Ezekiel 47:13-21
Израильдиң чаа кызыгаарлары
(Сан. 34:1-15)
13Дээрги-Бурган-Чаяакчы мынча дээн: «Израильдиң он ийи аймаанга черни өнчү кылдыр хуваап бээриңер кызыгаарлар бо-дур. Иосифтиң салгалдары ийи кезек чер алыр. 14Черни аймактар аразынга дең кылдыр үлээр силер. Мен ол черни ада-өгбеңерге бээр бооп даңгыраглаан мен a, ынчангаш ол силерниң өнчүңер болур. 15Черниң соңгу кызыгаары бо-дур: Улуг далайдан эгелээш, Хетлонну тавартыр Лево-Хаматты эрткеш, Цедадче, 16Беротче, Сивраимче (ол хоорай Дамаск биле Хаматтың девискээрлериниң аразында турар) база Авранның кызыгаарында Гацар-Тихонче шөйлүр. 17Ынчалдыр кызыгаар далайдан Дамаск биле Хаматтың соңгу кызыгаарында турар Гацар-Энанче шөйлүр. Соңгу кызыгаар ол-дур.18Чөөн чүкке кызыгаар Авран болгаш Дамаск аразы-биле, Иордан хемниң кыдыын дургаар галаад чер болгаш израиль черниң аразы-биле Дус далайже, шуут Тамарга чедир шөйлүр. Чөөн кызыгаар ол-дур.
19Мурнуу чүкке кызыгаар Тамардан Кадестиң чанында Мерива суунга четкеш, оон Египет-биле кызыгаарда аккан хемниң уну-биле Улуг далайга чедир шөйлүр b. Мурнуу кызыгаар ол-дур.
20Барыын чүкке Лево-Хаматтың дужунда черге чедир кызыгаар – Улуг далай болур. Барыын кызыгаар ол-дур.
21Черни араңарда Израильдиң аймактарын ёзугаар хуваап алыр силер.
Copyright information for
TyvTUV