыр. 118:156
2 Samuel 24:10-17
Бурганның Давидке кеземче онааганы
(1 Чыл. 21:7-17)
10Чонну санап түңнээниниң соонда, Давидтиң арын-нүүрү оттуп келген a. Ол Дээрги-Чаяакчыга мынча дээн: «Ону кылгаш, улуг бачыт үүлгеткен-дир мен b. О Дээрги-Чаяакчы, мен ам Сенден дилеп тур мен, Бодуңнуң чалчаңның буруузун адырып көр. Мен дыка-ла мугулай чүве кылган-дыр мен c». 11Даартазында эртен Давид туруп кээриниң мурнунда, Дээрги-Чаяакчы Бодунуң өттүр көөр медээчизи Гадка d сөзүн ажыдып: 12«Давидке баргаш, Дээрги-Чаяакчының бо сөзүн дамчыт: сеңээ Мен үш чүүл саналдап тур мен. Оларның кайы-бирээзин бодуңга шилип ал, ону кылыр мен» – дээн. 13Гад Давидке чедип келгеш чугаалаан: «Чеди чыл дургузунда сээң чуртуңга аш-чут болзун бе, үш ай иштинде дайзыннарыңга сүрдүргеш, дезип маңнаар сен бе азы үш хонук иштинде сээң чуртуңга хамчык аарыг болзун бе? Ам таптыг боданып алгаш, мени чорудупкан Бурганга чугаалаар кылдыр харыызын бер». 14Давид Гадка мынча дээн: «Меңээ дыка берге-дир. Дээрги-Чаяакчының өршээли улуг болганда e, бис шуптувус Ооң холунга кирээли. Чүгле кижилер холунга мен кирбээйн». 15Дээрги-Чаяакчы израильчилерже ол эртенден эгелээш, чогуур хуусаага чедир хамчык аарыгны чорудупкан f. Дан хоорайдан Беэр-Шева хоорайга чедир g чондан 70 000 кижи өлген. 16Бурганның төлээзи Иерусалимни хоозурадып каар дээш холун сунарга h, Дээрги-Чаяакчы чонга айыыл-халап болганын кээргей бергеш i: «Болзун че! Ам холуң бадырып ал» – деп, чонну узуткап турар төлээзинге чугаалаан. Дээрги-Чаяакчының төлээзи ол өйде иевус аймак-сөөктүг Орнаның тараа шаңының чанынга турган чүве-дир. 17Чонну узуткап турган Бурганның төлээзин көрүп кааш, Давид Дээрги-Чаяакчыга: «Хоойлу-дүрүм үреп, бачыт кылган кижи мен-дир мен. А хойлар дег бо хөөкүй чон чүнү канчапкан деп? Сээң холуң чүгле мени база мээң төрел бөлүүмнү кезеткей аан» – деп чугаалаан.
Copyright information for
TyvTUV