Genesis 12:10-20
Аврам биле Сара Египетте
10Ооң чурттап турар черинге коргунчуг аш-чут эгелээрге a, Аврам түр када чурттаары-биле Египетче чорупкан. 11Египетке чоокшулап келгеш, ол кадайы Сарага мынча дээн: «Сени дыка чараш херээжен деп билир мен. 12Египетчилер сени көрүп кааш: „Бо ооң кадайы-дыр“– дээш, мени өлүрүп каарлар, а сени дириг арттырып аарлар. 13Оларга сен: „Ооң дуңмазы-дыр мен“– деп чугаала. Ынчан шупту чүве эки болур, сен мээң амы-тыным алыр сен b». 14Кажан Аврам Египетке чедип кээрге, шак-ла ынчаар болган. Египетчилер Сараның онза чаражын эскерип кааннар. 15Фараоннуң нояннары ону көрүп кааш, фараонга мактап четкеннер; Сараны фараоннуң ордузунче алгаш барганнар. 16Сараның ачызы-биле Аврамның ажыл-херээ эки чогуп турган; ооң эр, кыс кулдары, шээр малы, бода малы, элчигеннери, тевелери бар апарган. 17Ынчалза-даа Аврамның кадайы Сараны ап алганы дээш, фараонга болгаш ооң чоок кижилеринге Дээрги-Чаяакчы аар айыыл-халап таварыштырып туруп берген. 18Фараон Аврамны келдиртип алгаш: «Чүнү кылып алганың ол? Чүге ону кадайым-дыр деп чугаалавааның ол? 19Чүге ону дуңмам-дыр дидиң? Мен ол дугайын билбейн, ону кадай кылдыр ап алган-дыр мен. Кадайыңны дедир ап алгаш, ыңай чору» – дээн. 20Фараон чалчаларынга Аврамны кадайы-биле база бүгү-ле өнчү-хөреңгизи-биле ыңай үдеп чорудуптарын дужааган.
Copyright information for
TyvTUV