Genesis 22:1-10
Бурганның Исаакты өргүлге салырын дужааганы
1Ол болуушкуннар соонда элээн үе эрткенде, Бурган Авраамны шенеп, хынаар деп шиитпирлээн a. Бурган: «Авраам!» – деп кыйгырарга, ол: «Мында мен» – деп харыылаан b. 2Бурган мынча дээн: «Эр чаңгыс ынак оглуң Исаакты алгаш, Мориа деп черже аппар c. Ону ында дагларның кайы-бирээзинге Меңээ өргүл кылдыр сал. Каяа дээрзин Мен айтыптар мен». 3Авраам эртен эрте тургаш, өргүлге хереглээр ыяжын чаргаш, элчигенге чүдүргеш, бодунуң ийи чалчазы биле оглу Исаакты эдерткеш, Бурганның айыткан черинче чорупкан. 4Авраам орукка чораанының үшкү хүнүнде ырактан ол черни көрүп каан. 5Авраам чалчаларынга мынча дээн: «Силер элчиген-биле кады маңаа артып калыңар. Оглум-биле ынаар чедип мөгейип кааш, дедир чедип кээр бис». 6Авраам оглу Исаакка өргүлге кыпсыр ыяшты чүктеткеш, боду изиг көс биле бижекти алгаш, иелээ чорупканнар. 7Исаак: «Ачай!» – дээрге, Авраам: «Дыңнап тур мен, оглум» – дээн. «Өргүлге хереглээр от биле ыяшты көрүп тур мен. А өргүп өрттедир мал кайыл?» – деп, Исаак ачазындан айтырган. 8Авраам: «Өргүп өрттедир малды Бурган Боду билип хайырлаар, оглум» – дээн. Оон улаштыр чорупканнар. 9Бурганның айыткан черинге чедип келгеш, Авраам өргүл салыр бедигээш кылгаш, аңаа ыяжын өрттедиринге белеткеп алган. Оон оглу Исаакты бедигээште ыяштың кырынга хүлүп салып алгаш, 10ону өлүрери-биле бижээн тудуп алган.
Copyright information for
TyvTUV