Gen 29:31-30:24 | TyvTUV | STEP | Дээрги-Чаяакчы Лияга ашаа ынак эвес деп чүвени көрүп каан, ынчангаш ону ажы-төлдүг болур кылып каан . А Рахил ажы-төлденир салым чок болган.

‏ Genesis 29:31-35

Лия биле Рахилдиң адааннажылгазы

31 Дээрги-Чаяакчы Лияга ашаа ынак эвес деп чүвени көрүп каан, ынчангаш ону ажы-төлдүг болур кылып каан ^a. А Рахил ажы-төлденир салым чок болган. 32 Лия иштели бергеш, оол божуп алган. Оглун ол Рувим ^{▼▼ «Рувим» – «муңгарал көөр» деп еврей сөстерге дөмейлешкек. «Симеон» – «дыңнаар» деп сөске дөмейлешкек. «Левий» – «каттыжар» деп сөске дөмейлешкек. «Иуда» – «алдаржыдар» деп сөске дөмейлешкек.} деп адап алган. Лия: «Дээрги-Чаяакчы мээң муңгаралымны көрүп каан-дыр. Ам-на ашаам меңээ ынак апаар боор» деп бодаан. 33 Ол база катап иштели бергеш, оол божуп алган. «Дээрги-Чаяакчы ашаам меңээ ынак эвес деп дыңнап кааш, бо оглумну база берди» – деп чугаалааш, Лия оглун Симеон* деп адап алган. 34 Ол оон база катап иштели бергеш, оол божуп алгаш: «Ашаам ам-на мээң сеткилимге каттыжар боор, чүге дээрге мен аңаа үш оолду төрүп бердим ышкажыл» – деп чугаалаан. Ынчангаш Лия оглун Левий* деп адап алган. 35 Ооң соонда Лия база катап иштели бергеш, ам база оол божуп алгаш: «Мен ам Дээрги-Чаяакчыны алдаржыдып алгаар мен!» – деп чугаалаан. Ол оглун Иуда* деп адап алган. Ооң соонда ол божуурун соксаткан.

‏ Genesis 30:1-24

1 А Рахил Иаковка уруг божуп берип шыдавас болганын билип кааш, угбазынга дыка адааргап турган. Рахил Иаковка: «Меңээ ажы-төлден бер! А бир эвес хоржок болза, мен өлүп каайн» – дээн.

2 Иаков ажына бергеш: «Сеңээ ажы-төл бербейн турар Бурган мен-дир мен бе?» – дээн.

3 Рахил: «Мээң чалчам Валла бар-дыр. Ооң-биле удуп көрем, ол меңээ төлден төрүп берзин. Ону дамчыштыр-даа болза мен ажы-төлдүг болуйн» – деп дилээн. 4 Ынчангаш бодунуң чалчазы Валланы Иаковка кадай кылдыр берипкен. Иаков Валла-биле удуурга, 5 Валла иштели бергеш, Иаковка оол божуп берген. 6 Рахил: «Бурган шын шииткен-дир. Ол мээң дилээмни дыңнааш, меңээ оолду берди» – деп чугаалаан. Ынчангаш оолду Дан ^{▼▼ «Дан» – «шын шииткел» деп еврей сөске дөмейлешкек. «Неффалим» – «адааннажыр» деп сөске дөмейлешкек. «Гад» – «чедимче» деп сөске дөмейлешкек. «Асир» – «амыр-чыргал» деп сөске дөмейлешкек. «Иссахар» – «орнаар, орнунга» деп сөске дөмейлешкек. «Завулон» – «үнелээр» деп сөске дөмейлешкек.} деп адап алган. 7 Рахилдиң чалчазы Валла база катап иштели бергеш, Иаковка база бир оол божуп берген. 8 Рахил мынча дээн: «Бурганның дузазы-биле ^{▼▼ Еврей сөзүглелде бо сөстерниң утказы эки билдинмес. Болгу дег өске утказы мындыг: «Күштүг адааннажыышкын-биле».} мен угбам-биле адааннаштым – ону ажып алдым!» Оолду Неффалим* деп адап алган.

9 Ол үеде Лия моон соңгаар божувас-тыр мен деп бодааш, бодунуң чалчазы Зелфаны Иаковка кадай кылдыр берипкен. 10 Зелфа Иаковка оол божуп бээрге, 11 Лия: «Чедимчелиг болган-дыр» – дээн. Оолду Гад* деп адап каан. 12 Зелфа Иаковка ийи дугаар оглун божуп бээрге, 13 Лия: «Амыр-чыргалдыын! Мени херээженнер амыр-чыргалдыг дээрлер боор!» – дээн. Оолду Асир* деп адап каан.

14 Кызыл-тас кезилдезиниң үезинде Рувим ховуже чорупкаш, оон мандрагор деп дазыл-чемиштер ^{▼▼ Мандрагор – дазылы кижи мага-бодунга дөмей үнүш. Чөөн чүк улузу ону хандыкшыл оттурар шынарлыг кылдыр санап турган (Сол. ыр. 7:14 көр).} тып алгаш, оларын авазы Лияга эккеп берген чүве-дир. Рахил Лиядан: «Оглуңнуң эккеп бергени мандрагорундан меңээ берем» – деп дилээн.

15 Лия аңаа: «Мээң ашаамны былаап алганың сеңээ эвээш-тир бе? ^f Ам кээп мээң оглумнуң эккелген мандрагорларын база алыксай бердиң бе?» – дээн.

Рахил аңаа мынча деп саналдаан: «Бо дүне Иаков сээң-биле удузун, ол мандрагорларның орну болур ыйнаан».

16 Кежээ Иаков ховудан аалынче чанып орда, аңаа уткуй Лия үнүп келгеш, мынча дээн: «Бо дүне мээң-биле хонар сен. Мен оглумнуң тып эккелгени мандрагорлары-биле дуңмамдан сени орнап алдым». Ол дүне Иаков Лия-биле удаан. 17 Бурган Лияны кээргээн, ынчангаш ол иштели берген. Лия Иаковка беш дугаар оглун божуп бергеш: 18 «Мен бодумнуң чалчамны ашаамга бериптеримге, Бурган ооң орнунга бо төлдү меңээ берген-дир» – дээн. Ол оглун Иссахар ^{▼▼ 30:6-да немелде тайылбырны көр.} деп адап алган. 19 Лия база катап иштелип алгаш, Иаковка алды дугаар оглун божуп берген. 20 Лия мынча дээн: «Бурган меңээ эки белек хайырлады. Ашаам ам мени үнелээр боор. Чүге дээрге мен аңаа алды оолду божуп бердим». Ынчангаш оглун Завулон ^{▼▼ 30:6-да немелде тайылбырны көр.} деп адап алган. 21 Ооң соонда Лия кыс божуп алгаш, уруун Дина деп адап алган.

22 Бурган Рахилдиң дугайын база бодап келгеш, ооң чаннып дилээнин дыңнап кааш, ону ажы-төлдүг болур кылып каан. 23 Ол иштели бергеш, оол божуп алгаш: «Бурган мени бужар-бак аттан адырып кагды» – дээн. 24 Оглун ол Иосиф ^{▼▼ «Иосиф» – «адырар» деп сөске-даа, «ам база бээр» деп сөске-даа дөмейлешкек.} деп адап алгаш: «Дээрги-Чаяакчы меңээ ам база оолдан берзин» – дээн.