Exodus 19:1-6
Чагыг-керээни чарарынга белеткел
1Израильчилер египет черден үнүп чоруткандан бээр үшкү айда, таптыг-ла ай чаазында Синай деп ээн кургаг ховуга чедип келгеннер. 2Олар Рефидимден көжүп үнгеш, Синай ховузунга чедип кээп, ында турар даг дужунга турлагжып алганнар a. 3Моисей Бурганга ужуражыры-биле дагже үнүп бар чыткан. Дээрги-Чаяакчы ону дагдан кый деп, мынча дээн: «Иаковтуң үре-салгалы болур израиль чонга мону чугаала: 4„Египетчилер-биле чүнү кылганымны база силерни эзир чалгыннарынга дажыглап b, Бодумче эккелгенимни көрген силер. 5Ынчангаш Мээң сөзүмнү тооп дыңнап, Мээң чагыг-керээмни сагыыр болзуңарза, бүгү чоннар аразындан Мээң улуг үнелиг өнчү-хөреңгим болур силер c. Бүгү чер-делегей Меңээ хамааржыр болгай d, 6а силер Мээң бараалгакчыларымдан тургустунган онзагай күрүне база ыдыктыг чон болу бээр силер e“. Израиль чонга дамчыдып чугаалаар сөстериң ол-дур».
Copyright information for
TyvTUV