John 1:19-28
Иоанн Медеглекчиниң херечилели
(Мф. 3:1-12; Мк. 1:2-8; Лк. 3:15-17)
19Иоанның херечилээни бо-дур. Иерусалим чурттуг иудейлер Иоанндан: «Кым сен?» – деп айтырзын дээш, олче Бурганның бараалгакчыларын база левиттерни чорудупканнар. 20Иоанн дорт харыы бээринден ойталавайн, ажыы-биле мынча дээн: «Мен Бурганның шилээн Христозу эвес мен» a. 21Олар оон: «Ынчаарга чогум кым сен? Илия сен бе?» – деп айтырганнар b. Ол: «Чок» – деп харыылаан. «Азы Бурганның аазааны медээчи c сен бе?» – деп айтырганнар. Иоанн: «Чок» – деп харыылаан. 22Олар ынчан: «Кым сен? – деп түңнелинде айтырганнар. – Бисти айбылап чорудупкан улуска чүү дээривисти чугаала. Бодуңну кым мен дээр сен?» 23Ол мынча деп харыылаан: «Мен – Исайя медээчиниң чугаалааны дег: „Ээн кургаг ховуга: ‘Дээрги-Чаяакчыга оруктан белеткеңер!’ деп алгырган үн“ – мен» d. 24Айбылаттырган улус фарисейлер турган. 25Олар Иоанндан мынча деп айтырган: «Сен Бурганның шилээн Христозу-даа, Илия-даа, Бурганның аазааны медээчи-даа эвес болзуңза, улусту чүге сугже суп турарың ол?» 26Иоанн оларга: «Мен улусту сугже сугар мен, ынчалза-даа силерниң араңарда билбезиңер бир Кижи бар-дыр, 27Ол мээң соомдан чедип кээр-даа болза, мен Ооң идииниң шидиишкинин безин чежеринге төлеп чок амытан-дыр мен» – деп харыылаан. 28Бо чугаа Иоанның улусту сугже сугар черинге – Иордан хемниң ындында Вифанияга болган.
Copyright information for
TyvTUV