Deu 19:1-13 | TyvTUV | STEP | «Дээрги-Чаяакчы Бурганың Бодунуң сеңээ берип турар черин ээлээн чоннарны узуткап каарга, ол черни эжелеп ап, оларның хоорайларынга, бажыңнарынга чурттай бээр сен.

‏ Deuteronomy 19:1-13

Хоргадал-хоорайлар

(Сан. 35:9-34; Ы. х. к. 4:41-43; Иис. 20:1-9)

1 «Дээрги-Чаяакчы Бурганың Бодунуң сеңээ берип турар черин ээлээн чоннарны узуткап каарга, ол черни эжелеп ап, оларның хоорайларынга, бажыңнарынга чурттай бээр сен. 2 Ынчан Дээрги-Чаяакчы Бурганыңның сеңээ ээлээр кылдыр берип турары черге үш хоорайдан бодуңга аңгылап ал. 3 Дээрги-Чаяакчы Бурганыңның сеңээ хуваап берген черин үш кезекке үскеш, ол хоорайларже оруктардан кылып ал. Ол хоорайлар кандыг-даа өлүрүкчү кижиниң хоргадаар чери болур.

4 Ынаар дезип чоруй баргаш, дириг артып каап шыдаар өлүрүкчү кижиге хамаарышкан дүрүм бо-дур. Ооң мурнунда өжээннешпейн турган кижизин сагыштыы-биле эвес, билбейн эндеп каан кижи дугайында чугаалап турары ол. 5 Ооң чижээ бо-дур. Бир кижи өске кижи-биле кады арыгже ыяш кезип киргеш, балды туткан холун карбаш кылырга, балды сывындан уштунган демир бис эжинге дээптерге, оозу чок апарган болза, өлүрүкчү болган кижи, дириг артар дээш, демги үш хоорайның кайы-бирээзинче дезе берзин ^a. 6 Орук хөлүн эрттир ырак болур болза, өлүрткен кижи дээш өжээн негээн төрелиниң сеткили хайнып-хөлзеп, өлүрүкчүнү сүрүп чорупкаш, чыпшыр четкеш, өлүрүп каап болур, а демги өлүрүкчү өлүмге шииттирбес ужурлуг, чүге дээрге өлүрүп каан кижизи-биле ооң мурнунда өжээннешпейн турган-дыр. 7 Ынчангаш мен сеңээ „Бодуңга үш хоорайдан аңгылап ал“деп айтып-чагааным ол.

8 – 9 Бир эвес бөгүн сеңээ айтып-чагып турарым шупту айтыышкыннарны күүседирин кызыдарыңга база Дээрги-Чаяакчы Бурганыңга ынак бооп, бүгү назыныңда Ооң оруктарын эдерериңге, Дээрги-Чаяакчы Бурганың, ада-өгбеңге даңгыраглап турганы дег, девискээриңни делгемчидип, ада-өгбеңге бээр бооп аазааны бүгү черни сеңээ бээр болза, ол үш хоорайга немей өске үш хоорайны база аңгылап алыр сен. 10 Ынчан Дээрги-Чаяакчы Бурганыңның сеңээ хуваап берип турары черге кем-буруу чок кижиниң ханы төгүлбес, а сен ооң өлүмү дээш буруудавас сен ^b.

11 Ынчалза-даа бир кижи өске кижи-биле өжээннешкеш, ону өлүрер дээш кедеп манап алгаш, олче халдап, өлүрүп кааш ^c, ол хоорайларның кайы-бирээзинче дезе бээр болза, 12 ооң чурттап турган хоорайының даргалары, ол кижини тудуп эккээр кылдыр, улус чорудупсун база ону өлүрүп каар кылдыр, өжээн негекчизиниң холунга хүлээдип берзин. 13 Сен ол кижиге хайыра бербе; актыг кижиниң өлүмү дээш кем-бурууну Израильден чайладып каавыт ^d, ынчан сеңээ эки-чаагай апаар».