Eze 33:10-20 | TyvTUV | STEP | Кижи амытан, израиль чонга: „Кемниг херектеривис биле бачыттарывысты чүктеп чор бис, оларның ужун эстип-хайлып чор бис . Канчап амы-тынныг артар улус боор бис?“

‏ Ezekiel 33:10-20

Бурган улусту өршээрин күзеп турар

(Иез. 18:1-32)

10 Кижи амытан, израиль чонга: „Кемниг херектеривис биле бачыттарывысты чүктеп чор бис, оларның ужун эстип-хайлып чор бис ^a. Канчап амы-тынныг артар улус боор бис?“– дээр-дир силер деп чугаала. 11 Оларга мону дамчыт. Дириг Бодумнуң адым-биле даңгыраглап тур мен ^b: Мен бачыттыгларның өлүмүн эвес, а боттарының оруктарындан чайлап, амы-тынныг артарын күзеп тур мен – деп, Дээрги-Бурган-Чаяакчы медеглээн. – Менче эглип келиңер, бузуттуг оруктарыңардан чайлаңар! Израиль чон, чүге өлүр ужурлуг сен?! ^c

12 Ынчангаш, кижи амытан, чонуңга мону дамчыт: бир эвес чөптүг-шынныг кижи кемниг херек үүлгедир болза, ооң чөптүг чоруу ону камгалавас; бузуттуг-бак кижиниң кем-буруузу, ол оон ойталаан болза, ону узуткавас. Бир эвес чөптүг-шынныг кижи бачыт үүлгедир болза, бодунуң биеэги чөптүг чоруу-биле амы-тынын камгалап шыдавас. 13 Бир эвес Мен чөптүг-шынныг кижиге: „Ыяап-ла амы-тынныг артар сен“– деп чугаалап каарымга, ол бодунуң биеэги чөптүг чоруунга ынангаш, бузут үүлгедир болза, ооң бүгү чөптүг-шынныг херектериниң чаңгызын-даа сагынмас мен, ол кижи үүлгеткен бузудунуң ужун өлүп каар ^d. 14 А бир эвес Мен бузуттуг-бак кижиге: „Сен ыяап-ла өлүп каар сен“– дээримге, ол кижи бачыдындан ойталааш, шынныг база чөптүг чорук кылып эгелээш, 15 бодунга өрелиг кижиниң арттырып каан долаазын эгидип ^e, оорлап алган чүвезиниң өртээн төлеп ^f, багай чүнү-даа кылбайн, амыдыраарының хоойлуларын күүседип чурттаар болза, ол кижи ыяап-ла амы-тынныг артып, өлбейн баар. 16 Ооң үүлгеткен хамык бачыттарының чаңгызын-даа аңаа сагындырбас мен. Ол кижи шынныг база чөптүг чорук кылып турар болза, ыяап-ла амы-тынныг артып каар.

17 А сээң чонуң: „Дээрги-Чаяакчының оруу шынныг эвес-тир“– дээр-дир. Чок, оларның оруу харын шынныг эвес-тир. 18 Бир эвес чөптүг-шынныг кижи бодунуң чөптүг чоруундан ойталап, кем-буруу үүлгедир болза, оозу дээш өлүп каар. 19 А бир эвес бузуттуг-бак кижи бодунуң кем-буруузундан ойталап, шынныг база чөптүг чорук кылып эгелээр болза, ол дээш, амы-тынныг артар. 20 А силер: „Дээрги-Чаяакчының оруу шынныг эвес-тир“– дээр-дир силер. Израильчилер, Мен кайыңарны-даа оруктарыңар дээш шиидер мен».