Jer 49:7-22 | TyvTUV | STEP | Эдом чон дугайында Аг-шериглиг Дээрги-Чаяакчы мынча дээн: «Таанда-ла Теманда мерген угаан артпаан бе, сарыылдыг улус арга-сүме берип шыдавастаан бе, оларның мерген угааны бойлап калган бе?

‏ Jeremiah 49:7-22

Эдом дугайында медеглел

(Авд. 1:1-9)

7 Эдом чон дугайында ^a Аг-шериглиг Дээрги-Чаяакчы мынча дээн:

«Таанда-ла Теманда ^b мерген угаан артпаан бе,
сарыылдыг улус арга-сүме берип шыдавастаан бе,
оларның мерген угааны бойлап калган бе?
8 Деданның чурттакчылары ^c, хая көрүнмейн, дезип маңнаңар,
ханы куйларга чаштына бериңер,
чүге дээрге Исавтың үре-салгалынга онаашкан айыыл-халапты ам ыдар мен,
ону кезедир үем келген-дир!
9 Бир эвес сеңээ кат-чимис чыыкчылары чедип келген болза,
олар элээн катты арттырып кагбас бе?
Дүне када оорлар кээп чораан болза,
олар чүгле бодунга чеже херегил, ынчаны оорлап албас бе?
10 А Мен Эдомну куругладыр үптээр мен,
ооң чүве чажырар черлерин ажыдар мен,
ооң чону чаштып шыдавас! Ол чок апаар,
ооң үре-салгалы, ха-дуңмазы база кожалары узуткаттырар.
11 Эдом бодунуң өскүстерин Меңээ арттырып кагзын,
оларның амы-тынын кадагалаар мен,
ооң дулгуяк херээженнери Меңээ идегеп болур!»

12 Дээрги-Чаяакчы мынча дээн: «Кеземчеге таварышпас ужурлуг улус безин бо дашканы төндүр ижер! Кай, сен кеземчеден чайлаар сен бе? Чок, оон чайлавас сен, бо дашканы төндүр ижер сен! ^d 13 Бодум-биле даңгыраглап тур мен! ^e – деп, Дээрги-Чаяакчы медеглээн, – Восора хоорай ^f коргунчуг байдалга, бак атка киреринге, хоозуралга болгаш каргышка чыгаттырган, аңаа чагырткан бүгү хоорайлар кезээ мөңгеде бузундулар бооп хуулар».

14 Дээрги-Чаяакчыдан келген медээни дыңнаан мен.
«Шерииңер чыып, Эдомга удур чаалажып үнүңер!» – деп медээ чедирзин дээш
айбычы кижини чорудупкан болган.
15 «Мен сени чоннар аразынга чөгенчиг чон кылып каар мен,
улус аразынга аажок бак көрдүрер сен.
16 Чалымнарда чурттаан, даглар баштарын ээлээн чон,
бодуңнуң түрлүүңге ^{▼▼ «Түрлүүңге» деп сөстүң утказы эки билдинмес. Ооң болгу дег өске утказы мындыг: «Коргунчуг дүрзү-бурганыңга».}, турамык чорууңга дуурайладып алдың.
Эзир куш дег, бедик черге уя тудуп алдың ^h,
ынчалза-даа Мен сени оортан дүжүр октаптар мен – деп, Дээрги-Чаяакчы медеглээн. –

17 Эдом хоозуралга чыгаттырар! Чаны-биле эрткен кижи бүрүзү ооң бузундуларын көргеш, элдепсинер база кочулап сыгырар ⁱ. 18 Үреп бузуп каан Содом биле Гоморрага дег, олар-биле кожаланчак хоорайларга дег ^j, Эдомга база чаңгыс-даа кижи чурттавас, ол черге кижи амытан турумчувас ^k – деп, Дээрги-Чаяакчы чугаалаан. – 19 Иордан хемниң эриинден ^l чечектелген одар-белчиирже ^{▼▼ Азы: «Быжыг аал-оранче».} үнүп келген арзылаң дег, Мен база эдом чонну далаштырып сывыртап, ону чагырар кижини шилип, томуйлаар мен. Меңээ дөмей кым барыл, Менден кым харыы негээрил? ⁿ Меңээ удурланып шыдаар кадарчы бар бе?» ^o

20 Ынчангаш Дээрги-Чаяакчының Эдом дугайында шиитпирин, Теманның чурттакчыларынга удур Ооң бодап алган чүвезин дыңнаңар ^p. Дайзын сүрүг малдың хураганнарын алгаш баар, ооң кадында Бурган одар-белчиирлерни хоозурадып каар. 21 Эдом буступ дүжерге, дааш-шимээнден чер сирилээр, ыы-сыы Кызыл далайга чедир дыңналыр. 22 Эзир бедидир ужуп үнгеш, олчазын шүүргедеп, Восораның кырынга чалгыннарын хере сунар! ^q Ол хүн Эдомнуң дайынчылары кортканындан, божаан кадайлар дег, сириңейни бээр ^r.