Gen 36:1-19 | TyvTUV | STEP | Исавтың үре-салгалының дугайында чугаа бо-дур. (Исавты Эдом деп база адаар .)

‏ Genesis 36:1-19

Исавтың үре-салгалы

(1 Чыл. 1:35-37)

1 Исавтың үре-салгалының дугайында чугаа бо-дур. (Исавты Эдом деп база адаар ^a.)

2 Исав хананей чоннуң уругларын: хет Элоннуң уруу Адданы база хиввей Цивеоннуң оглу Ананың уруу Оливеманы бодунга кадай кылдыр ап алган. 3 Измаилдиң уруу, Навайоттуң дуңмазы Васематты база ап алган ^b. 4 Исавка Адда – Элифаз, а Васемат – Рагуил деп оолдарны божуп берген. 5 Оливема аңаа Иеуш, Иеглом болгаш Корах деп оолдарны божуп берген. Исавтың ханаан черге төрүттүнген оолдары бо-дур.

6 Исав бодунуң кадайларын, оолдарын, кыстарын база аалында кулдарын эдертип алгаш, мал-маганын, ханаан черге келгеш чыып алган өнчүзүнүң шуптузун ап алгаш, дуңмазы Иаковтан аңгыланып, өске черже чоруй барган. 7 Чүге дээрге алышкыларның өнчү-хөреңгизи чаңгыс черге кады турар хире эвес хөй апарган, мал-маганы көжүп келген черинге сыңышпастай берген чүве-дир. 8 Исав Сеир дагларынга турумчуп алган. Исав дээрге-ле Эдом ол-дур.

9 Сеир дагларында чурттап чоруур эдом чоннуң өгбези болур Исавтың үре-салгалы бо-дур. 10 Исавтың оолдарының аттары мындыг: Адда деп кадайындан оглу Элифаз, Васемат деп кадайындан оглу Рагуил.

11 Элифазтың Теман, Омар, Цефо, Гатам база Кеназ деп оолдары бар турган. 12 (Исавтың оглу Элифазтың Тимна дээр кул-кадайы база бар турган. Ол Элифазка Амалик деп оолду божуп берген ^c.) Исавтың кадайы Адданың талазындан салгалы бо-дур.

13 А Рагуилдиң Нахат, Зерах, Шамма болгаш Миза деп оолдары бар турган. Исавтың кадайы Васематтың талазындан салгалы бо-дур.

14 Цивеоннуң оглу Ананың уруу, Исавтың база бир кадайы Оливеманың оолдары бо-дур: Иеуш, Иеглом болгаш Корах.

15 Исавтың үре-салгалының баштың кижилери бо-дур.

Исавтың дун оглу Элифаз дараазында баштыңнарның өгбези боор: Теман, Омар, Цефо, Кеназ, 16 Корах, Гатам, Амалик. Эдом черде Элифазтың талазындан баштыңнар ол-дур. Олар Исавтың кадайы Адданың салгалы чүве-дир.

17 Исавтың оглу Рагуилдиң оолдары бо-дур: Нахат, Зерах, Шамма, Миза. Эдом черде Рагуилдиң талазындан баштыңнар ол-дур. Олар Исавтың кадайы Васематтың салгалы чүве-дир.

18 Исавтың кадайы Оливеманың оолдары бо-дур: Иеуш, Иеглом, Корах. Олар Исавтың кадайы Оливеманың талазындан баштыңнар болган чүве-дир. 19 Исавтың салгалы бо-дур, оларның аразындан баштыңнар болганнары ол-дур. Ол дээрге Эдом-дур.